រដ្ឋមន្ត្រីអប់រំកម្ពុជា ជួបពិភាក្សាការងារជាមួយ ប្រធានផ្នែកកិច្ចសហប្រតិបត្តិការអប់រំ បណ្ដុះបណ្ដាលបច្ចេកទេសនិងវិជ្ជាជីវៈ និងការអប់រំថ្នាក់ឧត្តមសិក្សានៃស្ថាប័ន France Education International

ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា នាថ្ងៃទី១០ ខែធ្នូ ឆ្នាំ២០២៤ បានទទួលជំនួបសម្តែងការគួរសម និងពិភាក្សាការងារជាមួយលោក Stéphane LOPEZ ប្រធានផ្នែកកិច្ចសហប្រតិបត្តិការអប់រំ បណ្ដុះបណ្ដាលបច្ចេកទេសនិងវិជ្ជាជីវៈ និងការអប់រំថ្នាក់ឧត្តមសិក្សា នៃស្ថាប័ន France Education International ក្នុងអំឡុងពេលនៃការចូលរួមកម្មវិធី “ការផ្សព្វផ្សាយកម្មវិធីផ្តល់អាហារូបករណ៍ Erasmus+” នៅសាកលវិទ្យាល័យអង្គរ ខេត្តសៀមរាប។ ជំនួបពិភាក្សានេះ ក៏មានការចូលរួមពីសំណាក់ថ្នាក់ដឹកនាំ និងមន្ត្រីពាក់ព័ន្ធនៃក្រសួងអប់រំ យុវជន និងកីឡាផងដែរ។

នៅក្នុងជំនួបសម្តែងការគួរសម និងពិភាក្សាការងារនេះ ឯកឧត្តមបណ្ឌិតសភាចារ្យ ឧបនាយករដ្ឋមន្រ្តី និង លោក Stéphane LOPEZ បានពិភាក្សាផ្ដោតលើវឌ្ឍនភាពនៃកិច្ចសហប្រតិបត្តិការក្នុងក្របខ័ណ្ឌគម្រោង “សម្ព័ន្ធមេត្រីភាពកម្ពុជា-អឺរ៉ុប “Twinning” លើកំណែទម្រង់ការអប់រំបច្ចេកទេសមធ្យមសិក្សាទុតិយភូមិនៅកម្ពុជា” (Cambodia-EU Twinning Project: Supporting Upper-Secondary Technical Education Reforms in Cambodia) ព្រមទាំងការបញ្ជាក់ពីបេសកកម្មនៃស្ថាប័ន France Education International ដែលជាស្ថាប័នមួយចូលរួមក្នុងការលើកកម្ពស់គុណភាពនៃវិស័យអប់រំ។ ជាមួយគ្នានេះ ការសិក្សាពីលទ្ធភាពនៃការរៀបចំគម្រោងសហប្រតិបត្តិការនានា ដោយផ្ដោតលើការលើកកម្ពស់គុណភាពវិស័យអប់រំនៅគ្រប់កម្រិតសិក្សា ការធ្វើអធិការកិច្ចគុណភាពអប់រំ និងការពង្រឹងបន្ថែមលើវិធីសាស្ត្របង្រៀន ត្រូវបានលើកយកមកជជែកពិភាក្សាក្នុងជំនួបនេះ។

បន្ថែមពីនេះ ការពង្រឹងទំនាក់ទំនងរវាងកម្ពុជា និងបារាំង នៅក្នុងវិស័យអប់រំពាក់ព័ន្ធនឹងការបណ្ដុះបណ្ដាលបច្ចេកទេសនិងវិជ្ជាជីវៈ និងការអប់រំថ្នាក់ឧត្តមសិក្សា ព្រមទាំងការសិក្សាពីលទ្ធភាពនៃការធ្វើចល័តភាពគ្រូបង្រៀនភាសាបារាំង និងមន្ត្រីក្រសួងអប់រំ យុវជន និងកីឡាកម្ពុជាទៅបណ្ដុះបណ្ដាល និងធ្វើទស្សនកិច្ចនៅប្រទេសបារាំង និងបញ្ជូនគ្រូបង្រៀនបារាំងមកប្រទេសកម្ពុជា ស្របពេលដែលកម្ពុជាកំពុងត្រៀមលក្ខណៈធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីក្នុងឆ្នាំ២០២៦ ក៏ជាប្រធានបទសំខាន់នៃជំនួបពិភាក្សានេះដែរ ៕