នាយឧត្តមសេនីយ៍ គៀត ច័ន្ទថារិទ្ធ៖ ប្រព័ន្ធគ្រប់គ្រងព្រំដែនកម្ពុជា CBMS បានដើរតួនាទីយ៉ាងសំខាន់ ក្នុងការសម្រួលបែបបទអ្នកដំណើរចេញចូលប្រទេស

ភ្នំពេញ៖ ឯកឧត្តមនាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេស៍ បានថ្លែងបញ្ជាក់ថា ប្រព័ន្ធគ្រប់គ្រងព្រំដែនកម្ពុជា CBMS នេះ គឺបានដើរតួនាទីយ៉ាងសំខាន់ជូនដល់អគ្គនាយកអន្តោប្រវេសន៍ ធ្វើជាសេនាធិការជូនដល់ក្រសួងមហាផ្ទៃ ក្នុងការសម្រួលបែបបទអ្នកដំណើរចេញចូលប្រទេស ក៏ដូចជាការរក្សាទុកទិន្នន័យដែលអាចបម្រើដល់កិច្ចការជំនាញផ្សេងទៀត។

ការបញ្ជាក់របស់នាយឧត្តមសេនីយ៍ គៀត ច័ន្ទថារិទ្ធ ធ្វើឡើងក្នុងកិច្ចប្រជុំស្តាប់របាយការណ៍ស្តីពីសំណើសុំផ្លាស់ប្តូរឧបករណ៍បច្ចេកទេស បំពាក់បន្ថែមឧបករណ៍ផ្ទុកទិន្នន័យ និងកែសម្រួលដើម្បីលើកកម្ពស់កម្មវិធីផ្នែកទន់ នៃប្រព័ន្ធគ្រប់គ្រងព្រំដែនកម្ពុជា ហៅកាត់ថា CBMS របស់អគ្គនាយកដ្ឋានអន្តោប្រវេសន៍ ក្រោមអធិបតីភាពដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាថ្ងៃទី១៤ ខែមិថុនា ឆ្នាំ២០២៣នេះ ។

នាឱកាសនោះ ឯកឧត្តមនាយឧត្តមសេនីយ៍ គៀត ច័ន្ទថារិទ្ធ អគ្គនាយក នៃអគ្គនាយកដ្ឋានអន្តោប្រវេស៍ បានធ្វើសេចក្ដីរាយការណ៍សង្ខេបអំពីសារបាន និងដំណើរការនៃការរៀបចំបំពាក់នូវឧបករណ៍សម្ភារៈបច្ចេកទេសប្រព័ន្ធគ្រប់គ្រងព្រំដែនកម្ពុជា CBMS។

ឯកឧត្តម នាយឧត្តមសេនីយ៍ បានបន្ថែមថា ក្នុងការដាក់ឱ្យដំណើរការដំបូង ប្រព័ន្ធនេះបានបំពាក់់ឱ្យប៉ុស្តិ៍ច្រកទ្វារអន្តរជាតិ និងប៉ុស្តិ៍ច្រកទ្វារព្រំដែនអន្តរជាតិទាំង២៤ និងបានធ្វើការបំពាក់បន្ថែមដល់ប៉ុស្តិ៍ច្រកទ្វាដែលទើបនឹងបង្កើតថ្មីចំនួន ៣ទៀត សរុបច្ចុប្បន្នបានបំពាក់់ឱ្យប៉ុស្តិ៍ច្រកទ្វាអន្តរជាតិ និងច្រកទ្វារព្រំដែនអន្តរជាតិ សរុបចំនួន ២៧។ ឯកឧត្តម នាយឧត្តមសេនីយ៍ បានបន្តថា សម្រាប់ប្រព័ន្ធ CBMS នេះមានមុខងារសំខាន់ៗជាច្រើន ដែលបានបម្រើសកម្មភាព និងកិច្ចការងារនាពេលកន្លងមករបស់អគ្គនាយកដ្ឋាន។

លើសពីនេះទៅទៀត ឯកឧត្តម នាយឧត្តមសេនីយ៍ ក៏បានលើកឡើងបន្ថែម អំពីកិច្ចការជំនាញចាំបាច់ និងបញ្ហាប្រឈមមួយចំនួននៅសេសសល់របស់អគ្គនាយកដ្ឋាន ដើម្បីសម្រួល និងជម្រុញលើការងារគ្រប់គ្រងរបស់អគ្គនាយកដ្ឋានអោយកាន់តែមានប្រសិទ្ធភាពខ្ពស់។

ជាមួយគ្នានោះដែរ ឯកឧត្តម នាយឧត្តមសេនីយ៍ ក៏បានគោរពស្នើសុំមតិដឹកនាំពី សម្ដេចក្រឡាហោម រៀបចំទីតាំងរក្សារទិន្នន័យដើម្បីរក្សារទិន្នន័យ(Backup) របស់ប្រព័ន្ធគ្រប់គ្រងព្រំដែនកម្ពុជា CBMS និងបំពាក់ឧបករណ៍បច្ចេកទេសថ្មីៗ នៅតាមច្រកទ្វារព្រំដែនកម្ពុជា ព្រមជាមួយការកែសម្រួលហេដ្ឋារចនាសម្ព័ន្ធនានា ដើម្បីសំដៅលើកកម្ពស់ប្រសិទ្ធភាពការងារឱ្យកាន់តែមានភាពល្អប្រសើរ ៕