ឯកឧត្ដមបណ្ឌិត ហ៊ុន ម៉ាណែត និងលោកជំទាវ ចាត់តំណាងចុះសួរសុខទុក្ខនាយឧត្តមសេនីយ៍ អ៊ុង សាមី ដល់គេហដ្ឋាននៅរាជធានីភ្នំពេញ

ភ្នំពេញ៖ ក្នុងឱកាសចូលរួមអបអរសាទរពិធីបុណ្យចូលឆ្នាំថ្មីប្រពៃណីយ៍ជាតិខ្មែរយើងនាពេលខាងមុខនេះ ប្រតិភូយុវជនគណបក្សប្រជាជនកម្ពុជាថ្នាក់កណ្តាលដឹកនាំដោយ លោក ចាយ បូរិន ប្រធានផ្នែកឃោសនាអប់រំ នៃយុវជនគណបក្សថ្នាក់កណ្តាល តំណាងឯកឧត្ដមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល និងលោកជំទាវបណ្ឌិត ពេជ ចន្ទមុន្នី រួមដំណើរដោយលោក កែវ ពិសិដ្ឋ និងលោក ទួន យ៉ាត អនុប្រធានផ្នែកឃោសនាអប់រំ ព្រមទាំងសមាជិក សមាជិកា នៅថ្ងៃទី២៨ ខែមីនា ឆ្នាំ២០២៣ បានអញ្ជើញសួរសុខទុក្ខ នាយឧត្តមសេនីយ៍ អ៊ុង សាមី សមាជិកគណៈកម្មាធិការកណ្តាលគណបក្សប្រជាជនកម្ពុជា និងជារដ្ឋលេខាធិការក្រសួងមហាផ្ទៃ។

ឯកឧត្ដម ចាយ បូរិន បានផ្តាំផ្ញើសួរសុខទុក្ខពីសំណាក់សម្តេចតេជោ ប្រធានគណបក្ស សម្តេចចក្រី ប្រធានកិត្តិយសគណបក្ស សម្តេច លោកស្រី អនុប្រធានគណបក្ស លោក លោកស្រី ដែលជាថ្នាក់ដឹកនាំគណបក្សគ្រប់លំដាប់ថ្នាក់ ជាពិសេសឯកឧត្ដមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនចំពោះនាយឧត្តមសេនីយ៍ អ៊ុង សាមី និងក្រុមគ្រួសារ។

នាយឧត្តមសេនីយ៍ អ៊ុង សាមី មានក្តីរំភើបសប្បាយរីករាយយ៉ាងខ្លាំងឥតឧបមា និងអរគុណជាអនេកព្រមទាំងបានសម្តែងនូវការដឹងគុណយ៉ាងជ្រាលជ្រៅចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចចក្រី ហេង សំរិន សម្តេចធម្មវិសុទ្ធវង្សា សៅ ទី ហេងសំរិន សម្តេច លោកស្រី ដែលជាថ្នាក់ដឹកនាំគណបក្សគ្រប់លំដាប់ថ្នាក់ ជាពិសេសឯកឧត្ដមបណ្ឌិត ហ៊ុន ម៉ាណែត ដែលបានចាត់លោក ចាយ បូរិន ជាតំណាងដឹកនាំប្រតិភូមកសួរសុខទុក្ខឯកឧត្តមដល់លំនៅដ្ឋាន។

នាយឧត្តមសេនីយ៍ បានបញ្ជាក់ពីការបន្តគាំទ្រចំពោះបេក្ខភាពសម្តេចតេជោ ជានាយករដ្ឋមន្ត្រីនៅអាណត្តិទី៧ នៃរដ្ឋសភានិងអាណត្តិបន្តបន្ទាប់ទៀត និងគាំទ្រឯកឧត្ដមបណ្ឌិត ហ៊ុន ម៉ាណែត ជាបេក្ខជននាយករដ្ឋមន្រ្តីបន្តវេន នាពេលអនាគត។

នាយឧត្តមសេនីយ៍ បានសម្តែងនូវមនោសញ្ចេតនាសប្បាយរីករាយទីបំផុត និងសូមកោតសរសើរដោយស្មោះចំពោះយុវជនគណបក្សថ្នាក់កណ្តាលក្រោមការដឹកនាំរបស់ឯកឧត្ដមបណ្ឌិត ហ៊ុន ម៉ាណែត ដែលបានបម្រើប្រជាពលរដ្ឋ ដោយប្រកាន់ខ្ជាប់នូវសីលធម៌ គុណធម៌ ភាពថ្លៃថ្នូរ សុភាពរាបសា ជាពិសេសលោកមានការពេញចិត្តគាំទ្រយ៉ាងខ្លាំង ចំពោះសកម្មភាពយុវជនដែលយកចិត្តទុកដាក់ដល់រាមច្បងរបស់គណបក្សជំនាន់មុន។

