ឯកឧត្តមបណ្ឌិត ជ្រុន ថេរ៉ាវ៉ាត ផ្ញើសារលិខិតជូនពរ សម្ដេចតេជោ ហ៊ុន សែន ក្នុងឱកាសដ៏មហាជ័យមង្គលក្នុងពិធីចម្រើនជន្មាយុគម្រប់ ៧៣ឆ្នាំ ឈានចូល ៧៤ឆ្នាំ
ភ្នំពេញ៖ឯកឧត្តមបណ្ឌិត ជ្រុន ថេរ៉ាវ៉ាត ទីប្រឹក្សាផ្ទាល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងជារដ្ឋលេខាធិការក្រសួងអភិវឌ្ឍន៍ជនបទ ផ្ញើសារលិខិតជូនពរសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាក្នុងឱកាសដ៏មហាជ័យមង្គលក្នុងពិធីចម្រើនជន្មាយុគម្រប់ ៧៣ឆ្នាំ ឈានចូល ៧៤ឆ្នាំ ដែលនឹងប្រព្រឹត្តទៅនៅថ្ងៃទី៥ ខែសីហា ឆ្នាំ២០២៥ ខាងមុខនេះ។
ខ្ញុំសូមសម្តែងនូវអំណរសាទរដោយក្តីគោរពដ៏ខ្ពង់ខ្ពស់បំផុតជូនចំពោះសម្តេចតជោ សូមមានសុខភាពល្អបរិបូរណ៍ ប្រាជ្ញាភ្លឺថ្លា កាយពលមាំមួន និងមានជន្មាយុយឺនយូរ ដើម្បីបន្តដឹកនាំស្ថាប័នព្រឹទ្ធសភា ក៏ដូចជាអភិវឌ្ឍន៍ប្រទេសកម្ពុជាឱ្យទទួលបាននូវសមិទ្ធផល ដ៏ត្រចះត្រចង់បន្ថែមទៀត ជាពិសេសក្នុងបុព្វហេតុ ជាតិ សាសនា ព្រះមហាក្សត្រ។
សម្ដេចតេជោ គឺជាគំរូវីរភាពដ៏អស្ចារ្យ ដែលយើងខ្ញុំតែងតែគោរព និងដឹងគុណជានិច្ច ចំពោះភាពអង់អាចក្លាហាន ភាពប៉ិនប្រសប់ និងចក្ខុវិស័យដ៏វែងឆ្ងាយក្នុងការដឹកនាំប្រទេសជាតិទទួល បាននូវសុខសន្តិភាពពេញលេញ និងការអភិវឌ្ឍរីកចម្រើនលើគ្រប់វិស័យ។ មួយជីវិតរបស់សម្តេចតេជោ គឺការលះបង់ដើម្បីបុព្វហេតុរំដោះជាតិ បុព្វហេតុសង្គ្រោះជាតិ និងបុព្វហេតុកសាងសន្តិភាព សម្រាប់ប្រទេសកម្ពុជាទាំងមូល។
ខ្ញុំសូមបួងសួងដល់គុណបុណ្យព្រះរតនត្រ័យ វត្ថុស័ក្កិសិទ្ធិក្នុងលោក ទេវតាថែរក្សាទឹកដី នៃព្រះរាជាណាចក្រកម្ពុជា សូមព្រះអង្គតាមជួយបីបាច់ថែរក្សាការពារ សម្ដេចតេជោ និងសម្ដេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រី សូមបានប្រកបដោយពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
