សម្តេចតេជោ ណែនាំឱ្យខិតខំផលិតផលកែច្នៃសម្រាប់នាំចេញ ប្រើប្រាស់ក្នុងស្រុក និងផ្គត់ផ្គង់ដល់ដៃទេសចរ ដែលមកកម្សាន្តនៅកម្ពុជា
ភ្នំពេញ៖ នាយករដ្ឋមន្ត្រីនៃកម្ពុជា សម្តេចតេជោ ហ៊ុន សែន បានបន្តណែនាំឱ្យខិតខំផលិតផលកែច្នៃ សម្រាប់នាំចេញ និងប្រើប្រាស់ក្នុងស្រុក ព្រមទាំងយកទៅផ្គត់ផ្គង់ដល់ដៃភ្ញៀវទេសចរ ដែលមកកម្សាន្តនៅកម្ពុជា។
ក្នុងឱកាសដែលសម្តេចបានអញ្ជើញជួបសំណេះសំណាល និងពិសារ អាហារ សាមគ្គី ជាមួយម្ចាស់សហគ្រាសធុនតូច និងមធ្យម ក៏ដូចជាអ្នកធ្វើធុរកិច្ចនៅកម្ពុជា នៅរសៀលថ្ងៃទី១០ ខែមេសា ឆ្នាំ២០២៣ សម្តេចតេជោ ហ៊ុន សែន ក៏ណែនាំឱ្យក្រសួងពាណិជ្ជកម្មត្រូវដឹកនាំសម្របសម្រួលបង្កើត ក្រុមការងារបច្ចេកទេសអន្ដរក្រសួង-ស្ថាប័ន ដើម្បីលើកកម្ពស់កិច្ចសម្រួលពាណិជ្ជកម្មសំដៅកាត់បន្ថយថ្លៃ នៃការធ្វើពាណិជ្ជកម្ម ជំរុញការនាំចេញរបស់កម្ពុជា ជាពិសេសផលិតផលកសិ-ឧស្សាហកម្ម ទៅកាន់ប្រទេសដែលមានកិច្ចព្រមព្រៀងពាណិជ្ជកម្មសេរីជាមួយ កម្ពុជា និងជំរុញការពង្រីកទីផ្សារក្នុងស្រុកឱ្យបានទូលំទូលាយ។
សម្តេចបានបន្តណែនាំយ៉ាងដូច្នេះថា”មួយផ្នែកត្រូវខិតខំដើម្បីឱ្យប្រជាជនកម្ពុជាយើងប្រើប្រាស់នូវផលិតផលដែលផលិតបាននៅក្នុងស្រុក ដែលកែច្នៃដោយសហគ្រាសធុនតូច និងធម្យម និងសិប្បកម្មរបស់យើង។ ឯមួយផ្នែកទៀត ត្រូវនាំចេញនៅនឹងកន្លែងតាមរយៈវិស័យទេសចរណ៍…!”។
សម្តេចបានបន្តថា សម្រាប់វិស័យទេសចរណ៍ បន្ទាប់ពីស្ថានជំងឺកូវីដ១៩ ធូរស្បើយកំពុងមានការកើនឡើងជាប្រចាំ បើយើងផ្គត់ផ្គង់ទៅកាន់តំបន់ដែលមានទេសចរណ៍ តាមរយៈនូវផលិតផលដែលមានស្រាប់ ដូចជាគ្រាប់ស្វាយចន្ទីជាដើម មិនមានការចាំបាច់ណានាំពីបរទេសមកផ្គត់ផ្គង់ឱ្យទេសចរណ៍ក្នុងស្រុកនោះទេ។
បន្ថែមពីនេះ សម្តេចតេជោ ហ៊ុន សែន បានគូសបញ្ជាក់ថា “សម្រាប់ផលិតផលនានាដែលកើតចេញពីការកែច្នៃ និងការផលិតរបស់កសិករ ត្រូវនាំចូលទៅកាន់បណ្តាសណ្ឋាគារណាដែលមានជនបរទេសស្នាក់នៅ ដែលយើងហៅថាការនាំចេញនូវនឹងកន្លែង”។
សម្តេចតេជោបន្ថែមថា កម្ពុជាមានទីផ្សារកាន់តែធំតាមរយៈកិច្ចព្រមព្រៀងពាណិជ្ជកម្មសេរីកម្ពុជា-ចិន តាមរយៈកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ព្រមទាំងតាមរយៈកិច្ចព្រមព្រៀងនានាដែលទើបបញ្ចប់ការចរចា។
សម្ដេចក៏បានណែនាំឱ្យយកចិត្តទុកជាមួយទីផ្សារជាមួយប្រទេសជិតខាងកម្ពុជា ដូចជាប្រទេសវៀតណាម ថៃ និងឡាវជាដើម ដែលប្រទេសជិតខាងទាំងនេះគឺសុទ្ធតែជាទីផ្សារសម្រាប់ការនាំចេញ។ ប្រសិនបើការផលិតណាមួយមិនមានទីផ្សារ យើងមិនអាចជំរុញការផលិតបន្ថែមពីសំណាក់កសិករ និងសិប្បករនៅក្នុងក្របខ័ណ្ឌសហគ្រាសធុនតូច និងមធ្យម ព្រមទាំងសិប្បកម្មនោះដែរ៕
