លោក ពូទីន ជំរុញឱ្យមានវិធានការសេដ្ឋកិច្ច ដើម្បីទប់ស្កាត់ទណ្ឌកម្ម
ម៉ូស្គូ៖ ទីភ្នាក់ងារចិនស៊ិនហួ ចេញផ្សាយនៅថ្ងៃព្រហស្បតិ៍ ទី០៦ ខែតុលានេះ បានឲ្យដឹងថា ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃព្រហស្បតិ៍នេះ បានទាមទារវិធានការសេដ្ឋកិច្ច ដើម្បីឆ្លើយតបទៅនឹងទណ្ឌកម្មរបស់លោកខាងលិច ដែលត្រូវបានគេរំពឹងថា នឹងកើនឡើងកាន់តែខ្លាំង។
លោកពូទីនបានអោយដឹងនៅឯកិច្ចប្រជុំរដ្ឋាភិបាលស្តីពីបញ្ហាសេដ្ឋកិច្ចតាមរយៈខ្សែវីដេអូថា “វាមានសារៈសំខាន់ណាស់ក្នុងការយល់ថាសម្ពាធទណ្ឌកម្មលើប្រទេសរុស្ស៊ីនឹងកើនឡើង” ។
លោកបានមានប្រសាសន៍ថា “ក្នុងន័យនេះ ចាំបាច់ត្រូវរៀបចំផែនការសកម្មភាពប្រកបដោយភាពបត់បែន និងមានប្រសិទ្ធភាពសម្រាប់ទាំងរយៈពេលខ្លី និងមធ្យម និងអនុវត្តឱ្យជាប់លាប់។
លោកពូទីនបានស្នើឱ្យរដ្ឋាភិបាល និងធនាគារកណ្តាលធានាឱ្យមានការងើបឡើងវិញប្រកបដោយនិរន្តរភាពនៃសូចនាករម៉ាក្រូសេដ្ឋកិច្ច។
លោកបានកត់សម្គាល់ថា វិស័យដែលផ្តោតលើការនាំចេញនៅតែស្ថិតក្រោមសម្ពាធ ជាចម្បងដែលផ្តោតលើប្រទេសអ៊ឺរ៉ុប ហើយវាត្រូវការពេលវេលាសម្រាប់អ្នកនាំចេញរបស់រុស្ស៊ីដើម្បីប្តូរទៅកាន់ទីផ្សារផ្សេងទៀត។
ទន្ទឹមនឹងនេះដែរ លោកពូទីនបានចង្អុលបង្ហាញពីនិន្នាការវិជ្ជមានមួយចំនួន ដោយសារតែផលិតកម្មឧស្សាហកម្មបានត្រឡប់ទៅកម្រិតនៃឆ្នាំមុន។
លោកបន្តថា ឧស្សាហកម្មដែលរងគ្រោះខ្លាំងបំផុតដូចជាឧស្សាហកម្មរថយន្ត និងលោហធាតុកំពុងងើបឡើងវិញជាបណ្តើរៗ ហើយវិស័យកសិកម្មក៏បង្ហាញពីសក្ដានុពលល្អផងដែរ។
