កងកម្លាំងចម្រុះដែលមានកងទ័ពជើងទឹកអាមេរិក និងអង់គ្លេស វាយប្រហារតាមអាកាស ២លើកទៅលើខេត្ត Hodeidah របស់យ៉ែមែន

សារណា៖ ទូរទស្សន៍ al-Masirah TV គ្រប់គ្រងដោយក្រុមហួធី បានរាយការណ៍ឲ្យដឹងថា កាលពីល្ងាចថ្ងៃចន្ទ កងកម្លាំងចម្រុះដែលមានកងទ័ពជើងទឹក សហរដ្ឋអាមេរិក និងចក្រភពអង់គ្លេស បានធ្វើការវាយប្រហារតាមអាកាសចំនួន ២លើកទៅលើខេត្ត Hodeidah របស់ប្រទេសយ៉ែមែន ដោយផ្តោតលើស្រុក At-Tuhayta ស្ថិតនៅភាគនិរតីនៃខេត្តនេះ ។

នៅក្នុងរបាយការណ៍នេះមិនបាន ផ្តល់ព័ត៌មានលម្អិតបន្ថែមអ្វីនោះទេ ប៉ុន្តែអ្នកស្រុកនៅក្នុងស្រុកបាននិយាយ នៅលើបណ្តាញសង្គមថា ការផ្ទុះដ៏ខ្លាំងក្លាចំនួន២លើក បានរញ្ជួយដល់ផ្ទះរបស់ពួកគេ ។
ទីបញ្ជាការកណ្តាលរបស់សហរដ្ឋអាមេរិក មិនទាន់បានធ្វើអត្ថាធិប្បាយអំពី ឧប្បត្តិហេតុនេះនៅឡើយទេ ប៉ុន្តែជាធម្មតាបានចេញ សេចក្តីថ្លែងការណ៍មួយនៅពេលក្រោយ ដើម្បីបញ្ជាក់ពីការវាយប្រហារតាមផ្លូវអាកាសណាមួយ ដែលធ្វើឡើងដោយកងកម្លាំងរបស់ខ្លួន ។

ក្រុមឧទ្ទាម ហួធី ដែលគ្រប់គ្រងភាគច្រើន នៅភាគខាងជើងនៃប្រទេសយ៉ែមែន បាននិងកំពុងចាប់ផ្តើមធ្វើការ វាយប្រហារដោយគ្រាប់រ៉ុក្កែត និងយន្តហោះគ្មានមនុស្សបើក ប្រឆាំងនឹងអ៊ីស្រាអ៊ែល និងបានរំខានដល់ការដឹកជញ្ជូនទំនិញ “តភ្ជាប់ពីអ៊ីស្រាអ៊ែល” នៅក្នុងដែនសមុទ្រក្រហមគិតចាប់តាំងពីខែវិច្ឆិកា ឆ្នាំ២០២៣ ដោយបានអះអាងពីសាមគ្គីភាព ជាមួយពលរដ្ឋប៉ាឡេស្ទីន ចំពេលមានជម្លោះរវាងអ៊ីស្រាអ៊ែល និងក្រុមហាម៉ាស់ដែលកំពុងបន្តកើតមានឡើង ។

ជាការសងសឹក សម្ព័ន្ធកងទ័ពជើងទឹកដែលដឹកនាំ ដោយសហរដ្ឋអាមេរិកនៅក្នុងតំបន់ បាននិងកំពុងធ្វើការវាយឆ្មក់តាមអាកាស ជាប្រចាំទៅលើគោលដៅយោធារបស់ក្រុម ហួធី គិតចាប់តាំងពីខែមករា នៅក្នុងកិច្ចខិតខំប្រឹងប្រែង ដើម្បីរារាំងសកម្មភាពរបស់ក្រុមទាំងនេះ ៕