សម្តេច សាយ ឈុំ អញ្ជើញប្រកាសបញ្ចូលអតីតសមាជិកបក្សប្រឆាំងនៅរាជធានីភ្នំពេញ ១,៨១៨នាក់ ជាសមាជិករបស់គណបក្សប្រជាជនកម្ពុជា
ភ្នំពេញ៖ សម្តេចវិបុលសេនាភក្តី សាយ ឈុំ អនុប្រធានគណបក្ស និងជាប្រធានក្រុមការងារគណបក្សចុះមូលដ្ឋានរាជធានីភ្នំពេញ បានអញ្ជើញប្រកាសបញ្ចូលអតីតសមជិកបក្សប្រឆាំងនៅរាជធានីភ្នំពេញ ចំនួន១,៨១៨នាក់ ជាសមាជិករបស់គណបក្សប្រជាជនកម្ពុជារាជធានីភ្នំពេញ នាព្រឹកថ្ងៃទី៤ ខែមករា ឆ្នាំ២០២៥នេះ នៅវិមាន៧មករា ។
សមាជិកថ្មី របស់គណបក្សប្រជាជនកម្ពុជា ចំនួន១៨១៨នាក់រួមមាន៖ ខណ្ឌចំការមន ចំនួន១៧នាក់, ខណ្ឌដូនពេញចំនួន៤៨នាក់, ខណ្ឌ៧មករា ចំនួន២នាក់, ខណ្ឌទួលគោកចំនួន ៥៧នាក់, ខណ្ឌដង្កោ ចំនួន២៩៤នាក់, ខណ្ឌមានជ័យចំនួន២០១នាក់, ខណ្ឌឬស្សីកែវ ចំនួន១០១នាក់, ខណ្ឌសែនសុខចំនួន១០១នាក់, ខណ្ឌពោធិសែនជ័យ ចំនួន៨៧នាក់, ខណ្ឌច្បារអំពៅ ចំនួន៤៩នាក់, ខណ្ឌជ្រោយចង្វា ចំនួន៣នាក់, ខណ្ឌព្រែកព្នៅ ចំនួន១៤នាក់, ខណ្ឌបឹងកេងកង ចំនួន៣នាក់, ខណ្ឌកំបូល ចំនួន៣៥នាក់, ភព១៣ មានចំនួន៩៦នាក់, ភព២៣ មាមចំនួន៤៦នាក់, ភព២៤ មានចំនួន៥៧នាក់ និងភព២៥ មានចំនួន៦០៩នាក់។
ក្នុងពិធីនោះ ឯកឧត្ដម ឃួង ស្រេង សមាជិកគណៈកម្មាធិការ កណ្តាលគណបក្សប្រជាជនកម្ពុជា និងប្រធានគណៈកម្មាធិការ គណបក្សប្រជាជនកម្ពុជារាជធានីភ្នំពេញ បានលើកឡើងថា ការជួបគ្នានាពេលនេះ ស្របពេលដែលប្រទេសកម្ពុជា កំពុងត្រៀមរៀបចំខួបលើកទី៤៦ នៃទិវាបុណ្យជាតិ ៧ មករា ដែលជាថ្ងៃប្រវត្តិសាស្ត្រសំខាន់របស់កម្ពុជា។ បើគ្មានថ្ងៃ ៧ មករា ទេ គឺមិនមានអ្វីៗទាំងអស់ដូចសព្វថ្ងៃនេះទេ។ ក្រោមការដឹកនាំរបស់គណបក្សប្រជាជនកម្ពុជា បានធ្វើឲ្យប្រទេសកម្ពុជាទាំងមូល មានសន្តិភាពពេញលេញ និងមានការអភិវឌ្ឍយ៉ាងឆាប់រហ័ស។
ឯកឧត្ដម ឃួង ស្រេង បានបញ្ជាក់ថា គិតត្រឹមថ្ងៃទី៣១ ខែធ្នូ ឆ្នាំ២០២៤ គណបក្សប្រជាជនកម្ពុជារាជធានីភ្នំពេញ មានសមាជិក សមាជិកា ចំនួន៧៣៣,៤៥៣នាក់។ គណបក្សប្រជាជនកម្ពុជា បានអូសទាញគណបក្សដទៃ ឲ្យមករួមរស់ជាមួយគណបក្សប្រជាជនកម្ពុជា បានចំនួន៤,២៥៩នាក់ ដោយយើងបានប្រកាសបញ្ជូលជាសមាជិកបក្សរួចរាល់ ចំនួន ២,៤៤១រូប នៅសល់១,៨១៨រូប ដែលបានប្រកាសបញ្ចូលជាសមាជិករបស់គណបក្សប្រជាជនកម្ពុជាថ្មី នាព្រឹកនេះ។
