ពិព័រណ៍ផលិតផលប្រើប្រាស់អន្តរជាតិចិន និងយុទ្ធសាស្ត្របើកចំហកម្រិតខ្ពស់របស់ចិន ក្នុងបរិបទនៃភាពមិនច្បាស់លាស់សកល
មិនថាសេដ្ឋកិច្ចសកលប្រឈមមុខនឹងការកើនឡើងនៃភាពមិនប្រាកដប្រជា ភាពតានតឹងនៃភូមិសាស្ត្រនយោបាយ និងនិន្នាការគាំពារនិយមខ្លាំងយ៉ាងណាក៏ដោយ ប្រទេសចិននៅតែបន្តប្រកាន់ខ្ជាប់យ៉ាងរឹងមាំចំពោះពហុភាគីនិយម សេរីភាវូបនីយកម្ម និងការបើកចំហកម្រិតខ្ពស់។ សម្រាប់ចិន ការបើកចំហកម្រិតខ្ពស់ មិនមែនគ្រាន់តែជាវោហារសាស្ត្រនយោបាយទេ ប៉ុន្តែជាគោលនយោបាយយុទ្ធសាស្ត្រដែលត្រូវបានអនុវត្តតាមរយៈយន្តការជាក់ស្តែងជាបន្តបន្ទាប់។
អនុលោមទៅតាមស្មារតីនៃផែនការប្រាំឆ្នាំ ទី១៤ (២០២០-២០២៥) និងផែនការប្រាំឆ្នាំ ទី១៥ (២០២៦-២០៣០) ការបើកចំហកម្រិតខ្ពស់បានក្លាយទៅជាគោលនយោបាយស្នូល ក្នុងការជំរុញកំណើន និងការតភ្ជាប់សេដ្ឋកិច្ចអន្តរជាតិ។ តួយ៉ាង ការរៀបចំពិព័រណ៍ផលិតផលប្រើប្រាស់អន្តរជាតិចិនលើកទី៦ (China International Consumer Product Expo – CICPE) ដែលប្រព្រឹត្តទៅនៅថ្ងៃទី១៣-១៨ ខែមេសា ឆ្នាំ២០២៦ នៅកោះហៃណានខាងមុខនេះ គឺជាការបោះជំហានទៅមុខមួយទៀតរបស់រដ្ឋាភិបាលចិន ក្នុងការជំរុញគោលនយោបាយបើកចំហកម្រិតខ្ពស់ឱ្យចេញជាលទ្ធផលជាក់ស្តែង។
ចាប់តាំងពីការបង្កើតឡើងដំបូងក្នុងឆ្នាំ២០២១ មក CICPE មិនត្រឹមតែដើរតួនាទីជាវេទិកាតាំងបង្ហាញផលិតផលទេ ប៉ុន្តែវាបានចូលរួមចំណែកយ៉ាងសំខាន់ក្នុងការតភ្ជាប់សហគ្រាសអន្តរជាតិទៅកាន់ទីផ្សារក្នុងស្រុកចិន ជំរុញភាពជាដៃគូអន្តរជាតិ និងធ្វើឱ្យស៊ីជម្រៅនូវការបើកចំហកម្រិតខ្ពស់ ដើម្បីផលប្រយោជន៍រួម និងកំណើនប្រកបដោយបរិយាបន្ន។
ភាពជោគជ័យរបស់ CICPE កន្លងមក ដែលទាក់ទាញសហគ្រាសជាង ៣,៨០០ និងម៉ាកយីហោជាង ១២,០០០ មកពី ៩២ ប្រទេស និងតំបន់ គឺជាសក្ខីភាពនៃទំនុកចិត្តរបស់ធុរៈជនអន្តរជាតិចំពោះភាពធន់និងសក្តានុពលនៃទីផ្សារចិន។ យោងតាមការព្យាករណ៍របស់ក្រសួងពាណិជ្ជកម្មចិន