ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា សម្តេចធ្លាប់បានរំលឹក ដល់មិត្តភក្តិបរទេសកុំឱ្យសាងកំហុសលើកទី៣ នៅកម្ពុជា ។
ក្នុងសម្ពោធដាក់ឱ្យប្រើប្រាស់អគារសិក្សាចំនួន២ខ្នង និងប្រគល់សញ្ញាបត្រជូននិស្សិត នៃវិទ្យាស្ថានបច្ចេកវិទ្យាកម្ពុជាជិត ៥ពាន់នាក់ នាថ្ងៃទី១ មីនានេះ សម្តេចតេជោ ហ៊ុន សែន បានបញ្ជាក់ថា អ្វីដែលសម្តេចរំលឹកបរទេសនោះ គឺក្នុងនាមប្រទេសប្រជាធិបតេយ្យ តែគាំទ្រការធ្វើរដ្ឋប្រហារខុសច្បាប់។
សម្តេចតេជោ ក៏បានរំលឹកពីកំហុសទី២ របស់ពួកគេ គឺជាប្រទេសប្រជាធិបតេយ្យ ប៉ុន្តែធ្វើមិនដឹងមិនឮអំពីរបបប្រល័យពូជសាសន៍ ប៉ុលពត ហើយទទួលស្គាល់របបនោះថែមទៀត។
សម្តេចតេជោបន្តថា បន្ទាប់ពីសម្តេចរំលឹកបែបនេះ ក៏មានថ្នាក់ដឹកនាំប្រទេសមួយចំនួនសម្តែងការសោកស្តាយ និងចាត់ទុកនោះជាកំហុសដ៏ធំរបស់ពួកគេ។ សម្ដេចថា គ្មានការជោគជ័យណាមួយ មិនកើតចេញពីការលំបាកនោះទេ។ សម្តេចតេជោ ហ៊ុន សែន បានថ្លែងថា ជោគជ័យដែលកើតចេញពីការលំបាក គឺជាជោគជ័យមានតម្លៃបំផុត។
សម្តេចតេជោ ហ៊ុន សែន បានចោទសួរថា តើនរណាហ៊ាននិយាយថា បើគ្មានថ្ងៃរំដោះ៧មករា ខ្លួនក៏អាចរួចជីវិតពីរបបប្រល័យពូជសាសន៍ ប៉ុលពត ៕
