អគ្គនាយកដ្ឋានអត្តសញ្ញាណកម្ម និងប្រៃសណីយ៍កម្ពុជា ចុះ MOU ស្ដីពី កិច្ចសហប្រតិបត្តិការ ក្នុងការផ្តល់សេវាប្រៃសណីយ៍ ពាក់ព័ន្ធការងារអត្តសញ្ញាណកម្ម ជូនពលរដ្ឋ
ភ្នំពេញ៖ នៅទីស្ដីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី២៧ ខែមីនា ឆ្នាំ២០២៥ អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ និងប្រៃសណីយ៍កម្ពុជា បានចុះអនុស្សរណៈនៃការយោគយល់ (MOU) ស្ដីពី កិច្ចសហប្រតិបត្តិការ ក្នុងការផ្តល់សេវាប្រៃសណីយ៍ ពាក់ព័ន្ធការងារអត្តសញ្ញាណកម្ម ដើម្បីផ្ដល់ភាពងាយស្រួលបន្ថែមទៀត ដល់ប្រជាពលរដ្ឋ ដោយពុំចាំបាច់មកទទួលយកឯកសារដោយផ្ទាល់។
ពិធីនេះដែរ ធ្វើឡើងក្រោមអធិបតីភាព ឯកឧត្ដម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម និងឯកឧត្ដម ថេន សំវិសុទ្ធ អគ្គនាយកប្រៃសណីយ៍កម្ពុជា ដោយមានការអញ្ជើញចូលរួមពី ឯកឧត្ដម អគ្គនាយករង លោក លោកស្រី ប្រធាន អនុប្រធាននាយកដ្ឋាន ចំណុះអគ្គនាយកដ្ឋានអត្តសញ្ញាណកម្ម និងប្រៃសណីយ៍កម្ពុជា ព្រមទាំង សមាជិក សមាជិកា មន្ត្រីពាក់ព័ន្ធជាច្រើនរូបទៀតផង។
នាឱកាសនោះដែរ ឯកឧត្ដម ឧត្តមសេនីយ៍ឯក បណ្ឌិត តុប នេត មានប្រសាសន៍ថា អគ្គនាយកដ្ឋានអត្តសញ្ញាណកម្ម ដោយបានទទួលគោលការណ៍ដឹកនាំដ៏ខ្ពង់ខ្ពស់ពី ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងការផ្តល់សេវារដ្ឋបាលលើការងារអត្តសញ្ញាណកម្មជូនប្រជាពលរដ្ឋ ឱ្យមានភាពងាយស្រួល សាមញ្ញ និងឆាប់រហ័ស ហេតុនេះ អនុស្សរណៈនៃការយោគយល់នេះ គឺជាការបោះជំហានដ៏សំខាន់ក្នុងបេសកកម្មរួមគ្នារវាងអគ្គនាយកដ្ឋានអត្តសញ្ញាណកម្ម និងប្រៃសណីយ៍កម្ពុជា ក្នុងការពង្រឹងកិច្ចសហប្រតិបត្តិការរវាងស្ថាប័នរដ្ឋក្នុងការ រួមចំណែកផ្តល់សេវាសាធារណៈជូនប្រជាពលរដ្ឋឱ្យកាន់តែល្អ។
ទន្ទឹមនឹងនេះ ឯកឧត្ដម ឧត្ដមសេនីយ៍ឯក បណ្ឌិត អគ្គនាយក ក៏បានថ្លែងអំណរគុណយ៉ាងជ្រាលជ្រៅចំពោះប្រៃសណីយ៍កម្ពុជា ចំពោះកិច្ចសហការដ៏ល្អ និងការចូលរួមជាដៃគូយ៉ាងសកម្ម ក្នុងការផ្តល់សេវាដឹកជញ្ជូនលិខិតឆ្លងដែន និងឯកសារ អត្តសញ្ញាណកម្មដ៏ទៃទៀតជូនប្រជាពលរដ្ឋ។
ក្នុងនោះដែរ ឯកឧត្ដម ឧត្ដមសេនីយ៍ឯក បណ្ឌិត អគ្គនាយក បានណែនាំដល់បណ្តានាយកដ្ឋានចំណុះ អគ្គនាយកដ្ឋានអត្តសញ្ញាណកម្មទាំងអស់ សូមចូលរួមសហការអនុវត្តនូវការប្រើប្រាស់សេវាប្រៃសណីយ៍កម្ពុជា ឱ្យបានទូលំទូលាយស្របតាមខ្លឹមសារនៃអនុស្សរណៈនេះ។
សូមរំលឹកថា មុនពេលដាក់ដំណើរការសាកល្បងការប្រើប្រាស់សេវាបញ្ញើរបស់ប្រៃសណីយ៍កម្ពុជា ប្រជាពលរដ្ឋដែល មានតម្រូវការឯកសារអត្តសញ្ញាណកម្ម ត្រូវមកស្នើសុំនៅទីតាំងណាមួយដែលបានកំណត់។ នៅពេលឯកសារ រួចរាល់ប្រជាពលរដ្ឋត្រូវត្រឡប់មកម្តងទៀត ដើម្បីយកឯកសារទៅប្រើប្រាស់ វាពិតជាមានការលំបាកក្នុងការធ្វើ ដំណើរ ដោយត្រូវចំណាយពេលវេលា និងថវិកា ជាពិសេសប្រជាពលរដ្ឋដែលរស់នៅឆ្ងាយពីទីតាំងផ្តល់សេវា ក៏ដូចជាប្រជាពលរដ្ឋដែលពុំមានពេលទំនេរមកទទួលយកឯកសារដោយផ្ទាល់។
ដោយមើលឃើញពីការលំបាករបស់ប្រជាពលរដ្ឋ ក្រសួងមហាផ្ទៃក្រោមការដឹកនាំប្រកបដោយគតិបណ្ឌិត របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អគ្គនាយកដ្ឋាន អត្តសញ្ញាណកម្ម ដោយមានកិច្ចសហការជាមួយប្រៃសណីយ៍កម្ពុជា បានដាក់ឱ្យអនុវត្តសាកល្បងប្រើប្រាស់ សេវាប្រៃសណីយ៍ សម្រាប់សេវាលិខិតឆ្លងដែន នៅខែមិថុនា ឆ្នាំ២០២៤ ជូនប្រជាពលរដ្ឋដែលមានតម្រូវការ (តាមគោលការណ៍ស្ម័គ្រចិត្ត) ដោយត្រូវបង់កម្រៃសេវា។
បន្ទាប់ពីការសាកល្បងប្រើប្រាស់សេវាបញ្ញើរបស់ប្រៃសណីយ៍កម្ពុជាក្នុងការចែកលិខិតឆ្លងដែនដល់ គោលដៅចុងក្រោយរបស់ប្រជាពលរដ្ឋ និងសេវាដឹកជញ្ជូនលិខិតឆ្លងដែននិងឯកសារពីនាយកដ្ឋានលិខិតឆ្លង ដែន ទៅតាមបណ្តាសាខា និងទីស្នាក់ការ បានឃើញថា មានភាពល្អប្រសើរដោយមានការទទួលខុសត្រូវខ្ពស់ ពុំដែលមានការបាត់បង់ ឬខូចខាត លិខិតឆ្លងដែន និងឯកសារនោះទេ ៕
