អភិបាលរងខេត្តបន្ទាយមានជ័យ បិទសន្និបាតបូកសរុបការងារសុខាភិបាល នៃរដ្ឋបាលខេត្តបន្ទាយមានជ័យឆ្នាំ២០២២ និងលើកទិសដៅការងារឆ្នាំ២០២៣
ក្នុងនាមរដ្ឋបាលខេត្ត លោក ឈឿន ក្រៃយ៉ុង អភិបាលរងខេត្ត បានធ្វើការណែនាំដល់មន្ត្រីសុខាភិបាល ត្រូវបន្តខិតខំផ្តល់សេវាសាធារណៈ ដែលជាកិច្ចការដ៏សំខាន់ និងចាំបាច់ក្នុងការចូលរួមចំណែកលើកកម្ពស់សុខមាលភាពប្រជាជន និងការកាត់បន្ថយភាពក្រីក្រ ដូច្នេះ ទាមទារឱ្យមានការចូលរួមគាំទ្រពីផ្នែកពាក់ព័ន្ធរួមទាំងវិស័យឯកជន និងអង្គការដៃគូព្រមទាំងការគាំទ្រយ៉ាងពេញទំហឹងពីអាជ្ញាធរមូលដ្ឋានគ្រប់ជាន់ថ្នាក់។ ទន្ទឹមនឹងនេះ ត្រូវចូលរួមក្នុងការវិនិយោគវិស័យសុខាភិបាលឱ្យបានខ្លាំងក្លា និងទាមទារឱ្យមន្ត្រីសុខាភិបាលគ្រប់ជាន់ថ្នាក់ ត្រូវយកចិត្តទុកដាក់លះបង់ កម្លាំងកាយចិត្ត ភាពអត់ធ្មត់ ប្រកាន់ខ្ជាប់នូវក្រមសីលធម៌វិជ្ជាជីវៈរបស់ខ្លួន ។
ការថ្លែងនេះ ក្នុងឱកាស លោក ឈឿន ក្រៃយ៉ុង តំណាង ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញជាអធិបតីភាព ពិធីបិទសន្និបាតបូកសរុបការងារសុខាភិបាលឆ្នាំ ២០២២ និងលើកទិសដៅការងារឆ្នាំ២០២៣ មានការអញ្ជើញចូលរួម លោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលខេត្ត លោក-លោកស្រី អនុប្រធានមន្ទីរសុខាភិបាលខេត្ត ប្រធានអង្គការដៃគូអភិវឌ្ឍជាតិ និងអន្តរជាតិ ថ្នាក់ដឹកនាំមន្ទីរពេទ្យខេត្ត ប្រធានការិយាល័យចំណុះមន្ទីរ ប្រធានការិយាល័យសុខាភិបាលស្រុកប្រតិបត្តិ ប្រធានមន្ទីរពេទ្យបង្អែកក្រុង/ ស្រុក ប្រធានមណ្ឌលសុខភាព ធ្វើឡើងនៅសាលប្រជុំមន្ទីរសុខាភិបាលខេត្តបន្ទាយមានជ័យ រសៀលថ្ងៃទី០៦ ខែមេសា ឆ្នាំ២០២៣។
លោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលខេត្តបានមានប្រសាសន៍ថា ៖ សមិទ្ឋផល និងវឌ្ឍនភាពដែលវិស័យសុខាភិបាលខេត្តបន្ទាយមានជ័យ សម្រេចបានក្នុងឆ្នាំ២០២២ ស្របតាមគោលនយោបាយរបស់ក្រសួងសុខាភិបាល មានការលុបបំបាត់ជំងឺមួយចំនួន កាត់បន្ថយបន្ទុកជំងឺផ្សេងៗ និងការលើកកម្ពស់សុខភាពប្រជាជនជាលំដាប់ និងបានបង្កើនបរិយាកាសអំណោយផល ដល់ការពង្រឹងប្រព័ន្ធសុខាភិបាល ក្នុងនោះរួមមានទាំងការបង្កើនចំនួនមន្ត្រីសុខាភិបាល ជាពិសេសគ្រូពេទ្យ និងបុគ្គលិក បច្ចេកទេស និងការអភិវឌ្ឍសមត្ថភាពធនធានមនុស្ស ការចូលរួមកែលំម្អហេដ្ឋារចនា សម្ព័ន្ធរូបវ័ន្ត ការផ្គត់ផ្គង់ ឱសថ បរិក្ខាពេទ្យ ការបំពាក់ឧបករណ៍ពេទ្យ និងបច្ចេកវិទ្យា។
មានប្រសាសន៍បិទសន្និបាត លោក ឈឿន ក្រៃយ៉ុង អភិបាលរងខេត្ត បានក៏ថ្លែងនូវការកោតសរសើចំពោះ មន្ត្រីសុខាភិបាល ដែលបានខិតខំប្រែងអស់កម្លាំងកាយចិត្ត លើផ្នែកសេវាសុខាភិបាលជូនប្រជាពលរដ្ឋ ជាពិសេសវរកងទ័ព អាវស ដែលបានចូលរួមចំណែកយ៉ាងសំខាន់ ក្នុងការប្រយុទ្ធប្រឆាំងនិងជំងឺកូវីដ-១៩ រហូតទទួលបានជោគជ័យ លើការអនុវត្តនូវយុទ្ធនាការប្រយុទ្ធប្រឆាំងនិងជំងឺកូវីដ-១៩ ដែលដាក់ចេញនូវយុទ្ធសាស្រ្តដ៏មុតស្រួចរបស់ប្រមុខរាជដ្ឋាភិបាល ក្រោមការដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានរិះរកវ៉ាក់សាំងការពារជំងឺកូវីដ-១៩ ចាក់ជូនពលរដ្ឋកម្ពុជា រួមទាំងជនបរទេសដែលស្នាក់នៅកម្ពុជា ដោយឥតគិតថ្លៃ ឱ្យរួចផុតពីជំងឺរាតត្បាតសកលកូវីដ-១៩ ៕
