ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានបញ្ជាក់ថា រយៈពេល២៥ឆ្នាំមកនេះ កម្ពុជាមិនដែលធ្វើការអភិវឌ្ឍណាមួយឱ្យបាត់បង់ទឹកដីនោះទេ។
ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ ទំនប់អូតេធិបតី, ទំនប់សែនសុខដុម និងទំនប់សែនមនោរម្យ ក្នុងខេត្តមណ្ឌលគិរី នាព្រឹកថ្ងៃទី២៤ ខែតុលា ឆ្នាំ២០២៤នេះ សម្តេចធិបតី ហ៊ុន ម៉ាណែត បានមានប្រសាសន៍ថា ក្រុមអ្នកនយោបាយជ្រុលនិយមមួយក្ដាប់តូច នៅតែបន្តលើកឡើងបំភ្លៃការពិត ដើម្បីតែកេញចំណេញនយោបាយរបស់ពួកគេ លើកិច្ចសហប្របត្តិការអភិវឌ្ឍខេត្តភូមិភាគឦសាននេះ។
សម្ដេចធិបតី បានបញ្ជាក់ជាថ្មីម្តងទៀតថា ការដាក់តំបន់អភិវឌ្ឍន៍ក្នុងក្របខណ្ឌត្រីកោណ CLV គឺជាការដាក់ដើម្បីអភិវឌ្ឍន៍ប្រទេស ជំរុញការអនុវត្តនៅតំបន់ភូមិភាគឦសាន្ត មិនមែនដាក់តំបន់អភិវឌ្ឍន៍នេះ ដើម្បីកាត់ខេត្តឲ្យប្រទេសណាមួយនោះឡើយ។
ជាមួយគ្នានោះ សម្ដេចធិបតី នាយករដ្ឋមន្រ្ដី ក៏បានសម្ដែងការសោកស្ដាយចំពោះក្រុមអ្នកនយោបាយជ្រុលនិយមនៅក្រៅប្រទេស ដែលបំភ្លៃការពិត ញុះញង់ពលរដ្ឋពាក់ព័ន្ធនឹងកិច្ចសហប្របត្តិការអភិវឌ្ឍ កម្ពុជា ឡាវ វៀតណាម ឈានទៅបង្កើតចលនាផ្ដួលរំលំរាជរដ្ឋាភិបាល កាលពីថ្ងៃទី១៨ ខែសីហា ឆ្នាំ២០២៤ កន្លងទៅ ខណៈកិច្ចសហប្រតិបត្តិការនេះ ពេលឯកភាពនៅក្នុងរដ្ឋសភាពួកគេក៏មានវត្តមានក្នុងនោះដែរ ៕
