មន្ត្រីជំនាញ ប.ស.ស ចូលរួមសិក្ខាសាលាភាពជាដៃគូសកលលើកទី១ ស្តីពី “សោធនសាធារណៈក្នុងតំបន់អាស៊ីប៉ាស៊ីហ្វិក”

ភ្នំពេញ៖ ក្រោមការចាត់តាំងពីសំណាក់ ឯកឧត្តម អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជា អគ្គនាយកបេឡាជាតិសន្តិសុខសង្គម នាថ្ងៃទី៨ ខែធ្នូ ឆ្នាំ២០២២ លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គមនៃ ប.ស.ស. បានដឹកនាំ មន្ត្រី និងបុគ្គលិកជំនាញ​នៃនាយកដ្ឋានតាវកាលិកសន្តិសុខសង្គម ដោយមានការសម្របសម្រួលពីនាយកដ្ឋានសេវាអតិថិជន និងទំនាក់ទំនងសាធារណៈ ចូលរួមសិក្ខាសាលាភាពជាដៃគូសកលលើកទី១ស្តីពី “សោធនសាធារណៈក្នុងតំបន់អាស៊ី ប៉ាស៊ីហ្វិក” របស់អង្គភាពសោធនជាតិ (NPS) នៃសាធារណរដ្ឋកូរ៉េ តាមរយៈប្រព័ន្ធអនឡាញ (Zoom Meeting)។

សិក្ខាសាលានេះ រៀបចំឡើងក្នុងគោលបំណងដើម្បី ចែករំលែកនូវនិន្នាការគោលនយោបាយសុខុមាលភាពសង្គម ការពង្រីកការគ្របដណ្តប់ផ្នែកប្រាក់សោធន និងពិភាក្សាអំពីទិសដៅអភិវឌ្ឍន៍របបសន្តិសុខសង្គមផ្នែកប្រាក់សោធន ដែលបានចែករំលែកដោយប្រទេសចំនួន ៣ នៅក្នុងតំបន់អាស៊ី រួមមាន៖ ប្រទេសនេប៉ាល់ ប្រទេសម៉ាឡេស៊ី និងប្រទេសឥណ្ឌូនេស៊ី។

ក្នុងសិក្ខាសាលានេះដែរ លោក សុក បូរ៉ា ប្រធាននាយកដ្ឋានតាវកាលិកសន្តិសុខសង្គមនៃ ប.ស.ស. ក៏បានថ្លែងអំណរគុណយ៉ាងជ្រាលជ្រៅ ដល់អង្គភាពសោធនជាតិ (NPS) នៃសាធារណរដ្ឋកូរ៉េ ដែលបានអញ្ជើញមន្រ្តីជំនាញ ប.ស.ស. ចូលរួមក្នុងសិក្ខាសាលានេះ ដែលអាចចូលរួមចំណែកក្នុងការពង្រឹងសមត្ថភាពបច្ចេកទេសរបស់មន្រ្តីជំនាញបន្ថែមទៀតផងដែរ។

សូមបញ្ជាក់ផងដែរថា៖ សិក្ខាសាលាខាងលើនេះ ត្រូវបានរៀបចំឡើងដោយអង្គភាពសោធនជាតិ (NPS) នៃសាធារណរដ្ឋកូរ៉េ និងមានការចូលរួមពីបេឡាជាតិសន្តិសុខសង្គម កម្ពុជា ស្ថាប័នសន្តិសុខសង្គមក្នុងតំបន់អាស៊ី ប៉ាស៊ីហ្វិក និងស្ថាប័នពាក់ព័ន្ធនានាជាច្រើនទៀតផងដែរ៕