នាយកដ្ឋានជនបរទេស អន្ដោប្រវេសន្ដជាអ្នកវិនិយោគឯកជន បើកកិច្ចប្រជុំឆ្លងរបាយការណ៍ បូកសរុបលទ្ធផលការងារ ប្រចាំឆ្នាំ២០២២ និងលើកទិសដៅការងារឆ្នាំ២០២៣

ភ្នំពេញ៖ នាយកដ្ឋានជនបរទេសអន្តោប្រវេសន្តជាអ្នកវិនិយោគឯកជន នាថ្ងៃទី២៧ ខែធ្នូ ឆ្នាំ២០២២ បានបើកកិច្ចប្រជុំឆ្លងរបាយការណ៍ បូកសរុបលទ្ធផលការងារប្រចាំឆ្នាំ២០២២ និងលើកទិសដៅការងារឆ្នាំ២០២៣ ព្រមទាំងប្រកាសផ្ទេរភារកិច្ច តែងតាំងមុខតំណែង ប្រគល់ភារកិច្ច បំពាក់ឋានន្តរស័ក្តិជូននាយនគរបាល និងមន្ត្រី នៃនាយកដ្ឋាន ក្រោមអធិបតីភាព ឯកឧត្តម ឧត្តមសេនីយ៍ឯក សុខ លីហួត ឯកឧត្តម ឧត្តមសេនីយ៍ឯក សុវណ្ណា ពិសាខា អគ្គនាយករង និងលោក ឧត្តមសេនីយ៍ទោ ហាស់ សុត្ថា ប្រធាននាយកដ្ឋានជនបរទេស អន្ដោប្រវេសន្ដជាអ្នកវិនិយោគឯកជន នៅសាលប្រជុំនៃអគ្គនាយកដ្ឋានអន្តោប្រវេសន៍ ។

ក្នុងកិច្ចដំណើរការនៃអង្គប្រជុំលោក ឧត្ដមសេនីយ៍ទោ អនុប្រធាននាយកដ្ឋានបានអានខ្លឹមសារ សេចក្ដីព្រាងរបាយការណ៍ដើម្បីឲ្យអង្គពិធីទាំងមូល ពិនិត្យ កែសម្រួលពាក្យពេជន៍ អក្ខរាវិរុទ្ធ ខ្លឹមសារ ក្នុងរបាយការណ៍។ បន្ទាប់ពីអានរបាយការណ៍រួច លោកនាយការិយាល័យជំនាញ លោកអនុប្រធាននាយកដ្ឋាន ដែលជាប្រធានក្រុមចម្រុះអធិការ កិច្ចហត្ថពលកម្មបរទេស បានឡើងរាយការណ៍ពីវឌ្ឍនភាពនៃការងារជំនាញ នឹងបានលើកឡើងពីបញ្ហាប្រឈម និងសំណូមពរនានាជូនថ្នាក់ដឹកនាំ នាយកដ្ឋានដើម្បីពិនិត្យ និងមានមតិដឹកនាំ។

ក្រោយពីបានពិនិត្យ និងស្ដាប់ការការរាយការណ៍ពីមន្ដ្រីជំនាញរួច លោក ឧត្តមសេនីយ៍ទោ ប្រធាននាយកដ្ឋាន បានធ្វើការកោតសរសើរដល់មន្ដ្រីនៃនាយកដ្ឋានទាំងអស់បានខិតខំបំពេញការងារប្រកបដោយជោគជ័យ និងមានសាមគ្គីភាពល្អ ជាមួយគ្នានោះដែរលោក ឧត្តមសេនីយ៍ទោ ប្រធាននាយកដ្ឋាន បានដោះស្រាយនូវរាល់បញ្ហាប្រឈម សំណូមពរ ដែលអង្គប្រជុំបានលើកឡើង។

ចុងបញ្ចប់ ឯកឧត្តម ឧត្តមសេនីយ៍ឯក អគ្គនាយករង បានបូកសរុប និងមានមតិសំណេះសំណាលជាមួយមន្ដ្រីនៃនាយកដ្ឋាន។ ឯកឧត្តម ឧត្តមសេនីយ៍ឯក អគ្គនាយករងបានឯកភាពទៅលើរបាយការណ៍បូកសរុបលទ្ធផលការងារប្រចាំឆ្នាំ២០២២របស់នាយកដ្ឋាន នឹងបានលើកឡើងពីស្នាដៃដែលមន្ដ្រីនៃនាយកដ្ឋានខិតខំបំពេញទទួលបានលទ្ធផលល្អប្រសើរ ដែលធ្វើឲ្យថ្នាក់ដឹកនាំរាជរដ្ឋាភិបាលយកចិត្ដទុកដាក់ និងប្រគល់ការងារជាច្រើនទៀតដល់នាយកដ្ឋានក្នុងការធ្វើអធិការកិច្ចហត្ថពលកម្មបរទេសទូទាំង២៥ រាជធានី-ខេត្ដ។

ឯកឧត្តម ឧត្តមសេនីយ៍ឯក អគ្គនាយករង ក៏បានផ្ដាំផ្ញើដល់មន្ដ្រីទាំងអស់ខិតខំ បំពេញការងារជំនាញរបស់នាយកដ្ឋានបន្ថែមទៀត ដើម្បីឲ្យសម្រេចតាមផែនការ ដែលបានដាក់ក្នុងឆ្នាំ២០២៣ខាងមុខ ៕