ឯកឧត្តម សុខ ខាវ៉ាន់ ជួបពិភាក្សាការងារជាមួយ អនុប្រធានផ្នែកទំនាក់ទំនងជាមួយរដ្ឋាភិបាល របស់ក្រុមហ៊ុន Adidas Cambodia

ភ្នំពេញ៖ ឯកឧត្តម សុខ ខាវ៉ាន់ រដ្ឋលេខាធិការក្រសួងរ៉ែនិងថាមពល តំណាងឯកឧត្តម ស៊ុយ សែម រដ្ឋមន្ត្រីក្រសួងរ៉ែនិងថាមពល នាថ្ងៃទី៤ វិច្ឆិកា បានទទួលជួបសម្តែងការគួរសម និងពិភាក្សាការងារជាមួយ លោក Manuel Pauser អនុប្រធានផ្នែកទំនាក់ទំនងជាមួយរដ្ឋាភិបាល របស់ក្រុមហ៊ុនអាឌីដាស (Adidas) និង លោក Philip Mattner តំណាងក្រុមហ៊ុនអាឌីដាស កម្ពុជា។

នៅក្នុងជំនួបពិភាក្សានេះ លោក Manuel Pauser បានស្វែងយល់អំពីវឌ្ឍនភាពនៃការអភិវឌ្ឍវិស័យថាមពលនៅកម្ពុជា​។
ភាគីទាំងពីរបានជជែកពិភាក្សាអំពីសក្តានុពល និងឱកាសដើម្បីពង្រឹងកិច្ចសហប្រតិបត្តិការ​ ក៏ដូចជាការបន្តចូលរួមចំណែកក្នុងការអភិវឌ្ឍហេដ្ឋារចនាសម្ព័ន្ធវិស័យថាមពល ជាពិសេសការប្រើប្រាស់ថាមពលប្រកបដោយចីរភាព និងប្រសិទ្ធភាពថាមពលខ្ពស់ស្របតាមគោលនយោបាយជាតិស្ដីពី ប្រសិទ្ធភាពថាមពល ឆ្នាំ២០២២-២០៣០។ ជាមួយគ្នានេះដែរ​ ខាងក្រុមហ៊ុនអាឌីដាស​ បានកោតសរសើរអំពីការវិវត្តន៍ដ៏ល្អមួយនៅកម្ពុជា ដែលមានការប្រើប្រាស់នូវថាមពលកកើតឡើងវិញប្រមាណជា៥១% ដែលជាចំនួនខ្ពស់មួយគួរឱ្យកត់សម្គាល់។

លោក Manuel Pauser ក៏បានសម្តែងនូវការកោតសរសើរដល់ការដឹកនាំរបស់រាជរដ្ឋាភិបាលកម្ពុជា លើការអភិវឌ្ឍថាមពលកកើតឡើងវិញ ដែលមានពីវារីអគ្គិសនី និងថាមពលដើរដោយពន្លឺព្រះអាទិត្យ។

ថ្លែងក្នុងឱកាសនោះផងដែរ ក្រុមហ៊ុនក៏មានបំណងចង់វិនិយោគទៅលើគម្រោងថាមពលកកើតឡើងវិញនៅកម្ពុជាសម្រាប់សង្វាក់ផលិតកម្ម ដើម្បីក្រុមហ៊ុនអាចអនុវត្តកាតព្វកិច្ចរបស់ក្រុមហ៊ុន និងសហគមន៍អឺរ៉ុបក្នុងការកាត់បន្ថយឧស្ម័នកាបូនិច (CO2) ៕