ភ្នំពេញ៖ អភិបាលខេត្តតាកែវ ឯកឧត្តម វ៉ី សំណាង បានគូសបញ្ជាក់ពីសារៈសំខាន់នៃពិធីរុក្ខទិវា ក៏ដូចជាការដាំកូនឈើ ដើម្បីជាប្រយោជន៍ដល់បរិស្ថាន និងសង្គមជាតិ ពិសេសសម្រាប់មនុស្សជំនាន់ក្រោយ។
ថ្លែងក្នុងឱកាសអញ្ជើញចូលរួម អបអរសាទរពិធី រុក្ខទិវា ៩កក្កដា ដោយបានធ្វើការដាំកូនឈើ ចំនួន ៧១១ដើម នៅបរិវេណភ្នំដា ស្ថិតនៅភូមិព្រែកតាផ ឃុំគោកធ្លក ស្រុកអង្គរបូរី ខេត្តតាកែវ នាព្រឹកថ្ងៃសៅរិ៍ ទី១២ ខែកក្កដា ឆ្នាំ២០២៥ ឯកឧត្តមបានមានប្រសាសន៍ថា «យើងត្រូវរួមគ្នាថែរក្សា និងបង្កើនគម្របព្រៃឈើ ដើម្បីចូលរួមកាត់បន្ថយផលប៉ះពាល់នៃការប្រែប្រួលអាកាសធាតុ បង្កើតបរិយាកាសបរិសុទ្ធ និងរក្សាបាននូវជីវចម្រុះ។ ការដាំដើមឈើ គឺការដាំក្តីសង្ឃឹម ការដាំអនាគតបៃតងសម្រាប់កូនចៅយើង។
ឯកឧត្ដមបន្តថា ការចូលរួមដាំកូនឈើចំនួន ៧១១ដើម នៅបរិវេណប្រាសាទភ្នំដានេះ ក្នុងគោលបំណងចូលរួម ថែរក្សាសម្បត្តិធនធានធម្មជាតិប្រវត្តិសាស្រ្ត និងបំផុសលើកទឹកចិត្តដល់ភ្ញៀវទេសចរណ៍ជាតិ និងអន្តរជាតិ ឲ្យចូលមកទស្សនាទីតាំងប្រវត្តិសាស្រ្ត ដែលជាដើមកំណើតនគរគោកធ្លក នៃព្រះរាជាណាចក្រកម្ពុជា។
ជាមួយគ្នានេះដែរ ឯកឧត្តម វ៉ី សំណាង ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ បន្តចូលរួមសកម្មភាពដាំដុះ និងថែរក្សាដើមឈើឱ្យបានផុសផុល ដើម្បីជាប្រយោជន៍រួមរបស់យើងទាំងអស់គ្នា៕
