លោក ពូទីន យល់ស្របលើសំណើរបស់អាម៉េរិកសម្រាប់បទឈប់បាញ់រយៈពេល៣០ថ្ងៃនៅអ៊ុយក្រែន ប៉ុន្តែលក្ខខណ្ឌ នេះនៅ មិន ទាន់ ត្រូវ បាន សម្រេច នៅ ឡើយ ទេ
មូស្គូ៖ លោក វ្ល៉ាឌីមៀ ពូទីន បានអះអាងកាលពីថ្ងៃព្រហស្បតិ៍ទី១៣មីនាថា លោកយល់ស្របជាគោលការណ៍លើសំណើរបស់អាម៉េរិកសម្រាប់បទឈប់បាញ់រយៈពេល៣០ថ្ងៃនៅអ៊ុយក្រែន ប៉ុន្តែ លោក បញ្ជាក់ ថា លក្ខខណ្ឌ នេះនៅ មិន ទាន់ ត្រូវ បាន សម្រេច នៅ ឡើយ ទេ ហើយ បាន បន្ថែម ថា បទ ឈប់ បាញ់ ណា មួយ គួរ ត្រួស ត្រាយ ផ្លូវ ទៅ រក សន្តិភាព យូរអង្វែង។
លោក ពូទីន ជាមេខ្លោងចាប់ផ្តើមលុកលុយយ៉ាងពេញទំហឹងលើអ៊ុយក្រែនកាលពីជាងបីឆ្នាំមុន បានកត់សម្គាល់ពីភាពចាំបាច់នៃបទឈប់បាញ់ត្រឹមតែប៉ុន្មានម៉ោង បន្ទាប់ពីការមកដល់នៃបេសកជនពិសេសរបស់លោក ត្រាំ គឺលោក ស្ទីវ វីតខូហ្វ នៅរដ្ឋធានីមូស្គូ សម្រាប់កិច្ចពិភាក្សាស្តីពីបទឈប់បាញ់ដែលអ៊ុយក្រែនបានងក់ក្បាលទទួលយក។ ជាមួយគ្នានេះ លោក ពូទីន បានប្រាប់សន្និសីទសារព័ត៌មាននៅរដ្ឋធានីមូស្គូថា៖«គំនិតនេះ..គឺត្រឹមត្រូវណាស់ ហើយយើងពិតជាគាំទ្រ។ ប៉ុន្តែមានបញ្ហាជាច្រើនដែលយើងត្រូវពិភាក្សា ខ្ញុំគិតថា..យើងត្រូវលើកឡើងអំពីវា[បទឈប់បាញ់]ជាមួយដៃគូអាម៉េរិករបស់យើង[..]»។ លោកបន្តថា៖«យើងយល់ស្របនឹងសំណើដើម្បីបញ្ឈប់ការប្រយុទ្ធគ្នា ប៉ុន្តែយើងគួរតែនាំគ្នាទៅរកសន្តិភាពយូរអង្វែង និងទម្លាក់អាវុធចុះ ដកចេញពីឫសគល់នៃវិបត្តិនេះ»។
ដោយឡែក លោកប្រធានាធិបតីអាម៉េរិក ដូណាល់ ត្រាំ បានលើកឡើងថា មានសញ្ញាវិជ្ជមានចេញពីភាគីរុស្ស៊ី ហើយលោកមានគំនិតសុទិដ្ឋិនិយមក្នុងការគាំទ្រ និងការពារចំពោះសេចក្ដីថ្លែងការណ៍របស់លោក ពូទីន។ ជាមួយគ្នា លោក ត្រាំ ក៏បាន បញ្ជាក់ ជា ថ្មី ថា លោក បាន ត្រៀម ខ្លួន ជា ស្រេច ដើម្បី ជជែកជាមួយ លោក ពូទីន ហើយវាដល់ ពេល ត្រូវ បញ្ចប់ សង្គ្រាម ហើយ។ លើសពីនេះ លោក ត្រាំ បានអះអាងនៅសេតវិមានជាមួយប្រមុខណាតូកាលពីថ្ងៃព្រហស្បតិ៍ថា៖«លោក ពូទីនបានចេញសេចក្ដីថ្លែងការណ៍ដ៏មានសង្ឃឹមមួយ ប៉ុន្តែវាមិនទាន់ពេញលេញទេ។ ឥឡូវ យើង នឹងចាំ មើល ថា តើ រុស្ស៊ី នឹងធ្វើវា ឬ ក៏អត់..? ហើយ ប្រសិនបើ រុស្ស៊ី មិនធ្វើវា ទេ នោះនឹង ក្លាយជា រឿង ដ៏ ខកចិត្ត សម្រាប់ ពិភពលោក » ។
