អគ្គលេខាធិការដ្ឋានរដ្ឋសភា ត្រៀមបង្កើតអង្គភាពស្រាវជ្រាវ និងបណ្តុះបណ្តាលសភា ដើម្បីលើកកម្ពស់ប្រសិទ្ធភាពការងារគណៈកម្មការ
ភ្នំពេញ៖ ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរង និងជាប្រធានក្រុមទីប្រឹក្សារដ្ឋសភា បានដឹកនាំកិច្ចប្រជុំពិភាក្សា ស្តីពីការបង្កើត «អង្គភាពស្រាវជ្រាវ និងបណ្តុះបណ្តាលសភា» ក្នុងគោលបំណងពង្រឹងប្រសិទ្ធភាពការងាររបស់គណៈកម្មការជំនាញនានា នៅវិមានរដ្ឋសភា។
ក្នុងឱកាសនោះ ឯកឧត្តមបណ្ឌិត ឈាង វណ្ណារិទ្ធ បានមានប្រសាសន៍ថា កិច្ចប្រជុំនេះផ្តោតលើការពិនិត្យ និងកែសម្រួលរចនាសម្ព័ន្ធអគ្គនាយកដ្ឋាននីតិកម្ម និងស្រាវជ្រាវ នៃអគ្គលេខាធិការដ្ឋានរដ្ឋសភា ដើម្បីបង្កើតអង្គភាពថ្មីមួយ ដែលអាចពង្រឹងសមត្ថភាពស្រាវជ្រាវ គាំទ្រការងារគណៈកម្មការ និងអភិវឌ្ឍធនធានមនុស្សឱ្យកាន់តែមានប្រសិទ្ធភាពខ្ពស់។
អង្គភាពថ្មីនេះ គ្រោងនឹងគ្រប់គ្រងនាយកដ្ឋានចំនួន ៣ រួមមាន៖ (១) នាយកដ្ឋានស្រាវជ្រាវច្បាប់ (២) នាយកដ្ឋានស្រាវជ្រាវទូទៅ និង (៣) នាយកដ្ឋានផែនការ និងបណ្តុះបណ្តាល។ អង្គភាពនឹងមានភារកិច្ចស្រាវជ្រាវ និងរៀបចំឯកសារសំខាន់ៗ ដើម្បីគាំទ្រការងាររបស់គណៈកម្មការជំនាញទាំង ១០ នៃរដ្ឋសភា ព្រមទាំងអគ្គលេខាធិការដ្ឋានរដ្ឋសភា ដើម្បីបម្រើប្រយោជន៍សាធារណៈ និងការអភិវឌ្ឍប្រទេសជាតិឱ្យមានការរីកចម្រើនថែមទៀត។
ជាមួយគ្នានេះផងដែរ ឯកឧត្តមអគ្គលេខាធិការរង បានណែនាំឱ្យរៀបចំកិច្ចប្រជុំត្រួតពិនិត្យការងារជាប្រចាំ ដើម្បីធានាថាការអនុវត្តភារកិច្ចទទួលបានលទ្ធផលប្រកបដោយប្រសិទ្ធភាព និងប្រសិទ្ធផលជាក់ស្តែង៕
