តូក្យូ៖ប្រមុខការពារជាតិជប៉ុន នៅថ្ងៃសៅរ៍ បានបញ្ជាឱ្យកងទ័ព ធ្វើសកម្មភាពស្ទាក់ចាប់មីស៊ីល និងត្រៀមបាញ់ទម្លាក់បំណែក ពីផ្កាយរណបកូរ៉េខាងជើង ដែលអាចធ្លាក់មកលើទឹកដីជប៉ុន។មេដឹកនាំកូរ៉េខាងជើង លោក គីម ជុងអ៊ុន បានថ្លែងនៅដើមសប្តាហ៍នេះថា ផ្កាយរណបចារកម្មយោធាដំបូងរបស់ខ្លួន ដែលនឹងត្រូវបាញ់បង្ហោះនៅកាលបរិច្ឆេទដែលមិនបានបញ្ជាក់។កូរ៉េខាងជើងបានបាញ់សាកល្បងកាំជ្រួចប្រហែល ១០០ គ្រាប់ចាប់តាំងពីដើមឆ្នាំមុន ដោយនិយាយថា ខ្លួនកំពុងឆ្លើយតបទៅនឹងសមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូង ដែលវាហៅថាការហាត់សមឈ្លានពាន។កាំជ្រួចជាច្រើនបានហោះរំលងជប៉ុន ឬធ្លាក់នៅឆ្នេរភាគខាងជើងជប៉ុន។
កាលពីសប្តាហ៍មុន កូរ៉េខាងជើងបានបាញ់សាកល្បងកាំជ្រួចអន្តរទ្វីបដែលមានឥន្ធនៈរឹងជាលើកដំបូង។រដ្ឋមន្ត្រីក្រសួងការពារជាតិលោក Yasukazu Hamada កាលពីថ្ងៃសៅរ៍បានណែនាំកងទ័ពឱ្យត្រៀមមីស៊ីលពីដីទៅអាកាស PAC-៣ នៅភាគនិរតីនៃប្រទេសជប៉ុន រួមទាំងកោះ Okinawa និងកោះក្បែរនោះ នៅក្នុងតំបន់ដែលគេជឿថាស្ថិតក្រោមផ្លូវហោះហើររបស់គ្រាប់រ៉ុក្កែតកូរ៉េខាងជើងដែលនឹងដឹកផ្កាយរណប។លោកក៏បានបញ្ជាឱ្យដាក់ពង្រាយនាវាពិឃាតដែលបំពាក់ដោយកាំជ្រួចពីអាកាសទៅអាកាស SM-៣ ទៅកាន់ដែនទឹកឆ្នេរសមុទ្រ នេះបើយោងតាមសេចក្តីថ្លែងការណ៍របស់ក្រសួងមួយ។
ក្រសួងបានថ្លែងថា “យើងកំពុងរៀបចំការចាំបាច់ ដោយសារតែលទ្ធភាពនៃការចេញបញ្ជា ដើម្បីកម្ទេចមីស៊ីលផ្លោង និងវត្ថុផ្សេងៗទៀត”។បញ្ជាបាញ់កាំជ្រួចត្រូវតែអនុម័តដោយនាយករដ្ឋមន្ត្រី។កូរ៉េខាងជើងត្រូវបានគេរំពឹងថានឹងធ្វើការសាកល្បងសព្វាវុធបន្ថែមទៀត ខណៈដែលសហរដ្ឋអាមេរិក និងកូរ៉េខាងត្បូងបន្តធ្វើសមយុទ្ធផ្លូវអាកាសរួមគ្នានៅសប្តាហ៍ក្រោយ។