ទោះជាយ៉ាងនេះក្ដី លោក ពូទីន បានផ្លែផ្កាថា.. ហាក់ដូចជាសហរដ្ឋអាម៉េរិកបានបញ្ចុះបញ្ចូលអ៊ុយក្រែនឱ្យទទួលយកបទឈប់បាញ់នេះ ដោយសារស្ថានភាពសមរភូមិរបស់យោធាអ៊ុយក្រែនកាន់តែយ៉ាប់យ៉ឺន ជាពិសេសនៅតំបន់ឃឺស។ កន្លងទៅ លោក ត្រាំ បានកាត់ផ្តាច់ជំនួយផ្នែកយោធាសំខាន់ៗ និងការចែករំលែកព័ត៌មានសម្ងាត់មួយរយៈពេលខ្លី ក្នុងកិច្ចខិតខំប្រឹងប្រែងជាក់ស្តែងមួយ ដើម្បីជំរុញឱ្យរដ្ឋធានីកៀវឱ្យចូលរួមក្នុងកិច្ចចរចាដើម្បីបញ្ចប់សង្រ្គាម។
លោក ពូទីន ក៏បានថ្លែងអំណរគុណដល់មេដឹកនាំនៃប្រទេសចិន ឥណ្ឌា ប្រេស៊ីល និងអាហ្វ្រិកខាងត្បូង សម្រាប់បេសកកម្មដ៏ថ្លៃថ្នូរបស់ពួកគេក្នុងការបញ្ចប់ការប្រយុទ្ធគ្នា។ រុស្ស៊ី មិន ទទួល យក កង រក្សា សន្តិភាព ពី សមាជិក ណាតូ ណា មួយ ដើម្បី ត្រួត ពិនិត្យ បទ ឈប់ បាញ់ ដែល អាច នឹង កើត ឡើងនោះឡើយ។
យ៉ាងណា ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បានលើកឡើងថា៖«លោក ពូទីន កំពុងរៀបចំផែនការយ៉ាងសំខាន់ ដើម្បីបដិសេធបទឈប់បាញ់នេះ ពីព្រោះលោក ពូទីន មិនហ៊ានប្រាប់ប្រធានាធិបតី ត្រាំ ដោយផ្ទាល់ថា លោកចង់បន្តសង្រ្គាមនេះទេ និងចង់សម្លាប់ជនជាតិអ៊ុយក្រែន។ មូលហេតុនេះហើយនាំឱ្យរបបមូស្គូប្រើប្រាស់គំនិតនៃបទឈប់បាញ់ដើម្បីជាលេស ជាមួយនឹងលក្ខខណ្ឌជាមុន ដែលគ្មានអ្វីនឹងកើតឡើងឡើយ»។
គួរបញ្ជាក់ថា សហរដ្ឋអាម៉េរិកនៅតែមានថវិកាប្រហែល៣,៨៥ពាន់លានដុល្លារ ដែលអនុម័តដោយសភាសម្រាប់ការដឹកជញ្ជូនអាវុធទៅកាន់អ៊ុយក្រែននាពេលអនាគត ប៉ុន្តែរដ្ឋបាល ត្រាំ មិនខ្វល់ឡើយ ហើយរហូតមកដល់ពេលនេះ ត្រាំ មិនបានប្រើប្រាស់សិទ្ធិអំណាចនោះ ដើម្បីបញ្ជូនអាវុធបន្ថែមទៅអ៊ុយក្រែននោះទេ ដោយរង់ចាំពន្លឺសន្តិភាព៕
