វគ្គហ្វឹកហ្វឺនជំនាញមូលដ្ឋានបោសសំអាតគ្រឿងផ្ទុះ ក្រោមកិច្ចសហប្រតិបត្តិការ និងហិរញ្ញប្បទានពីសាធារណរដ្ឋបារាំង ត្រូវបានបិទបញ្ចប់ប្រកបដោយជោគជ័យ

ភ្នំពេញ៖ វគ្គហ្វឹកហ្វឺនជំនាញបោសសំអាតគ្រឿងផ្ទុះរយៈពេល១ខែ ក្រោមកិច្ចសហប្រតិបត្តិការ និងហិរញ្ញប្បទានពីសាធារណរដ្ឋបារាំង នាព្រឹកថ្ងៃទី១០ ខែកុម្ភៈ ឆ្នាំ២០២៣ ត្រូវបានបិទបញ្ចប់ប្រកបដោយជោគជ័យ ក្រោមអធិបតីយភាពដ៏ខ្ពង់ខ្ពស់ ឯកឧត្តម នាឧត្តមសេនីយ៍ ប៉ុល សារឿន ទេសរដ្ឋមន្រ្តីទទួលបន្ទុកការងារបញ្ជូនកងកម្លាំងចូលរួមបេសកកម្មរក្សាសន្តិភាព អ.ស.ប. និង ឯកឧត្តម Jacques Pellet ឯកអគ្គរដ្ឋទូតបារាំងប្រចាំនៅកម្ពុជា។

យោងតាមប្រសាសន៍ ឧត្តមសេនីយ៍ទោ ប្រាក់ សុទ្ធ អគ្គនាយករងមជ្ឈមណ្ឌលជាតិរក្សាសន្តិភាព វគ្គហ្វឹកហ្វឹនជំនាញមូលដ្ឋានបោសសំអាតគ្រឿងផ្ទុះ ត្រូវបានរៀបចំឡើងដើម្បីផ្តល់នូវចំណេះដឹងថ្មីៗបន្ថែមទៀតដល់សិក្ខាកាម រួមទាំងបំពេញបន្ថែមចំណុចខ្វះខាត សម្រាប់បង្កើនសមត្ថភាពឱ្យយល់ដឹងពីនីតិវិធីមូលដ្ឋានបោសសំអាតគ្រឿងផ្ទុះ ក្នុងការសម្រេចបេសកកម្មទាំងថ្នាក់ជាតិ និងអង្គការសហប្រជាជាតិ។ វគ្គហ្វឹកហ្វឺននេះ មានសិក្ខាកាមចំនួន ៣០នាក់ ក្នុងនោះនារី ចំនួន២នាក់ ដោយមានការចូលរួមពីកងយោធពលខេមរភូមិន្ទ និងក្រសួងមហាផ្ទៃផងដែរ។

ទន្ទឹមនឹងការហ្វឹកហ្វឺន ត្រូវបានបញ្ចប់ជាស្ថាពរ ឯកឧត្តម Jacques Pellet បានកោតសរសើរចំពោះកម្ពុជា ក្នុងការរួមចំណែករបស់កងកម្លាំងមួកខៀវកម្ពុជាក្នុងប្រតិបត្តិការរក្សាសន្តិភាព មិនត្រឹមតែជាបរិមាណប៉ុណ្ណោះទេ ប៉ុន្តែក៏មានគុណភាពតាមកម្រឹតនៃការហ្វឹកហ្វឺនដែលសម្រេចបានផងដែរ។ ឯកឧត្តម បានបន្ថែមថា វគ្គសិក្សានេះនឹងអាចឱ្យទាហានមួកខៀវកម្ពុជា មានសមត្ថភាពថ្មី ទៅនឹងតម្រូវការ អ.ស.ប. អំឡុងពេលបំពេញបេសកកម្មនាពេលអនាគត។ ឯកឧត្តមឯកអគ្គរដ្ឋទូតបារាំង ក៏បានបង្ហាញការគាំទ្រ និងអមដំណើរមជ្ឈមណ្ឌលជាតិ នូវមហិច្ឆតា ដើម្បីក្លាយជាមជ្ឈមណ្ឌលដ៏មានឧត្តមភាពក្នុងវិស័យរក្សាសន្តិភាព។

ជាមួយគ្នានោះ ឯកឧត្តម នាឧត្តមសេនីយ៍ ប៉ុល សារឿន បានថ្លែងអំណរគុណចំពោះរាជរដ្ឋាភិបាលនៃសាធារណរដ្ឋបារាំង ដែលជាមិត្តជិតស្និទ្ធរបស់កម្ពុជាក្នុងដំណើរស្វែងរកសន្តិភាព និងអភិវឌ្ឈកម្ពុជា។ ឯកឧត្តម នាឧត្តមសេនីយ៍ ក៏បានវាយតម្លៃខ្ពស់ចំពោះការយកចិត្តទុកដាក់ ខិតខំប្រឹងប្រែង របស់មជ្ឈមណ្ឌលជាតិរក្សាសន្តិភាព និងបណ្តាស្ថាប័នពាក់ព័ន្ធ ដែលមានស្មារតីទទួលខុសត្រូវខ្ពស់ក្នុងការរៀបចំកម្មវិធីសិក្សា ខ្លឹមសារមេរៀន ឯកសារ ដឹកនាំគ្រប់គ្រង បង្រៀន និងរៀន ដែលធ្វើឱ្យវគ្គហ្វឹកហ្វឺននេះ បានដំណើរការតាមពេលកំណត់។

គួរបញ្ជាក់ផងដែរថា គិតចាប់ពីឆ្នាំ២០២២ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានសម្រេចបង្កើតគម្រោង សម្តេចតេជោសម្រាប់សកម្មមីន«ផ្តល់ដីសុវត្ថិភាព បង្កើតស្នាមញញឹម» និងមូលនិធិកម្ពុជាគ្មានមីននៅឆ្នាំ២០២៥ ដើម្បីពន្លឿនដល់ការបោសសំអាតមីន និងគ្រឿងផ្ទុះឱ្យអស់ត្រឹមឆ្នាំ២០២៥។

គិតចាប់ពីឆ្នាំ២០០៦រហូតមកដល់បច្ចុប្បន្ន កម្ពុជាបានបញ្ជូនកម្លាំងចូលរួមបេសកកម្មរក្សាសន្តិភាពរបស់ អ.ស.ប សរុបចំនួន ៨,៨៥៩នាក់ ក្នុងនោះមាននារីចំនួន ៦៨១នាក់ទៅកាន់បេសកកម្មចំនួន ១១នាក់ក្នុងប្រទេសចំនួន៩ ដូចជា សាធារណរដ្ឋស៊ូដង់, ស៊ូដង់ខាងត្បូង, ឆាដ, អាហ្វ្រិកកណ្តាល, លីបង់, ម៉ាលី, ស៊ីរី, សាយប្រឺស និងយេមែន។ បច្ចុប្បន្ន កងកម្លាំងចំនួន ៧៨៨នាក់ ក្នុងនោះនារីចំនួន ១៣០នាក់ កំពុងបំពេញបេសកកម្មនៅប្រទេសចំនួន៤ រួមមាន សាធារណរដ្ឋស៊ូដង់ខាងត្បូង, លីបង់, អាហ្វ្រិកកណ្តាល និងម៉ាលី ៕