រាជរដ្ឋាភិបាល បញ្ចេញថវិកាជាង ២៣០លានដុល្លារ សង់ស្ពានឆ្លងទន្លេមេគង្គក្រោម ភ្ជាប់ជាមួយផ្លូវល្បឿនលឿនភ្នំពេញ-បាវិត ដើម្បីឲ្យពលរដ្ឋឆ្លងកាត់ ដោយមិនចាំបាច់បង់ថ្លៃ
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា ដោយសារការគិតគូរពីជីវភាព និងតម្រូវការរបស់ប្រជាពលរដ្ឋ ដែលចាំបាច់ត្រូវឆ្លងស្ពានឆ្លងទន្លេមេគង្គក្រោម ភ្ជាប់ជាមួយផ្លូវល្បឿនលឿនភ្នំពេញ-បាវិត រៀងរាល់ថ្ងៃនោះ រាជរដ្ឋាភិបាលបានបញ្ចេញថវិកាជាតិប្រមាណ ២៣០,៥៨៨,០០០ដុល្លារ ចេញថ្លៃសាងសង់ស្ពាននេះ ដើម្បីឱ្យប្រជាពលរដ្ឋឆ្លងកាត់ដោយមិនចាំបាច់បង់ថ្លៃឆ្លងស្ពាននោះឡើយ ។
ក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត នាថ្ងៃទី៧ ខែមិថុនា ឆ្នាំ២០២៣ សម្ដេចតេជោ ហ៊ុន សែន គូសបញ្ជាក់ថា គម្រោងសាងសង់នៅទីនេះ គឺចែងចែកជា២ផ្នែក៖ ទី១-ការសាងសង់ផ្លូវល្បឿនលឿនពីរាជធានីភ្នំពេញទៅកាន់ព្រំដែនកម្ពុជា-វៀតណាម បាវិត-ម៉ុកបៃ ប្រវែងសរុប១៣៥គីឡូម៉ែត្រ និងទី២-ការសាងសង់ស្ពានឆ្លងទន្លេមេគង្គក្រោមរវាងស្រុកកៀនស្វាយ និងស្រុកល្វាឯម ប្រវែងសរុប៣,៧០០ម៉ែត្រ (គិតទាំងជើងទេរសងខាង)។ បើតាមគម្រោងដើមដំបូង បន្ទាប់ពីសាងសង់ផ្លូវល្បឿនលឿន និងស្ពាននេះហើយ គឺតម្រូវឱ្យអ្នកធ្វើដំណើរត្រូវបង់ថ្លៃទាំងស្ពានទាំងផ្លូវ។
សម្ដេចតេជោ ហ៊ុន សែន ក៏បានណែនាំដល់ក្រុមហ៊ុនសាងសង់ថា ស្ពាន និងផ្លូវល្បឿនលឿនថ្មីនេះ ត្រូវតែសាងសង់ឱ្យរួចដំណាលគ្នា ហើយប្រសិនបើស្ពានសាងសង់រួចមុន គឺកាន់តែល្អប្រសើរ ព្រោះប្រជាជននឹងឆាប់បានធ្វើដំណើរឆ្លងកាត់ ដោយមិនចាំបាច់ឆ្លងទូកដរដូចមុន៕
