សាខាកាកបាទក្រហមកម្ពុជាខេត្តបាត់ដំបង រៀបចំកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅអនុវត្តបន្ត

បាត់ដំបង៖ នៅរសៀលថ្ងៃទី២៣ ខែមីនា ឆ្នាំ២០២៦ សាខាកាកបាតក្រហមកម្ពុជាខេត្តបាត់ដំបងបានរៀបចំកិច្ចប្រជុំបូកសរុបលទ្ធផលការងារប្រចាំឆ្នាំ២០២៥ និងលើកទិសដៅអនុវត្តបន្តក្រោមអធិបតីភាព ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី អនុប្រធានអចិន្ដ្រៃយ៍ អនុប្រធាន ហេរញ្ញិគណៈកម្មាធិការសាខា សមាជិក សមាជិកា គណៈកម្មាធិការសាខា អនុសាខាក្រុងស្រុកទាំង១៤ និងក្រុមប្រតិបត្តិសាខាសរុបចំនួន៣៦រូបស្រី៦នាក់ កិច្ចប្រជុំនេះប្រារព្វធ្វើនៅសាលប្រជុំសាខាកាកបាតក្រហមកម្ពុជា ខេត្តបាត់ដំបង។

កិច្ចប្រជុំនេះបានផ្ដោតនូវរបៀបវរៈសំខាន់ៗមួយចំនួនដូចខាងក្រោម៖
១- ឆ្លង និងអនុម័តរបាយការណ៍សរុបលទ្ធផលសកម្មភាពសាខាឆ្នាំ២០២៥និងទិសដៅសម្រាប់ឆ្នាំ២០២៦ អានដោយ ឯកឧត្តម ផេង សិទ្ធី អនុប្រធានអចិន្រ្តៃយ៍គណៈកម្មាធិការសាខា ។
២- ឆ្លងនិងអនុម័តរបាយការណ៍ថវិកាឆ្នាំ២០២៥ និងផែនការថវិកាឆ្នាំ២០២៦អានដោយ លោក សុវណ្ណ វិទិត្យា ហេរញ្ញឹកគណៈកម្មាធិការសាខា
៣-កិច្ចពិភាក្សាសេចក្តីព្រាង សេចក្តីសម្រេចស្តីពីដំណើប្រព្រឹត្តិទៅរបស់សាខាអាណត្តិទី៦ ២០២៥-២០៣០
៤-ពិភាក្សាការងារត្រៀមរៀបចំប្រារព្វទិវាពិភពលោក កាកបាទក្រហម និងអឌ្ឍចន្ទក្រហម ៨ឧសភា ឆ្នាំ២០២៦
និង៥-ការងារផ្សេងៗ…។

