មេបញ្ជាការ កងការពារព្រំដែនលេខ៥០៣ អញ្ជើញគោរពវិញ្ញាណក្ខន្ធសពយោធិន និងនាំថវិកាមិត្តរួមអាវុធប្រគល់ជូនគ្រួសារសព
ភ្នំពេញ៖ លោកឧត្តមសេនីយ៍ត្រី ឃួន ជឿន មេបញ្ជាការកងការពារព្រំដែនលេខ៥០៣ តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ នាថ្ងៃទី២២ ខែសីហា ឆ្នាំ២០២២ បានអញ្ជើញគោរពវិញ្ញាណក្ខន្ធសពលោកពលបាលត្រី សាន សុខខេង បុគ្គលិកពេទ្យ កងអនុសេនាធំល្បាតទី១ កងការពារព្រំដែនលេខ៥០៣ ដែលបានទទួលមរណភាពពីថ្ងៃទី២២ ខែសីហា ឆ្នាំ២០២២ ដោយរោគាពាធ។
លោកឧត្តមសេនីយ៍ត្រី ឃួន ជឿន ក៏បានបំពាក់ឋានន្តរស័ក្តិថ្នាក់ ពលបាលទោ ជូនសពជាកិច្ចបច្ឆាមរណៈ បន្ទាប់មកថ្នាក់ដឹកនាំ និងប្រតិភូទាំងអស់បានសំណេះសំណាលចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារ នៃសព និងបានប្រគល់ថវិកាមិត្តជួយមិត្តយោធភូមិភាគទី៥ ចំនួន ៤.០០០.០០០រៀល និងថវិកាមិត្តរួមអាវុធ ១.៤០០.០០០រៀល
លោកឧត្តមសេនីយ៍ត្រី តឹក ប៊ុនធឿ មេបញ្ជាការរងទិសទី១ បន្ទាយមានជ័យ និងជាប្រធានក្រុមទី៤ ចាក់វ៉ាក់សាំង ចូលរួមថវិកាបុណ្យសពចំនួន ១.០០០.០០០រៀល
សរុបថវិកាចំនួន ៦.៤០០.០០០រៀល ដល់គ្រួសារសពក្នុងពិធីបុណ្យនោះផងដែរ។
លោកឧត្តមសេនីយ៍ត្រី ឃួន ជឿន មេបញ្ជាការ កងការពារព្រំដែនលេខ៥០៣ បានចូលរួមរំលែកទុក្ខ និងមានប្រសាសន៍ថា មរណៈភាពរបស់លោក សាន សុខខេង គឺជាការបាត់បង់មិត្តរួមអាវុធ មិត្តរួមការងារ និងជាការបាត់បង់មនុស្សដ៏សំខាន់ដែលគួរឱ្យគោរពស្រឡាញ់ទាំងក្នុងអង្គភាព និងក្នុងក្រុមគ្រួសារដែលយើងទាំងអស់គ្នាមិនអាច និងរកពាក្យអ្វីមកថ្លែងស្មើ នៃទំហំសេចក្ដីសោកស្ដាយ អាឡោះអាល័យនេះបានឡើយ ៕
