បរទេស៖ ទីភ្នាក់ងារសារព័ត៌មាន RIA របស់រុស្ស៊ីបានរាយការណ៍ថា ប្រធានាធិបតីអ៊ីរ៉ង់ លោក Masoud Pezeshkian នឹងធ្វើទស្សនកិច្ចនៅទីក្រុងមូស្គូ នៅថ្ងៃទី១៧ ខែមករា។
លោក Pezeshkian និងសមភាគីរុស្ស៊ី លោក Vladimir Putin ត្រូវបានគេរំពឹងថានឹងចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រក្នុងអំឡុងពេលទស្សនកិច្ច។
RIA បានប្រកាសដំណើរទស្សនកិច្ចនាពេលខាងមុខនេះនៅថ្ងៃព្រហស្បតិ៍ ដោយលើកឡើងពីឯកអគ្គរដ្ឋទូតអ៊ីរ៉ង់ប្រចាំនៅរុស្ស៊ី លោក Kazem Jalali។
លោក Pezeshkian បានធ្វើដំណើរចុងក្រោយទៅកាន់ប្រទេសរុស្ស៊ីក្នុងខែតុលា ដើម្បីចូលរួមកិច្ចប្រជុំកំពូល BRICS នៅទីក្រុង Kazan។
វិមានក្រឹមឡាំងបានឲ្យដឹងនៅពេលនោះថា ទំនាក់ទំនងរវាងអ៊ីរ៉ង់ និងរុស្ស៊ី កំពុងកើនឡើង ហើយថាពួកគេនឹងឈានដល់កម្រិតនៃភាពជាដៃគូយុទ្ធសាស្ត្រគ្រប់ជ្រុងជ្រោយ នាពេលអនាគត។
រដ្ឋមន្ត្រីការបរទេសរុស្ស៊ី លោក Sergey Lavrov បានឲ្យដឹងកាលពីចុងខែតុលាថា សន្ធិសញ្ញាកំណត់ភាពជាដៃគូនេះកំពុងត្រូវបានរៀបចំ ហើយវានឹងអនុញ្ញាតឱ្យកិច្ចសហប្រតិបត្តិការកាន់តែជិតស្និទ្ធក្នុងវិស័យការពារជាតិ រវាងទីក្រុងម៉ូស្គូ និងទីក្រុងតេអេរ៉ង់។
អាមេរិក និងសម្ព័ន្ធមិត្តបានចោទប្រកាន់អ៊ីរ៉ង់ថា ជាអ្នកផ្គត់ផ្គង់យន្តហោះគ្មានមនុស្សបើក មីស៊ីល និងសមាសធាតុពាក់ព័ន្ធដល់យោធារុស្ស៊ី សម្រាប់ប្រើប្រាស់ក្នុងជម្លោះអ៊ុយក្រែន ហើយបានដាក់ទណ្ឌកម្មលើក្រុមហ៊ុនជាច្រើន ដែលសន្មតថាពាក់ព័ន្ធនឹងបំពង់បង្ហូរអាវុធ។ ទីក្រុងមូស្គូ និងក្រុងតេអេរ៉ង់ទទូចថា គ្មានការផ្ទេរអាវុធបែបនេះកើតឡើងទេ។
លោក Putin និងលោក Pezeshkian បានពិភាក្សាគ្នាតាមទូរស័ព្ទនៅដើមខែនេះ ខណៈកងកម្លាំងជីហាដបានឈានទៅកាន់រដ្ឋធានី Damascus ប្រទេសស៊ីរី។ ខណៈពេលដែលរុស្ស៊ី និងអ៊ីរ៉ង់ គឺជាសម្ព័ន្ធមិត្តរបស់អតីតប្រធានាធិបតីស៊ីរី លោក Bashar Assad គ្មានប្រទេសណាមួយជ្រើសរើសធ្វើអន្តរាគមន៍ឡើយ នៅពេលដែលវាច្បាស់ថាលោក Assad គ្រោងនឹងចុះចាញ់អំណាចដោយសន្តិវិធី និងចាកចេញពីប្រទេស។
ឧបនាយករដ្ឋមន្ត្រីរុស្ស៊ីទទួលបន្ទុកដឹកជញ្ជូន លោក Vitaly Savelyev បានជួបជាមួយលោក Pezeshkian ក្នុងទីក្រុង Tehran កាលពីដើមសប្តាហ៍នេះ។
ភាគីទាំងពីរបានពិភាក្សាគ្នាអំពីគម្រោងផ្លូវដែក Rasht-Astara ដែលនៅពេលបញ្ចប់នឹងតភ្ជាប់ខ្សែរថភ្លើងដែលមានស្រាប់ក្នុងប្រទេស Azerbaijan អ៊ីរ៉ង់ រុស្ស៊ី និងឥណ្ឌា។