ប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ បានបន្តទៀតថា គោលបំណងរបស់គណបក្សប្រជាជនកម្ពុជា គឺដើម្បីប្រមូលកម្លាំងអ្នកស្នេហាជាតិ ដើម្បីរួមគ្នាកសាងប្រទេសជាតិមួយនេះឲ្យមានឯករាជ្យភាព ប្រជាធិបតេយ្យ និងសុខដុមរមនា នៅកម្ពុជា។
សម្តេចវិបុលសេនាភក្តី សាយ ឈុំ អនុប្រធានគណបក្ស និងជា ប្រធានក្រុមការងារគណបក្សចុះមូលដ្ឋានរាជធានីភ្នំពេញ បានលើកឡើងថា ពិធីនេះក៏បានធ្វើឡើងស្របទៅតាមលក្ខន្តិកៈ និងបទបញ្ជាផ្ទៃក្នុងរបស់គណបក្សប្រជាជនកម្ពុជា ហើយក៏ស្របទៅតាមគណៈទេសៈជាក់ស្ដែង របស់ប្រទេសកម្ពុជា។
សម្តេចវិបុលសេនាភក្តី សាយ ឈុំ បានរំលឹកផងដែរថា រូបសម្ដេចបានប្រកាសចូលជាសមាជិក របស់គណបក្សប្រជាជនកម្ពុជា នៅក្នុងពេលដែលប្រទេសជាតិ ធ្លាក់ទៅក្នុងភ្លើងសង្គ្រាម តស៊ូយ៉ាងស្វិតស្នាញ ដើម្បីឯករាជ្យជាតិ ហើយការប្រកាសកាលនោះ បានធ្វើឡើងដោយសម្ងាត់បំផុត ដោយមានអ្នកចូលរួមត្រឹមតែ៥រូបប៉ុណ្ណោះ មិនដូចពិធីដែលធ្វើឡើង នៅពេលនេះទេ។
សម្តេចវិបុលសេនាភក្តី បានបន្តថា សម្រាប់សមាជិក សមាជិកាទាំង១៨១៨រូបនេះ នឹងទទួលបានសិទ្ធិពេញលេញ ជាសមាជិក សមាជិកា របស់គណបក្សប្រជាជនកម្ពុជា។ ដូច្នេះសុំសមាជិក សមាជិកា គណបក្សប្រជាជនកម្ពុជា ត្រូវប្រតិបត្តិឲ្យបានត្រឹមត្រូវ ទៅតាមកម្មវិធីនយោបាយរបស់គណបក្សប្រជាជនកម្ពុជា ធ្វើទំនាក់ទំនងល្អជាមួយគ្នា ផ្សព្វផ្សាយកម្មវិធីនយោបាយរបស់បក្សឲ្យបានល្អ ត្រូវរក្សាសាមគ្គីភាពផ្ទៃក្នុង រក្សាការសម្ងាត់របស់បក្ស ជាមួយនឹងការជួយគ្នា ដើម្បីភាពរីកចម្រើនរបស់គណបក្ស។
សម្ដេចបានលើកឡើងទៀតថា គណបក្សប្រជាជនកម្ពុជា បានបង្កើតឡើងនៅថ្ងៃទី២៨ ខែមិថុនា ឆ្នាំ១៩៥១ គណបក្សប្រជាជនកម្ពុជា បានពុះពារឆ្លងកាត់ការលំបាក រួមសុខ រួមទុក្ខជាមួយប្រជាជនកម្ពុជាគ្រប់ស្ថានភាព គ្រប់ឧបសគ្គ ដើម្បីប្រទេសកម្ពុជា បានឯករាជ្យ ប្រជាធិបតេយ្យ។ គណបក្សប្រជាជនកម្ពុជា បានរំដោះប្រទេសជាតិ ចេញពីរបបប្រល័យពូជសាសន៍ ប៉ុល ពត នាថ្ងៃទី៧ មករា ១៩៧៩ ហើយត្រូវបានប្រជាពលរដ្ឋកម្ពុជា ឲ្យថ្ងៃ៧ មករានេះ គឺជាថ្ងៃកំណើតទី២របស់ខ្លួន បើគ្មានថ្ងៃ៧ មករាទេ គឺមិនមានអ្វីៗទាំងអស់ ហើយក៏មិនមានថ្ងៃនេះដែរ៕
