លោក លី សារី អញ្ជើញដឹកនាំប្រជុំត្រួតពិនិត្យការស្នើសុំរបស់ តំណាងក្រុមហ៊ុន kP Developer land & House ស្តីពីចាក់ដី ស្ថិតនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ

ភ្នំពេញ៖​ ទោះយ៉ាងណា ក៏អាជ្ញាធរនៅតែលើកទឹកចិត្តដល់អ្នកវិនិយោគ អោយមករកស៊ីនៅក្នុងខេត្ត ប៉ុន្តែចាំបាច់ត្រូវតែសុំគោលការណ៍ច្បាប់ នេះគឺជាប្រសាសន៍លើកឡើងរបស់លោក លី សារី អភិបាលរងខេត្ត តំណាងឱ្យឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានអញ្ជើញដឹកនាំប្រជុំត្រួតពិនិត្យការស្នើសុំរបស់លោកស្រី ម៉ន ដានី តំណាងក្រុមហ៊ុន kP Developer land & House ស្តីពីចាក់ដី ស្ថិតនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ជាមួយក្រុមការងារខេត្ត ស្ថាប័នមន្ទីរជំនាញ និង តំណាងក្រុមហ៊ុន នៅទីតាំងដី(ការិយាល័យ) របស់ក្រុមហ៊ុន នារសៀលថ្ងៃទី១០ ខែមករា ឆ្នាំ២០២៣។

ពាក់ព័ន្ធនឹងបញ្ហាដីឡូនេះក្នុងកិច្ចប្រជុំលោក ប្រធានក្រុមការងារដឹកនាំ បានអោយលោក លោកស្រី  មន្ត្រីជំនាញគ្រប់ស្ថាប័នពាក់ព័ន្ធបានឡើងធ្វើការពន្យល់ណែនាំបកស្រាយពីនីតិវិធីនៅជំនាញនីមួយៗ ដើម្បីណែនាំដល់ម្ចាស់ដីឡូ ម៉ន ដានី បានធ្វើការសម្រួល និងយកអនុវត្តច្បាប់ ដើម្បីតែសម្រួលស្របទៅតាមបច្ចេកទេសច្បាប់ដីធ្លី និងច្បាប់សំណង់។

គួររំលឹកផងដែរថា គម្រោងក្រុមហ៊ុនKP Developer Land & House ឬម៉ន ដានី  លក់ដីឡូតិ៍នេះ មានទីតាំងនៅក្រុងសិរីសោភ័ណនិងស្រុកអូរជ្រៅ (មិនមែននៅក្រុងប៉ោយប៉ែតដូចដែលក្រុមហ៊ុនប្រកាសប្រាប់អតិថិជន)នោះទេ។

ជាលទ្ឋផលនៃកិច្ចប្រជុំ ក្រោយពិនិត្យពិភាក្សាគ្នារួចមក លោក លី សារី និងក្រុមការងារ បានព្រមព្រៀងគ្នា ដូចខាងក្រោម៖១-សូមផ្អាកការសាងសង់ជាបណ្តោះអាសន្នរបស់ក្រុមហ៊ុនសិន,២-សូមក្រុមហ៊ុនផ្ទេរកម្មសិទ្ឋដែលបានទិញពីប្រជាពលរដ្ឋមកជាកម្មសិទ្ឋរបស់ក្រុមហ៊ុនសិន,៣-សូមក្រុមហ៊ុន សំណើសុំចាក់ដីតាមគម្រោងប្លង់របស់ខ្លួន តាមនីតិវិធីផ្លូវច្បាប់ និងបច្ចេកទេស មកខេត្ត ឬក្រសួង,៤-សូមក្រុមហ៊ុនស្នើសុំប្តូរប្រភេទដីជាដីសាងសង់ និងបង្រួមក្បាលដី ដែលបានទិញដីរួម កន្លងមក,៥-សូមក្រុមហ៊ុនស្នើសុំការវិនិយោគក្នុងគម្រោង ត្រូវមានការអនុញ្ញតិជាផ្លូវការពី ស្ថាប័នមាន សមត្ថកិច្ច និងខេត្ត ឬក្រសួង ជាមុនសិន ទើបមានសិទ្ឋិដំណើរការ វិនិយោគ៕