នាយឧត្តមសេនីយ៍ សន្តិបណ្ឌិត នេត សាវឿន អនុញ្ញាតឱ្យ ប្រធាននាយកដ្ឋានកិច្ចការបរទេស ក្រសួងនគរបាលវៀតណាម ចូលជួបសម្តែងការគួរសម

ភ្នំពេញ៖ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអនុញ្ញាឱ្យ ឯកឧត្តម ឧត្តមសេនីយ៍ទោ ដាំង ស៊ុនហុង ប្រធាននាយកដ្ឋានកិច្ចការបរទេស ក្រសួងនគរបាល នៃសាធារណរដ្ឋសង្គមនិយមវៀតណាម ចូលជួបសម្តែងការគួរសម ខណៈដែលឯកឧត្តមដឹកនាំប្រតិភូអញ្ជើញមកបំពេញទស្សនកិច្ចការងារនៅព្រះរាជាណាចក្រកម្ពុជា។

ជំនួបសម្តែងការគួរសមនេះ ធ្វើឡើងនារសៀលថ្ងៃពុធ ទី១៤ ខែធ្នូ ឆ្នាំ២០២២ នៅអគ្គស្នងការដ្ឋាននគរបាលជាតិ។

ជាកិច្ចចាប់ផ្តើម ឯកឧត្តម ឧត្តមសេនីយ៍ទោ ដាំង ស៊ុនហុង ប្រធាននាយកដ្ឋានកិច្ចការបរទេស បានរាយការណ៍ជូន ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ អំពីលទ្ធផលកិច្ចសហប្រតិបត្តការលើកិច្ចការទំនាក់ទំនងទ្វេភាគីរវាងនគរបាលជាតិកម្ពុជា និងនគរបាលវៀតណាម ដែលសម្រេចបានក្នុងឆ្នាំ២០២២ ព្រមទាំងបានកោតសរសើរ និងវាយតម្លៃខ្ពស់ចំពោះលទ្ធផលចំពោះកិច្ចសហការដ៏ល្អក្នុងការប្រយុទ្ធប្រឆាំងបទល្មើសឆ្លងដែនគ្រប់ប្រភេទ ពិសេសការធានាសុវត្ថិភាព សន្តិសុខ និងសណ្តាប់ធ្នាប់ជារួមនៃប្រទេសទាំងពីរ កម្ពុជា-វៀតណាម។

ក្នុងជំនួបនេះ ឯកឧត្តម ឧត្តមសេនីយ៍ទោ ដាំង ស៊ុនហុង ក៏បានពាំនាំនូវការផ្តាំផ្ញើសាកសួរសុខទុក្ខពីសំណាក់ ឯកឧត្តម ឧត្តមសេនីយ៍ឯក តូ ឡឹម រដ្ឋមន្រ្តីក្រសួងនគរបាលវៀតណាម ដោយបានអញ្ចើញ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងសហការីអញ្ជើញទៅទស្សនកិច្ចនៅសាធារណរដ្ឋសង្គមនិយមវៀតណាម នៅពេលសមស្រមណាមួយផងដែរ។

ជាការឆ្លើយតប ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានកោតសរសើរ និងគាំទ្រចំពោះយន្តការនៃកិច្ចសហប្រតិបត្តិការនាយកដ្ឋានជំនាញទាំងពីរ និងបានចង្អុលដឹកនាំអោយមានការបង្កើតកិច្ចសហប្រតិបត្តិការការងារបណ្តុះបណ្តាល និងបានទទួលយកនូវការអញ្ជើញទៅទស្សនកិច្ចនៅសាធារណរដ្ឋសង្គមនិយមវៀតណាម៕