លោកជំទាវ តឹករ៉េត កំរង អញ្ជើញបើកសិក្ខាសាលាផ្សព្វផ្សាយ របាយការណ៍សិក្សាស្រាវជ្រាវស្តីពី “ប្រព័ន្ធអេកូឡូស៊ីនៃវិនិយោគិន មូលធននៅក្នុងប្រទេសកម្ពុជា” នៃគម្រោងអភិវឌ្ឍន៍វិស័យពាណិជ្ជកម្ម តាមប្រព័ន្ធអេឡិចត្រូនិកនៅកម្ពុជា

ភ្នំពេញ៖ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម តំណាង ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៅថ្ងៃទី២៤ ខែវិច្ឆិកា ឆ្នាំ២០២២ បានអញ្ជើញជាអធិបតីភាពក្នុងពិធីបើកសិក្ខាសាលាផ្សព្វផ្សាយរបាយការណ៍សិក្សាស្រាវជ្រាវស្តីពី “ប្រព័ន្ធអេកូឡូស៊ីនៃវិនិយោគិនមូលធននៅក្នុងប្រទេសកម្ពុជា” គម្រោង Go4eCAM ដោយមានការចូលរួមដោយផ្ទាល់ពីថ្នាក់ដឹកនាំ មន្រ្តីរាជការ តំណាងដៃគូអភិវឌ្ឍន៍ វិស័យឯកជន និងតំណាងសហគ្រាសធុនតូច និងមធ្យមកម្ពុជា ប្រមាណជា ៩០នាក់។

សិក្ខាសាលានេះត្រូវបានរៀបចំឡើងក្នុងគោលបំណងផ្សព្វផ្សាយរបាយការណ៍នៃការសិក្សាអំពីទិដ្ឋភាពទូទៅនៃប្រព័ន្ធអេកូឡូស៊ីវិនិយោគិនមូលធននៅកម្ពុជា ក៏ដូចជាការចែករំលែកចំណេះដឹង និងបទពិសោធន៍ពាក់ព័ន្ធនឹងការវិនិយោគ ដើម្បីជួយឱ្យសហគ្រាសធុនតូចនិងមធ្យមកម្ពុជា អាចត្រៀមខ្លួនគ្រប់គ្រាន់ក្នុងការចាប់យកឱកាសក្នុងការទទួលបានហិរញ្ញប្បទានពីប្រភពទុនទាំងក្នុងស្រុក និងបរទេស ដើម្បីសហគ្រាសធុនតូចនិងមធ្យមកម្ពុជាមានសមត្ថភាពអាចនាំចេញផលិតផលខ្មែរទៅកាន់ទីផ្សារអន្តរជាតិ។

សមាសភាគនេះរបស់គម្រោង Go4eCAM គឺផ្តោតសំខាន់ទៅលើការនាំសហគ្រាសធុនតូចនិងមធ្យមកម្ពុជាជួបជាមួយនឹងវិនិយោគិនមូលធន ដើម្បីផ្តល់ឱកាសដល់សគ្រាសធុនតូចនិងមធ្យមកម្ពុជាស្វែងរកទុនបន្ថែមក្នុងការពង្រីកអាជីវកម្ម និងគាំទ្រដល់ការឈានឆ្ពោះទៅរកសេដ្ឋកិច្ចឌីជីថលតាមរយៈការផ្តោតលើពាណិជ្ជកម្មតាមប្រព័ន្ធអេឡិចត្រូនិក និងការច្នៃប្រឌិតបែបឌីជីថល។

ជាកិច្ចចាប់ផ្តើម លោកជំទាវរដ្ឋលេខាធិការ បានសម្តែងនូវគាវរកិច្ចស្វាគមន៍យ៉ាងកក់ក្តៅចំពោះវត្តមានថ្នាក់ដឹកនាំ មន្រ្តីរាជការ តំណាងដៃគូអភិវឌ្ឍន៍ និងវិស័យឯកជន និងតំណាងសហគ្រាសធុនតូច និងមធ្យមកមម្ពុជាក្រោមផ្សារពាណិជ្ជកម្មខេមបូឌាត្រេដទាំងអស់។

លោកជំទាវរដ្ឋលេខាធិការក៏បានលើកឡើងអំពីសារៈសំខាន់នៃការលើកកម្ពស់ចំណេះដឹងផ្នែកការវិនិយោគមូលធន និងការជួយគាំទ្រសហគ្រាសធុនតូចនិងមធ្យមកម្ពុជា ជាពិសេស ក្នុងវិស័យពាណិជ្ជកម្មតាមប្រព័ន្ធអេឡិចត្រូនិកក្នុងការទទួលបានហិរញ្ញប្បទាន ដែលជាសកម្មភាពការងារអាទិភាពមួយរបស់ក្រសួងពាណិជ្ជកម្ម ស្របតាមការចង្អុលបង្ហាញនៅក្នុង “យុទ្ធសាស្រ្តសមាហរណកម្មពាណិជ្ជកម្មកម្ពុជា ២០១៩-២០២៣” និង “យុទ្ធសាស្រ្តពាណិជ្ជកម្មតាមប្រព័ន្ធអេឡិចត្រូនិក”។

ឆ្លៀតក្នុងឱកាសនេះ លោកជំទាវរដ្ឋលេខាធិការ បានថ្លែងអំណរគុណយ៉ាងជ្រាលជ្រៅ ចំពោះកម្មវិធីពង្រឹងក្របខណ្ឌសមាហរណកម្ម (EIF) ដែលតែងតែគាំទ្រដល់ការអភិវឌ្ឍវិស័យពាណិជ្ជកម្មនៅកម្ពុជា និងភាគីពាក់ព័ន្ធទាំងអស់មកពីអន្តរក្រសួង វិស័យឯកជន និងដៃគូអភិវឌ្ឍន៍សម្រាប់ការចូលរួមក្នុងការគាំទ្រដល់សហគ្រាសធុនតូច និងមធ្យមកម្ពុជា ជាពិសេស ក្នុងវិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា។

លោកជំទាវរដ្ឋលេខាធិការ សូមលើកទឹកចិត្តឲ្យគ្រប់តួអង្គពាក់ព័ន្ធទាំងអស់ចូលរួមកសាង និងអភិវឌ្ឍន៍ប្រព័ន្ធអេកូឡូស៊ីនៃការវិនិយោគមូលធន ដែលមានសារៈសំខាន់ក្នុងការបង្កើនការទទួលបានហិរញ្ញវត្ថុសម្រាប់សហគ្រាសធុនតូច និងមធ្យមនៅកម្ពុជា ៕