នាយឧត្តមសេនីយ៍ ក៏បានលើកឡើងផងដែរថា «យុវជនគណបក្សត្រូវរួបរួមសាមគ្គីគ្នា ត្រូវស្មោះត្រង់នឹងគ្នាទៅវិញទៅមក ត្រូវតាំងចិត្តបំពេញការងារតាមការតាំងរបស់បក្សឱ្យបានល្អ ត្រូវមានឆន្ទៈមោះមុតក្នុងការចូលរួម ក្នុងបេសកកម្មកសាងជាតិមាតុភូមិ ដើម្បីចូលរួមចំណែកបន្តថែរក្សាសមិទ្ធផលវិជ្ជមានដែលយុវជនជំនាន់មុនបានបន្សល់ទុកឱ្យ ព្រមទាំងខិតខំបង្កើតសមិទ្ធផលវិជ្ជមានថ្មីៗបន្ថែមទៀត ដើម្បីសុខសន្តិភាព ភាពសម្បូរសប្បាយនិងសុភមង្គលរបស់ប្រទេសជាតិ»។

លោកប្រធានប្រតិភូ បានសម្តែងនូវការកោតសរសើរ ចំពោះវីរភាពដ៏អង់អាចក្លាហានរបស់ នាយឧត្តមសេនីយ៍ អ៊ុង សាមី ដែលបានចូលរួមបម្រើកងទ័ពដើម្បីបុព្វហេតុរំដោះប្រជាជនឱ្យរួចផុតពីរបបប្រល័យពូជសាសន៍ ប៉ុល ពត ព្រមទាំងការពារ និងអភិវឌ្ឍប្រទេសជាតិដោយជោគជ័យក្រោយថ្ងៃរំដោះ ៧ មករា ១៩៧៩ ដោយបានចេញទៅប្រទេសវៀតណាមនៅឆ្នាំ១៩៧៨ ហើយបានចូលបម្រើកងទ័ពនៅកងវរសេនាតូចលេខ១៨ ជាប្រធាន
វរសេនាតូចលេខ១៨ ប្រចាំព្រំដែនកម្ពុជា-ថៃ ប្រធានសេនាធិការ បញ្ជាការយោធាខេត្តបាត់ដំបង លេខាគណៈកម្មាធិការបក្ស និងជាប្រធានគណៈកម្មាធិការប្រជាជនខេត្តបាត់ដំបង ប្រធានយោធាភូមិភាគទី៥ អភិបាលខេត្តពោធិ៍សាត់ ១អាណត្តិ អភិបាលខេត្តព្រៃវែង ១អាណត្តិ ទីប្រឹក្សាសម្តេចតេជោ ហ៊ុន សែន ជានាយឧត្តមសេនីយ៍ អនុរដ្ឋលេខាធិការ និងជារដ្ឋលេខាធិការក្រសួងមហាផ្ទៃ រហូតមកបច្ចុប្បន្ននេះ។

ក្នុងឱកាសដ៏មានអត្ថន័យនេះ ឯកឧត្ដម ចាយ បូរិន និងលោក កែវ ពិសិដ្ឋ, លោក ទួន យ៉ាត ព្រមទាំងសមាជិក សមាជិកា ប្រតិភូបានប្រគល់ជូនវត្ថុអនុស្សារីយ៍ និងថវិកា ជាអំណោយរបស់ឯកឧត្ដមបណ្ឌិត ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់នាយឧត្តមសេនីយ៍ អ៊ុង សាមី និងសូមបួងសួងដល់គុណបុណ្យព្រះរតនត្រ័យ វត្ថុសក្តិសិទ្ធិក្នុងលោក ទេវតាឆ្នាំថ្មី សូមតាមជួយបីបាច់រក្សានាយឧត្តមសេនីយ៍បានចាកផុតពីជំងឺដង្កាត់នានា មានសុខភាពល្អ កម្លាំងមាំមួន និងមានជន្មាយុយឺនយូរ ៕