ទេសរដ្ឋមន្ត្រី គន់ គីម ណែនាំដល់ប្រធានសមាគមអតីតយុទ្ធជនកម្ពុជាខេត្តបន្ទាយមានជ័យ បន្តចុះជួយរាល់ទុក្ខបញ្ហាលំបាករបស់បងប្អូនអតីតយុទ្ធជនឱ្យបានទាន់ពេលវេលា

ភ្នំពេញ៖ ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី ទទួលបន្ទុកបេសកកម្ម ពិសេស ជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ អនុប្រធានសមាគម អតីតយុទ្ធជនកម្ពុជា ជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញជាអធិបតីភាព ក្នុងកិច្ចប្រជុំបូកសរុបលទ្ធផលការងារគ្រប់គ្រងគ្រោះមហន្តរាយឆ្នាំ២០២៤ និងទិសដៅ ការងារឆ្នាំ២០២៥ របស់គណៈកម្មាធិការគ្រប់គ្រងគ្រោះមហន្តរាយខេត្តបន្ទាយមានជ័យ និងបូកសរុបលទ្ធផលការងារឆ្នាំ២០២៤ និងទិសដៅអនុវត្តន៍បន្តឆ្នាំ២០២៥ របស់សមាគមអតីតយុទ្ធជនកម្ពុជាខេត្តបន្ទាយមានជ័យ។

កិច្ចប្រជុំនេះក៏មានការអញ្ជេីញចូលរួម ឯកឧត្តម ប្លែក វ៉ារី ប្រធានក្រុមប្រឹក្សាខេត្ត, ឯកឧត្តម អ៊ុំ រាត្រី អភិបាលនៃគណៈអភិបាលខេត្ត និងជាប្រធានកិត្តិយសសមាគមអតីតយុទ្ធជនខេត្ត, លោកឧត្តមសេនីយ៍ទោ សិទ្ធិ ឡោះ ប្រធានសមាគមអតីតយុទ្ធជនកម្ពុជាខេត្ត, លោក-លោកស្រី អនុប្រធានគណៈកម្មាធិការសមាគមអតីតយុទ្ធជនកម្ពុជាខេត្ត ប្រារព្ធធ្វេីនៅទីស្នាក់ការសមាគមអតីតយុទ្ធជនខេត្តបន្ទាយមានជ័យ ស្ថិតនៅភូមិពង្រ សង្កាត់កំពង់ស្វាយ ក្រុងសិរីសោភ័ណ។

នាឱកាសនោះ ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម បានថ្លែងការកោតសរសេីរអាជ្ញាធរខេត្ត សមាគមអតីតយុទ្ធជនកម្ពុជា ក៏ដូចជាគណៈកម្មាធិការគ្រប់គ្រងគ្រោះមហន្តរាយខេត្ត ដែលកន្លងមកបានខិតខំបំពេញភារកិច្ចយ៉ាងសកម្ម។

ទន្ទឹមជាមួយគ្នា ឯកឧត្ដមទេសរដ្ឋមន្ត្រី បានណែនាំដល់ប្រធានសមាគមអតីតយុទ្ធជនកម្ពុជាខេត្ត បន្តយកចិត្តទុកដាក់ទៅលើសុខទុក្ខ ការស់នៅរបស់បងប្អូនអតីតយុទ្ធជន ចុះជួយឱ្យបានជាប្រចាំប្រសិនបេីពួកគាត់ជួបបញ្ហាលំបាកណាមួយ ត្រូវធ្វើការដោះស្រាយជូនពួកគាត់ឱ្យបានទាន់ពេលវេលា។ ទន្ទឹមនឹងនោះ អាជ្ញាធរគណៈកម្មាធិការគ្រប់គ្រងគ្រោះមហន្តរាយខេត្ត ក៏ត្រូវបន្តតាមដានស្ថានភាពទឹក ដោយសង្កេតឃេីញថា តាមបណ្តាស្រុកមួយចំនួនកំពុងរងការខ្វះខាតទឹក ដែលចំនុចនេះទាមទារឱ្យរដ្ឋបាលខេត្ត អាជ្ញាធរ ក្រុង-ស្រុក មន្ទីរ ជំនាញពាក់ព័ន្ធ បន្តយកចិត្តទុកដាក់ក្នុងការត្រៀមរកប្រភពទឹកដើម្បីជួយសង្គ្រោះប្រជាពលរដ្ឋ តំបន់ដែលប្រឈមការខ្វះខាតទឹកដេីម្បចេញអន្តរាគមន៍ជួយគាត់ឱ្យបានទាន់ពេលវេលា។

មួយវិញទៀតក្នុងករណីមានគ្រោះរាំងស្ងួតនេះក៏ប្រឈមជាមួយនឹងបញ្ហាគ្រោះអគ្គិភ័យ ក្នុងនាមគណៈកម្មាធិការគ្រោះមហន្តរាយសូមណែនាំដល់កងកម្លាំងត្រៀមប្រចាំការម្ភៃបួនម៉ោងលើម្ភៃបួនម៉ោងដើម្បីចេញអន្តរាគមន៍ពេលមានអគ្គីភ័យកើតមានជាយថាហេតុណាមួយ។