ការនាំចូលទំនិញ និងសេវាកម្មរបស់ប្រទេសចិន នឹងមានទំហំលើសពី ១៥ ទ្រីលានដុល្លារអាម៉េរិក ក្នុងរយៈពេល ៥ ឆ្នាំខាងមុខនេះ។ ការណ៍នេះបានបង្ហាញយ៉ាងច្បាស់ថា ការកើនឡើងនៃតម្រូវការប្រើប្រាស់ក្នុងស្រុកចិន នឹងនាំមកនូវបង្កើតកាលានុវត្តភាពថ្មីៗសម្រាប់អ្នកនាំចេញអន្តរជាតិ ជាពិសេសសម្រាប់ប្រទេសកំពុងអភិវឌ្ឍន៍។
អ្វីដែលធ្វើឱ្យ CICPE លើកទី៦ មានលក្ខណៈពិសេស និងមានទម្ងន់យុទ្ធសាស្ត្រជាងព្រឹត្តិការណ៍មុនៗ គឺការផ្សារភ្ជាប់យ៉ាងស៊ីជម្រៅជាមួយ “កំពង់ផែពាណិជ្ជកម្មសេរីហៃណាន” ដែលបានចាប់ផ្តើមអនុវត្ត ប្រតិបត្តិការពន្ធគយឯករាជ្យពេញលេញ កាលពីចុងឆ្នាំ២០២៥។ ក្រោមក្របខណ្ឌថ្មីនេះ សហគ្រាសអន្តរជាតិនឹងទទួលបានបរិយាកាសអាជីវកម្មដែលកាន់តែអំណោយផលជាងមុន ជាពិសេសការកាត់បន្ថយថ្លៃដើមពាណិជ្ជកម្មតាមរយៈការលុបរបាំងពន្ធគយ ដើម្បីនាំចេញផលិតផលទៅកាន់ទីផ្សារចិន។
តាមរយៈយុទ្ធសាស្ត្រខ្សែក្រវាត់ និងផ្លូវ និងការតភ្ជាប់ CICPE ជាមួយទីផ្សារក្នុងស្រុក ប្រទេសចិនដែលជាសេដ្ឋកិច្ចធំទីពីររបស់ពិភពលោក និងរួមចំណែកប្រមាណ ៣០% នៃកំណើនសកល នឹងបន្តដើរតួនាទីជាកម្លាំងចលករមិនអាចខ្វះបាន ក្នុងការជំរុញកំណើនប្រកបដោយចីរភាព បរិយាបន្ន និងភាពធន់ ព្រមទាំងបង្កើតវិបុលភាពរួមសម្រាប់តំបន់ និងសកលលោកទាំងមូល។
សរុបមក ការរៀបចំ CICPE លើកទី៦ គឺជាការផ្ញើសារយ៉ាងច្បាស់ទៅកាន់សហគមន៍អន្តរជាតិថា ទោះបីជាស្ថានភាពពិភពលោកមានការផ្លាស់ប្តូរឆាប់រហ័សយ៉ាងណាក៏ដោយ ទ្វារនៃការបើកចំហកម្រិតខ្ពស់របស់ចិននឹងមិនបិទឡើយ ប៉ុន្តែនឹងបើកកាន់តែធំជាងមុន។ ការរៀបចំជាទៀងទាត់នូវ CICPE នឹងក្លាយទៅជាកាតាលីករសម្រាប់ការពង្រឹងពហុភាគីនិយម ការបើកចំហកម្រិតខ្ពស់ និងការកសាងសហគមន៍វាសនារួមសម្រាប់មនុស្សជាតិ ដើម្បីវិបុលភាព និងការអភិវឌ្ឍប្រកបដោយចីរភាពសម្រាប់តំបន់ និងពិភពលោកទាំងមូល។
ដោយលោក ហ៊ូ ចំរើន
អ្នកស្រាវជ្រាវនៃមជ្ឈមណ្ឌលអភិវឌ្ឍន៍កម្ពុជា
