កែប: គម្រោងវិនិយោគសាងសង់មជ្ឈមណ្ឌលកម្សាន្តខ្សែរ៉តឆ្លងសមុទ្រដំបូងគេ និងវែងជាងគេនៅកម្ពុជា ចាប់ផ្តើមសាងសង់ហើយនៅខេត្តកែប ដោយខ្សែរ៉តភ្ជាប់បីកំពូលឧទានជាតិខេត្តកែប មកទីតាំងអតីតព្រះរាជដំណាក់ស្តេច ដោយគ្រោងចំណាយទុនប្រមាណ ២លានដុល្លារ ដែលនឹងអាចទាក់ទាញទេសចរ មកសម្រាកលំហែនៅខេត្តកែប ឲ្យបានកាន់តែច្រើន។
លោក ហេង តារា ម្ចាស់គម្រោងវិនិយោគសាងសង់មជ្ឍមណ្ឌលកម្សាន្តខេត្តកែប បានប្រាប់ឲ្យដឹងថា ដោយមើលឃើញអំពីសក្តានុពលតំបន់ទេសចរណ៍ខេត្តកែបស្រស់ស្អាត ហើយកែបនៅមិនទាន់មានល្បែងកម្សាន្តសម្រាប់ទេសចរផងនោះ លោកបានសម្រេចចិត្តបោះទុនវិយោគបង្កើតមជ្ឍមណ្ឌលកម្សាន្តខ្សែរ៉តឆ្លងសមុទ្រដំបូងគេ និងវែងជាងគេនៅខេត្តកែបនេះឡើង។
លោកបានបន្តថា ដើម្បីទាកទាញទេសចរឲ្យមកស្នាក់នៅខេត្តកែប យ៉ាងហើចមួយយប់ ក្នុងគម្រោងរបស់លោកត្រូវច្នៃបង្កើត ជាកន្លែងកម្សាន្តផ្សេងៗជាច្រើនទៀត។
ឯកឧត្តម សោម ពិសិដ្ឋ អភិបាលខេត្តកែប បានបញ្ជាក់ថា រដ្ឋបាលបានខិតខំអភិវឌ្ឍខេត្តកែប សម្រេចបានសមទ្ធិផលយ៉ាងច្រើន បើទោះជាស្ថិតនៅក្នុងដំណាក់កាលកូវីដ១៩ក៏ដោយ ហើយជាក់ស្តែងគម្រោងខ្សែរ៉កនេះ គឺទស្សនវិស័យថ្មីមួយទៀតសម្រាប់ខេត្តកែបក្នុងការទាក់ទាញភ្ញៀវទេសចរ។
ឯកឧត្តមបានបន្ថែមថា ខេត្តកែបក៏មានគម្រោងអភិវឌ្ឍន៍តំបន់ទេសចរណ៍ជាច្រើនទៀត ដូចជា ទេសចរណ៍តាមតំបន់ភ្នំ ទេសចរណ៍តាមតំបន់សមុទ្រ ទេសចរណ៍តាមតំបន់ឆ្នេរកោះ ក្រៅពីនោះក៏នឹងរៀបចំឲ្យមានតំបន់ទេសចរណ៍ក្នុងបាតសមុទ្រផងដែរ៕
