លោកជំទាវ ម៉ុម ថានី អញ្ជើញសំណេះសំណាលជាមួយមន្រ្តីចូលនិវត្តន៍ ប៉ូលីស សន្តិសុខ អ្នកអនាម័យ និងអ្នកថែសួន
ភ្នំពេញ៖ គណៈកម្មការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងបរិស្ថាន សហការជាមួយសហភាពសហព័ន្ធយុវជនកម្ពុជាវិស័យបរិស្ថាន បានរៀបចំកម្មវិធីសំណេះសំណាលជាមួយមន្រ្តីចូលនិវត្តន៍ ប៉ូលីស សន្តិសុខ អ្នកអនាម័យ និងអ្នកថែសួន ក្រោមអធិបតីភាពលោកជំទាវ ម៉ុម ថានី រដ្ឋលេខាធិការ និងជាប្រធានគណៈកម្មការសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ក្រសួងបរិស្ថាន ។
ពិធីខាងលើនេះធ្វើឡើងនៅថ្ងៃទី២១ ខែកញ្ញា ឆ្នាំ២០២២ នៅទីស្ដីការក្រសួងបរិស្ថាន ដោយមានការចូលរួមពីលោកជំទាវ ព្រំ សុភី អនុរដ្ឋលេខាធិការ លោក ដាញ់ សេរី ប្រធាននាយកដ្ឋាន វាយតម្លៃហេតុប៉ះពាល់បរិស្ថាន និងជាប្រធានសហភាពសហព័ន្ធយុវជនកម្ពុជា លោក លោកស្រី អនុប្រធាន សមាជិកាក្រុមការងារ និងយុវជនសហភាពសហព័ន្ធយុវជនកម្ពុជាវិស័យបរិស្ថាន ក្នុងកម្មវិធីសំណេះសំណាលជាមួយមន្ត្រីចូលនិវត្តន៍ ប៉ូលីស សន្តិសុខ អ្នកអនាម័យ និងអ្នកថែសួនដែលមានជីវភាពខ្វះខាត ចំនួន ៣៦នាក់។
លោកជំទាវរដ្ឋលេខាធិការ មានមតិស្វាគមន៍ និងបាននាំយកនូវការសួរសុខទុក្ខ និងពីសំណាក់ ឯកឧត្តមរដ្ឋមន្រ្តី និងលោកជំទាវ បានជម្រាបជូនក្នុងកម្មវិធីផងដែរ នូវការគិតគូ និងយកចិត្តទុកដាក់ពីសុខទុក្ខ សុខមាលភាព ជីវភាពរស់នៅ និងឱកាសការងារសម្រាប់មន្រ្តីរាជការដែលជួបការខ្វះខាត ដែលបានឆ្លើយតប ទៅនឹងគោលនយោបាយកិច្ចគាំពារមន្រ្តីរាជការរបស់ក្រសួងបរិស្ថាន។
ទន្ទឹមនឹងនេះ លោកជំទាវក៏បានផ្តាំផ្ញើដល់ សន្តិសុខ ប៉ូលីស និងអ្នកអនាម័យ ត្រូវយកចិត្តទុកដាក់ថែរក្សាសុខភាពរបស់ខ្លួន និងក្រុមគ្រួសារ ក្នុងពេលជួបវិបត្តិនៃការ ឆ្លងរីករាលដាលជំងឺកូវីដ១៩ ដោយអនុវត្តវិធានការសុខាភិបាល «៣កុំ ៣ការពារ» ឱ្យបានខ្ជាប់ខ្ជួនឱ្យបានគ្រប់ៗគ្នា។
ឆ្លៀតក្នុងឱកាសនេះដែរ តាងនាមឯកឧត្ដមរដ្ឋមន្ត្រី លោកជំទាវរដ្ឋលេខាធិការ បាននាំយកនូវសម្ភារឧបភោគរបស់ ឯកឧត្ដមរដ្ឋមន្ត្រី ដើម្បីចែកជូន សន្តិសុខ ប៉ូលីស និងអ្នកអនាម័យចំនួន ៣៦នាក់ រួមមាន៖ ត្រីខចំនួន ១យួរ មីចំនួន១កេស និងភេសជ្ជៈ (ទឹកសុទ្ធ១កេស និងទឹកក្រូច១កេស) និងថវិកាក្នុងមួយនាក់ទទួលបានចំនួន ២០០ ០០០រៀល (ម្ភៃម៉ឺនរៀលគត់)៕
