ប្រធានាធិបតីស្តីទីកូរ៉េខាងត្បូង អំពាវនាវគោរព និងទទួលយកការសម្រេចចិត្ត មុនការសម្រេចរបស់តុលាការធម្មនុញ្ញ លើការចោទប្រកាន់លោក យូន ស៊ុកយ៉ុល
សេអ៊ូល៖ ប្រធានាធិបតីស្តីទីកូរ៉េខាងត្បូង លោក ឆយ សាំងម៉ុក នៅថ្ងៃសុក្រទី១៤មីនានេះ បានអំពាវនាវឱ្យប្រជាជាតិគោរព និងទទួលយកការសម្រេចចិត្តណាមួយ មុនពេលការសម្រេចរបស់តុលាការធម្មនុញ្ញលើការចោទប្រកាន់មេដឹកនាំ លោក យូន ស៊ុកយ៉ុល ជុំវិញបទបញ្ជាច្បាប់អាជ្ញាសឹករយៈពេលខ្លីរបស់គាត់។
លោក ឆយ បានបញ្ជាក់ថា រដ្ឋាភិបាលនឹងដាក់ពង្រាយប៉ូលិសទៅកាន់ផ្នែកខ្លះនៃរដ្ឋធានីសេអ៊ូល ដោយសន្យាថា នឹងមិនអត់ឱនចំពោះទង្វើណាមួយដែលប៉ះពាល់ដល់សណ្តាប់ធ្នាប់សាធារណៈឡើយ។ សន្តិសុខកំពុងត្រូវបានរឹតបន្តឹងនៅជុំវិញតុលាការ ដោយការហាមប្រាមការហោះហើរយន្តហោះគ្មានមនុស្សបើក នៅក្នុងតំបន់ត្រូវបានដាក់រួចហើយ។ ទាំងអ្នកគាំទ្រ និងអ្នកប្រឆាំងលោក យូន ត្រូវបានគេរំពឹងថា នឹងប្រមូលផ្តុំគ្នា ដើម្បីស្តាប់ការសម្រេចដែលនឹងមកដល់ក្នុងរយៈពេលប៉ុន្មានថ្ងៃ។
លោក ឆយ បាននិយាយនៅឯកិច្ចប្រជុំជាមួយរដ្ឋមន្ត្រីក្នុងគណៈរដ្ឋមន្ត្រី ដោយប្រើឈ្មោះផ្លូវការរបស់កូរ៉េខាងត្បូងថា «សហគមន៍អន្តរជាតិកំពុងតាមដានយ៉ាងជិតស្និទ្ធលើសាធារណរដ្ឋកូរ៉េ។ ភាពធន់នឹងលទ្ធិប្រជាធិបតេយ្យរបស់ប្រទេសរបស់យើង កំពុងត្រូវបានសាកល្បង»។ លោកបន្តថា វាមានសារសំខាន់ណាស់សម្រាប់ស្ថិរភាពសង្គម និងការអភិវឌ្ឍសហគមន៍ ដែលប្រជាពលរដ្ឋទាំងអស់បញ្ចេញមតិក្នុងលក្ខណៈផ្លូវច្បាប់ និងគោរព ហើយទទួលយកលទ្ធផលនៃការសម្រេចចិត្តណាមួយ។
ប៉ូលិសបានត្រៀមខ្លួនរួចជាស្រេចក្នុងការប្រើប្រាស់ឧស្ម័នម្រេច និងដំបង ក្នុងករណីមានអំពើហិង្សាកើតឡើង។ ប្រព័ន្ធផ្សព្វផ្សាយក្នុងស្រុកបានរាយការណ៍ថា តំបន់សន្តិសុខត្រូវបានបង្កើតឡើងនៅក្នុងតំបន់១០០ម៉ែត្រជុំវិញតុលាការ។ លួសបន្លា ក៏ត្រូវបានរាយនៅលើជញ្ជាំងតុលាការផងដែរ។ គួររំឭកថា នៅពេលអ្នកគាំទ្រលោក យូន រាប់ពាន់នាក់ធ្លាប់បានប្រមូលផ្តុំគ្នានៅជិតតុលាការធម្មនុញ្ញអំឡុងពេលសវនាការលើសំណុំរឿងរបស់លោក ពួកគេត្រូវបានហ៊ុមព័ទ្ធដោយក្រុមប៉ូលិស និងរថយន្ត។ កាលពីខែមករា ក្រុមបាតុករគាំទ្រលោក យូន បានចូលលុកលុយអគារតុលាការ។
ក្រុមអ្នកស៊ើបអង្កេតបានចោទប្រកាន់ថា ក្រឹត្យច្បាប់អាជ្ញាសឹករយៈពេលខ្លីរបស់លោក យូន គឺជាការបះបោរ។ ប្រសិនបើលោក យូន ត្រូវបានកាត់ទោសពីបទល្មើសនៅក្នុងការកាត់ទោសព្រហ្មទណ្ឌ លោកនឹងប្រឈមមុខនឹងទោសប្រហារជីវិត ឬដាក់ពន្ធនាគារអស់មួយជីវិត។ តុលាការធម្មនុញ្ញនឹងត្រូវសម្រេចចិត្តនៅប៉ុន្មានថ្ងៃខាងមុខ ថាតើត្រូវប្រគល់តំណែងប្រធានាធិបតីទៅឱ្យលោក យូន វិញ ឬដករូបលោកចេញពីតំណែង? គួរបញ្ជាក់ថា ប្រធានាធិបតីកូរ៉េខាងត្បូង លោក យូន ស៊ុកយ៉ុល ត្រូវបានដោះលែងពីពន្ធនាគារកាលពីថ្ងៃទី៨ ខែមីនា មួយថ្ងៃបន្ទាប់ពីតុលាការបានលុបចោលដីកាចាប់ខ្លួនលោក៕
