នាយករដ្ឋមន្ត្រីនេប៉ាល់ ប្រកាសលាលែងពីតំណែង ខណៈក្រុមបាតុករប្រឆាំងអំពើពុករលួយបានបន្តធ្វើបាតុកម្ម

កដ្ឋមណ្ឌូ៖ បើតាមការចេញផ្សាយដោយទីភ្នាក់ងារសារព័ត៌មាន Reuters លោក K.P. Sharma Oli នាយករដ្ឋមន្ត្រីនេប៉ាល់ បានប្រកាសលាលែងពីតំណែងជាផ្លូវការហើយនៅថ្ងៃអង្គារ ខណៈក្រុមបាតុករប្រឆាំងអំពើពុករលួយបានបន្តធ្វើបាតុកម្មដោយមិនខ្វល់ពីបម្រាមគោចរ និងបានប៉ះទង្គិចជាមួយប៉ូលិស បន្ទាប់ពីមនុស្សចំនួន ១៩នាក់បានស្លាប់នៅក្នុងអំពើហិង្សាកាលពីថ្ងៃចន្ទ ដែលបង្កឡើងដោយការហាមឃាត់ប្រព័ន្ធផ្សព្វផ្សាយសង្គម។

នៅក្នុងលិខិតលាលែងពីតំណែងផ្ញើជូនប្រធានាធិបតី លោក Ramchandra Paudel, លោក Oli បានមានប្រសាសន៍ថា «ដោយពិនិត្យឃើញពីស្ថានភាពដ៏អាក្រក់នៅក្នុងប្រទេស ខ្ញុំបានលាលែងពីតំណែងដោយមានប្រសិទ្ធភាពចាប់ពីថ្ងៃនេះ ដើម្បីជួយសម្រួលដល់ការស្វែងរកដំណោះស្រាយចំពោះបញ្ហា និងជួយដោះស្រាយវាដោយនយោបាយស្របតាមរដ្ឋធម្មនុញ្ញ»។

ការិយាល័យប្រធានាធិបតីបានបញ្ជាក់ថា ការលាលែងនេះត្រូវបានទទួលយក ហើយលោកប្រធានាធិបតីបានចាប់ផ្តើម «ដំណើរការ និងការពិភាក្សាដើម្បីស្វែងរកមេដឹកនាំថ្មី»។
ទោះបីជាយ៉ាងនេះក្តី កំហឹងប្រឆាំងនឹងរដ្ឋាភិបាលមិនមានសញ្ញាថមថយឡើយ ដោយក្រុមបាតុករបានប្រមូលផ្តុំគ្នានៅមុខវិមានរដ្ឋសភា និងទីតាំងផ្សេងទៀតក្នុងរដ្ឋធានីកਠមណ្ឌូ។

ក្រុមបាតុករបានដុតកង់ឡាននៅលើដងផ្លូវមួយចំនួន គប់ដុំថ្មទៅលើកងកម្លាំងប៉ូលិសបង្ក្រាបបាតុកម្ម និងដេញតាមពួកគេតាមផ្លូវតូចចង្អៀត។ ក្រុមសាក្សីក៏បាននិយាយផងដែរថា ក្រុមបាតុករបានដុតផ្ទះរបស់អ្នកនយោបាយមួយចំនួននៅទីក្រុង Kathmandu ហើយប្រព័ន្ធផ្សព្វផ្សាយក្នុងស្រុកបានរាយការណ៍ថា រដ្ឋមន្ត្រីមួយចំនួនត្រូវបានជម្លៀសចេញដោយឧទ្ធម្ភាគចក្រយោធា។

គួរបញ្ជាក់ថា ភាពចលាចលនេះគឺអាក្រក់បំផុតក្នុងរយៈពេលជាច្រើនទសវត្សរ៍នៅក្នុងប្រទេសហិមាល័យដ៏ក្រីក្រមួយនេះ ដែលស្ថិតនៅចន្លោះប្រទេសឥណ្ឌា និងចិន ហើយបានជួបប្រទះនឹងអស្ថិរភាពនយោបាយ និងសេដ្ឋកិច្ចចាប់តាំងពីការលុបបំបាត់របបរាជានិយមក្នុងឆ្នាំ២០០៨។

លោក Oli អាយុ ៧៣ឆ្នាំ បានឡើងកាន់តំណែងជានាយករដ្ឋមន្ត្រីអាណត្តិទី៤ កាលពីខែកក្កដាឆ្នាំមុន ហើយសហការីគណៈរដ្ឋមន្ត្រីរបស់លោកចំនួនពីររូបក៏បានលាលែងពីតំណែងកាលពីល្ងាចថ្ងៃចន្ទ ដោយលើកឡើងពីហេតុផលសីលធម៌៕