ឯកឧត្តមកិត្តិសេដ្ឋាបណ្ឌិត ជាម យៀប អនុញ្ញាតឲ្យប្រធានវិទ្យាស្ថាន ICAP ចូលជួបសម្តែងការគួរសម និងពិភាក្សាការងារ

ភ្នំពេញ៖ ឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ រដ្ឋសភា នាថ្ងៃទី២៨ ខែវិច្ឆិកា ឆ្នាំ២០២២ បានអនុញ្ញាតិអោយ​ ឯកឧត្តម Fernando Gonzalez Llort ប្រធានវិទ្យាស្ថានមិត្តភាពជាមួយប្រជាជនគុយបា (ICAP) វីរបុរសនៃសាធារណរដ្ឋគុយបា និងជាសមាជិករដ្ឋសភាអំណាចប្រជាជននៃសាធារណរដ្ឋគុយបា បានចូលជួបសម្តែងការគួរសម និងពិភាក្សាការងារក្នុងពេលដែលឯកឧត្តមអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា។

ឯកឧត្តមកិត្តិសេដ្ឋាបណ្ឌិត ជាម យៀប បានមានប្រសាសន៍ថា​ តាងនាម​ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា និងឯកឧត្តមផ្ទាល់ សូមស្វាគមន៍យ៉ាងកក់ក្តៅ ជូនចំពោះ ឯកឧត្តម Fernando Gonzalez Llort ដែលបានអញ្ជើញចូលមកសំដែងការគួរសម និងពិភាក្សាការងារនាពេលនេះតាមរយៈ​ លោកជំទាវ និន សាផុន ប្រធានគណៈកម្មការទី៩ នៃរដ្ឋសភា និងជាប្រធានក្រុមមិត្តភាពរដ្ឋសភាកម្ពុជា- គុយបា ឯកឧត្តមសង្កេតឃើញថា​ ទំនាក់ទំនងមិត្តភាព សាមគ្គីភាព និងកិច្ចសហប្រតិបត្តិការមានការរីកចម្រើនជាលំដាប់ និងបន្ទាប់ពីមានដំណើរទស្សនកិច្ច ផ្លូវការ និងមិត្តភាពរបស់​ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ទៅប្រទេសគុយបា និងនាយករដ្ឋមន្ត្រីគុយបា​ មកកាន់ព្រះរាជាណាចក្រកម្ពុជា បានធ្វើអោយទំនាក់ទំនងកាន់តែមានភាពល្អប្រសើរថែមទៀត ហើយប្រទេសទាំងពីរ បានចុះអនុសារណៈយោគយល់គ្នាចំនួនបីផងដែរ។

ឯកឧត្តម Fernando Gonzalez Llort បានថ្លែងអំណរគុណផងដែរជូនចំពោះរដ្ឋសភាកម្ពុជា ដែលបានបោះឆ្នោតគាំទ្រប្រទេសគុយបាពីការហ៊ុំព័ន្ធសេដ្ឋកិច្ចរបស់សហរដ្ឋអាមេរិកមកលើប្រទេសគុយបា​ ដែលគូសបញ្ជាក់ពីចំណងមិត្តភាព កិច្ចសហប្រតិបត្តិការ រវាងប្រទេសទាំងពីរលើគ្រប់វិស័យអោយកាន់តែរឹងមាំ និងរីកចម្រើនទៅថ្ងៃអនាគត។​ ឯកឧត្តមក៏បានជម្រាបជូនពីប្រធានរដ្ឋសភាគុយបា​ និងថ្នាក់ដឹកនាំគុយបា បានផ្ញើការសាកសួរសុខទុក្ខតាមរយៈឯកឧត្តម ជូនថ្នាក់ដឹកនាំរដ្ឋសភា និងរាជរដ្ឋាភិបាលកម្ពុជា។

ឯកឧត្តម ស្នើអោយរដ្ឋសភានៃប្រទេសទាំងពីរផ្លាស់ប្តូរទស្សនៈកិច្ចគ្នាទៅវិញទៅមកបន្ថែមទៀត​ សំដៅពង្រឹងពង្រីកទំនាក់ទំនងទ្វេភាគី និងកិច្ចសហប្រតិបត្តិការលើគ្រប់វិស័យមានការវិវត្តន៍រីកចម្រើនឡើង​ ៕