សូមបញ្ជាក់ថា៖ យោងតាមរបាយការណ៍របស់សមាគមអតីតយុទ្ធជនកម្ពុជាខេត្ត បានរាយការណ៍សង្ខេប ការងារគ្រប់គ្រងសមាជិកអតីតយុទ្ធជនកម្ពុជាខេត្ត ដោយគិតត្រឹមខែកុម្ភៈឆ្នាំ២០២៥សមាជិកអតីតយុទ្ធជនកំពុងគ្រប់គ្រងមានចំនួន ៥.៥៤០នាក់ក្នុងនោះ គ្រួសារជនពលី ចំនួន ៧៣៤គ្រួសារ, គ្រួសារជនមរណៈចំនួន ១៣៦គ្រួសារ, និវត្តជនចំនួន ២.៤៨៦នាក់, ជនបាត់បង់ចំនួន ៤០នាក់, ជនពិការចំនួន ២.១៤៩នាក់។ ដោយឡែក ការងារបេឡាមរណៈសង្គ្រោះ និងការងារគ្រប់គ្រង ក្នុងឆ្នាំ២០២៤ សមាជិកសមាគមអតីតយុទ្ធជនទទួលមរណៈភាពចំនួន ១៥១សព បានប្រគល់ ថវិកាបេឡាមរណៈសង្គ្រោះទាំង១៥១សព ស្មើទឹកប្រាក់ចំនួន ៦០៤.០០០.០០០រៀល ក្នុងនោះថវិកា បំពេញបន្ថែមសម្តេចតេជោចំនួន ៥៣សព ស្មើ ២១២.០០០.០០០រៀល។ រយៈពេល២ខែក្នុងឆ្នាំ២០២៥ សមាជិកសមាគមអតីតយុទ្ធជនកម្ពុជាខេត្ត បានទទួលមរណភាពចំនួន ៤១សព បានប្រគល់ថវិកាបេឡាមរណៈសង្គ្រោះ២៣សពស្មើទឹកប្រាក់ចំនួន ៩២.០០០.០០០រៀល ក្នុងនោះថវិកាបំពេញបន្ថែមសម្តេចតេជោចំនួន ២៣ សព ស្មើនឹង ៩២.០០០.០០០រៀល នៅសល់ចំនួន ១៨សព ពុំទាន់បានទទួលថវិកា។ បានសហការជាមួយមូលនិធិជាតិជំនួយសង្គមខេត្ត បើកផ្តល់ប្រាក់ធានារ៉ាប់រងសង្គម ប្រាក់ បូជាសព ប្រាក់ឧបត្ថម្ភ១លើកដំបូង បានចំនួន ១១លើក ជាប្រាក់របស់រាជរដ្ឋាភិបាល ជូនគ្រួសារ សព ចំនួន ៧៧នាក់ សរុបទឹកប្រាក់ចំនួន
៦៨៨.០២៦.៧៨៤រៀល។

យោងតាមរបាយការណ៍ គណៈកម្មាធិការគ្រប់គ្រងគ្រោះមហន្តរាយខេត្ត បានឱ្យដឹងថា៖ ដើមឆ្នាំ២០២៥ គ្រោះមហន្តរាយកើតមានឡើងដូចជា អគ្គិភ័យចំនួន៧លើក បណ្ដាលឱ្យឆេះផ្ទះ២ខ្នង ឆេះអគារសាលាបឋមសិក្សាស្ទឹងកំបុត ១ខ្នង ២បន្ទប់ (អគារចាស់ទ្រុឌទ្រោមទុកចោល), ឆេះតូបចំនួន៨តូប, ឆេះអគារស្នាក់នៅជាន់ទី២អស់១បន្ទប់ និងឆាបឆេះក្លឹបខារ៉ាអូរខេឈ្មោះ ស៊ីន ជាន់ហួយខេធីវី (EDMចាស់) ប្រហែល ៣០ភាគរយ ឆេះតូបលក់អីវ៉ាន់ប្រជាពលរដ្ឋខ្មែរដែល ជួលនៅផ្សាររុងគ្លឿ (ប្រទេសថៃ) ខូចខាតទាំងស្រុងចំនួន ៥៦តូបគិតជាទឹកប្រាក់ប្រមាណ៤៥លានបាត ទៅ៥០លានបាត។ ខ្យល់កន្រ្តាក់ កើតមានចំនួន១លើក ប៉ះពាល់លំនៅឋានប្រជាពលរដ្ឋ ១ខ្នង ខូចខាតសង្ក័សីចំនួន ១០សន្លឹក ស្ថិតនៅភូមិថ្មរមៀលលិច ឃុំបន្ទាយឆ្មារ ស្រុកថ្មពួក ៕