ប្រមុខរាជរដ្ឋាភិបាលកម្ពុជា៖ សន្តិភាពអាចសម្រេចបាន តែតាមរយៈការដោះស្រាយជម្លោះដោយសន្តិវិធី ដោយផ្អែកលើការសន្ទនា ការពិគ្រោះយោបល់ និងអភិក្រមឈ្នះឈ្នះ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា, អនុប្រធានគណបក្សប្រជាជនកម្ពុជា និងជាប្រធានមហាសន្និបាតសន្និសីទអន្តរជាតិ នៃបណ្តាគណបក្សនយោបាយនៅអាស៊ីលើកទី១២ (ICAPP) បានថ្លែងថា សន្ដិភាព អាចសម្រេចទៅបានតែតាមរយៈការដោះស្រាយដោយសន្ដិវិធី ផ្អែកលើការសន្ទនា, ការពិគ្រោះយោបល់ និងអភិក្រមឈ្នះឈ្នះ។
ក្នុងពិធីបើកមហាសន្និបាត សន្និសីទអន្តរជាតិ នៃបណ្តាគណបក្សនយោបាយនៅអាស៊ីលើកទី១២ (ICAPP) នៅថ្ងៃទី២២ ខែវិច្ឆិកា ឆ្នាំ២០២៤នេះ សម្ដេចមហាបវរធិបតី បានលើកឡើងថា ការពង្រឹងការ ការពារជាតិ គឺជាសិទ្ធិ និងអធិបតេយ្យភាពរបស់ប្រទេសនីមួយៗ ប៉ុន្តែកិច្ចការនេះមិនគួរធ្វើឲ្យបាត់តម្លៃ នៃការប្តេជ្ញាចិត្តក្នុងការសន្ទនា និងការដោះស្រាយបញ្ហាដោយសន្តិវិធីនោះទេ។
សម្ដេចធិបតីសង្កត់ធ្ងន់ថា «សន្តិភាពអាចសម្រេចបាន តែតាមរយៈការដោះស្រាយជម្លោះដោយសន្តិវិធី ដោយផ្អែកលើការសន្ទនា, ការពិគ្រោះយោបល់ និងអភិក្រមឈ្នះឈ្នះ។ ពិតណាស់ថា ការពង្រឹងការការពារជាតិ គឺជាសិទ្ធិ និងអធិបតេយ្យភាពរបស់យើង ប៉ុន្តែកិច្ចការនេះមិនគួរធ្វើឲ្យបាត់តម្លៃ នៃការប្តេជ្ញាចិត្តរបស់យើងក្នុងការសន្ទនា និងការដោះស្រាយបញ្ហាដោយសន្តិវិធីនោះទេ»។
សម្ដេចមហាបវរធិបតី គូសបញ្ជាក់បន្ថែមថា ដើម្បីរក្សាសន្តិភាព ដែលកំពុងទទួលអំណរសាទរដូចសព្វថ្ងៃឲ្យមានចីរភាព ទាមទារឲ្យមានការថែទាំសន្តិភាពជារៀងរាល់ថ្ងៃ។ សម្ដេចបានសង្កត់ធ្ងន់ថា ការផ្សះផ្សាជាមួយគូសត្រូវ ដូចអ្វីដែលសម្តេចតេជោ ហ៊ុន សែន បានបង្ហាញតាមសក្ខីភាពជាក់ស្តែង គឺជាកម្លាំងមិនមែនជាចំណុចខ្សោយនោះទេ ៕
