លោក ដូណាល់ ត្រាំ និយាយថាទាំងទីក្រុងកៀវ និងទីក្រុងមូស្គូ ចាំបាច់ត្រូវធ្វើសម្បទានទឹកដីមួយចំនួនដើម្បីបិទបញ្ចប់ សង្រ្គាមនៅអ៊ុយក្រែន

វ៉ាស៊ីនតោន៖ បើតាមការចេញផ្សាយដោយទីភ្នាក់ងារសារព័ត៌មាន Reuters ប្រធានាធិបតីអាមេរិក លោក ដូណាល់ ត្រាំ នៅថ្ងៃចន្ទ ទី១១ ខែសីហា បាននិយាយថាទាំងទីក្រុងកៀវ និងទីក្រុងមូស្គូ ចាំបាច់ត្រូវធ្វើសម្បទានទឹកដីមួយចំនួនដើម្បីបិទបញ្ចប់ សង្រ្គាមនៅអ៊ុយក្រែន ហើយថាកិច្ចចរចរបស់លោកជាមួយប្រធានាធិបតីរុស្ស៉ី វ្ល៉ាឌីមៀ ពូទីន ក្នុងសប្ដាហ៍នេះនឹងបង្ហាញភ្លាមៗថាតើមេដឹកនាំរុស្ស៉ីពិតជាមានឆន្ទៈលើការសម្រេចបាន កិច្ចព្រមព្រៀងមួយ ឬក៏យ៉ាងណា។

បណ្ដាមេដឹកនាំអឺរ៉ុប និងប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី មានគម្រោងបើកកិច្ចពិភាក្សាជាមួយលោក ត្រាំ នៅមុនកិច្ចប្រជុំកំពូលរបស់លោកជាមួយលោក ពូទីន នៅរដ្ឋ Alaska នៅថ្ងៃសុក្រសប្ដាហ៍នេះ ចំពោះមុខការព្រួយបារម្ភថាទីក្រុងវ៉ាស៊ីនតោនអាចនឹងយល់ព្រមលើលក្ខខណ្ឌសន្តិភាពដែលមិនអំណោយផលដល់អ៊ុយក្រែន។

នៅឯសន្និសីទសារព័ត៌មានមួយ នៅសេតវិមាន លោក ត្រាំ បាននិយាយថារូបលោកអាចនឹងដឹងភ្លាមក្នុងពេល២នាទីថាតើកិច្ចចរចាជាមួយលោក ពូទីន នឹងមានភាពរីកចម្រើនឬក៏អត់? ប៉ុន្តែបើតាមលោក ត្រាំ ទាំងអ៊ុយក្រែន និងរុស្ស៉ី ត្រូវតែធ្វើសម្បទានទឹកដីមួយចំនួនដើម្បីបិទបញ្ចប់សង្រ្គាម។

គួរបញ្ជាក់ថា លោក ត្រាំ កន្លងមកក៏ធ្លាប់បានលើកឡើងពីការធ្វើសម្បទានទឹកដីដើម្បីបិទបញ្ចប់សង្រ្គាមនៅអ៊ុយក្រែនផងដែរ។ តែទាំងរុស្ស៉ី និងអ៊ុយក្រែនបានច្រានចោលរៀងៗខ្លួនចំពោះគំនិត ចង់ឱ្យពួកគេបោះបង់ទឹកដីជាផ្នែកមួយនៃកិច្ចព្រមព្រៀងសន្តិភាព៕