លោក ផេង សិទ្ធី អនុប្រធានអចិន្រ្តៃយ៍ បានលើកឡើងថាដោយមានការយកចិត្តទុក ដាក់ពី សំណាក់ ឯកឧត្តម សុខ ផល ប្រធានកិត្តិយសសាខា ឯកឧត្តម សុខ លូ ប្រធានគណៈកម្មាធិការសាខាជាពិសេសសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជានៅឆ្នាំ ២០២៥ នេះសាខាកាកបាទ ក្រហមកម្ពុជាខេត្តបាត់ដំបងសម្រេចបានក្នុងវិស័យស្នូលទាំង៤ ក្នុងនោះរួមមានទី១.ការងារគ្រប់គ្រងគ្រោះមហន្តរាយ ទី ២.ការងារសុខភាព និងការថែទាំសុខភាពក្នុងសហគមន៍ ទី ៣.ការងារលើកកម្ពស់ គោលការណ៍គ្រឹះនិងតម្លៃមនុស្សធម៌ និងទី៤ ការអភិវឌ្ឍស្ថាប័ននិងអភិវឌ្ឍន៍ធនធាននិងឈរលើគោលកាណ៍គ្រឹះទាំង៧របស់ចលនាកាកបាទក្រហម អឌ្ឍចន្ទក្រហម ដោយមិនទុកឲ្យប្រជាពលរដ្ឋណាម្នាក់រងទុក្ខដោយមិនមានការជួយជ្រោមជ្រែងពីអាជ្ញាធរ និងថ្នាក់ដឹកនាំសាខាខេត្ត អនុសាខាក្រុងស្រុកឡើយ។ ជាក់ស្តែងក្នុងឆ្នាំ២០២៥កន្លងទៅនេះសាខាខេត្តបាត់ដំបង អនុសាខាក្រុងស្រុកទាំង១៤ បានផ្តល់អំណោយមនុស្សធម៌សរុបបានចំនួន២១០លើកគ្រួសារ មានអ្នកទទួលផលចំនួន២,៩៦២ គ្រួសារ មនុស្សរាយចំនួន៨,៦៧៨នាក់/ស្រី៤,៥៣៨នាក់ ក្នុងក្រុងស្រុកទាំង១៤ នៃខេត្តបាត់ដំបងក្នុងនោះអំណោយ៖កាកបាទក្រហមកម្ពុជាថ្នាក់កណ្តាលចំនួន ១២៦គ្រួសារ ,អំណោយសាខាខេត្តផ្ទាល់ ចំនួន២,២៤៤គ្រួសារបានប្រគល់ផ្ទះមនុស្សធម៌ ចំនួន ៥ខ្នង គ្រួសារ គ្រួសារជនមានពិការ ចំនួន៨៨០គ្រួសារ និង,អំណោយរបស់អនុសាខាក្រុង/ស្រុកផ្ទាល់ចំនួន៦០៧គ្រួសារ។

ឯកឧត្តមប្រធានគណៈកម្មាធិការសាខាកាកបាទក្រហមកម្ពុជាខេត្ត ក៏បានថ្លែងនូវការកោតសរសើរនិងបានវាយតម្លៃខ្ពស់ចំពោះគណៈកម្មាធិការសាខានិងមន្ត្រីក្រុមប្រតិបត្តិសាខា និងអនុសាខាដែលបានខិតខំ បំពេញភារកិច្ចយ៉ាងសកម្មក្នុងកិច្ចការមនុស្សធម៎របស់ខ្លួន ក្នុងការជំរុញសកម្មភាពធ្វើឲ្យសម្រេចបាននូវលទ្ធផល គួរឱ្យកត់សំគាល់ ជាពិសេសប្រជាពលរដ្ឋដែលបានរងគ្រោះដោយជំលោះព្រំដែន និងភៀសសឹកមកកាន់មណ្ឌលសុវត្ថិភាព។

ឯកឧត្តមក៏បានណែនាំនិងជម្រុញអំពីវិធានការចាំបាច់មួយចំនួន ដោយត្រូវត្រួតពិនិត្យ និងត្រៀមគ្រប់លទ្ធភាព ទាំងកម្លាំងមធ្យោបាយ ថវិកានិងសម្ភារៈក្នុងការចុះជួយអន្តរាគមន៍ឆ្លើយតបឲ្យបានទាន់ពេលវេលា ដល់ជនដែលងាយរងគ្រោះក្នុងខណៈពេលមានគ្រោះអាសន្នកើតឡើងនិងគ្រោះមហន្តរាយផ្សេងៗដែលបានកើតឡើងភ្លាមៗ ដោយមិនត្រូវទុកឱ្យមានការរ៉ាំរ៉ៃយូរឡើយ។

ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជាខេត្ត ក៏បានសំណូមពរនិងបានដាស់តឿនដោយក្រើនរំឭក ដល់មន្រី្តប្រតិបត្តិសាខា និងអនុសាខាទាំងអស់ ត្រូវបន្តខិតខំនិងលះបង់នូវស្មារតីក្នុងការចូលរួមបន្តអនុវត្តគ្រប់សកម្មភាពមនុស្សធម៌លើការងារវិស័យស្នូលទាំង៤របស់កាកបាទក្រហមកម្ពុជាក្រោមការដឹកនាំដ៏ឈ្លាសវៃ របស់ សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុនសែន ឲ្យបានកាន់តែល្អប្រសើរនិងសកម្មផុលផុសក្នុងការប្រមូលផ្តុំកម្លាំងមនុស្សធម៌ ដើម្បីចូលរួមលើកកម្ពស់ជីវភាពរបស់ជនងាយរងគ្រោះបំផុតនិងជនរងគ្រោះ តាមរយៈនៃវិស័យអាទិភាពចំនួន៤ រួមមាន៖១-ការគ្រប់គ្រងគ្រោះមហន្តរាយ វិបត្តិភ័យនិងការប្រែប្រួលអាកាសធាតុ។ ២-សុខភាព និងការថែទាំសុខភាពនៅក្នុងសហគមន៍។ ៣-ការលើកកម្ពស់គោលការណ៍គ្រឹះ និងតម្លៃមនុស្សធម៌។និង៤-ការអភិវឌ្ឍស្ថាប័ន។បន្ថែមពីនេះផងដែរ ត្រូវបន្តជួយដល់ជនរងគ្រោះដោយប្រការផ្សេងៗ និងជនងាយរងគ្រោះនៅតាមមូលដ្ឋានរបស់ខ្លួននីមួយៗ ដូចជា៖អ្នកផ្ទុកមេរោគអេដស៍ចាស់ជរាគ្មានទីពឹងកុមារកំព្រា និងបន្តពិនិត្យក្នុងការធ្វើផ្ទះជូនជនទីទ័លក្រជាដើម…។
កិច្ចប្រជុំក៏បានដាក់ទិសដៅបន្ត ជំរុញការងារអភិវឌ្ឍន៍សាខា និងអនុសាខាដែលក្នុងនោះគឺសកម្មភាពការគ្រប់គ្រង និងអភិវឌ្ឍន៍ធនធានមនុស្ស និងការងាររដ្ឋបាលនិងហិរញ្ញកិច្ច ទំនាក់ទំនងនិងកិច្ចសហប្រតិបត្តិការ និងការពិនិត្យតាមដានវាយតម្លៃ របាយការណ៍ របស់អនុសាខា ដោយមានផែនការសកម្មភាពមួយជាក់លាក់ ជាពិសេសក្នុងឱកាសខួបលើកទី១៦៣ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៦ ក្រោមមូលបទ «បន្តរួមកម្លាំងគ្នា ដើម្បីមនុស្សធម៌»។ សាខា អនុសាខាក្រុងស្រុកទាំងអស់ត្រូវ ខិតខំរួមគ្នាគៀងគររកសប្បុរសជន មានព្រះសង្ឃ សម្តេច ឯកឧត្តម លោកជំទាវ លោកឧកញ៉ា សប្បុរជនគ្រប់មជ្ឈដ្ឋានដើម្បីជួយឧបត្ថម្ភគាំទ្រដល់សាខាកាកបាទក្រហមខេត្តជាថវិកាក្តី ជាសម្ភារៈក្តី ក្នុងការជួយសង្គ្រោះបងប្អូនប្រជាពលរដ្ឋដែលទទួលរងគ្រោះដោយគ្រោះធម្មជាតិ និងខ្វះខាតនៅមូលដ្ឋានជាបន្តទៀត។

ជាកិច្ចបញ្ចប់កិច្ចប្រជុំឯកឧត្តមប្រធានគណៈកម្មាធិការសាខាបាន ថ្លែងអំណរគុណដល់អនុសាខាក្រុងស្រុកទាំង១៤ ដែលបានខិតខំបំពេញការងារក្នុងការងារឆ្លើយតបសកម្មភាពមនុស្សធម៌ នៅតាមមូលដ្ឋានរបស់ខ្លួន ស្របតាមទិសស្លោក កាកបាទក្រហមកម្ពុជា មានគ្រប់ទីកន្លែងសម្រាប់គ្រប់ៗគ្នា៕