ឯកឧត្ដម តាន់ ហ្សង់ហ្វ្រង់ស័រ៖ ចំពោះសមុទ្រចិនខាងត្បូង កម្ពុជានៅរក្សាជំហរឥតងាករេ គឺការចង់ឃើញសមុទ្រចិនខាងត្បូង ត្រូវតែជាសមុទ្រសន្តិភាព

ភ្នំពេញ៖ ឯកឧត្ដម តាន់ ហ្សង់ហ្វ្រង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការការបរទេស និងសហប្រតិបត្តិការអន្តរជាតិ បានបញ្ជាក់ថា ជំហររបស់ភាគីកម្ពុជា ដែលបញ្ជាក់ដោយសម្តេចបវរធិបតី ហ៊ុន ម៉ាណែត​ ក្នុងកិច្ចប្រជុំកំពូលអាស៊ាន ចំពោះបញ្ហាឧបទ្វីបកូរ៉េ ជម្លោះសមុទ្រចិនខាងត្បូង ជម្លោះនៅមជ្ឈិមបូព៌ា ក៏ដូចជានយោបាយចិនមួយ។

ក្នុងសន្និសីទសារព័ត៌មានស្ដីពីលទ្ធផលរបស់សម្តេចបវរធិបតី ហ៊ុន ម៉ាណែត និងលោកជំទាវបណ្ឌិត ដែលចូលរួមក្នុងកិច្ចប្រជុំកំពូលអាស៊ានលើកទី៤៤ និង៤៥ (ថ្ងៃទី៩-១១ ខែតុលា ២០២៤) នៅប្រទេសឡាវ​ នៅយប់ថ្ងៃទី១១ ខែតុលានេះ ឯកឧត្ដម តាន់ ហ្សង់ហ្វ្រង់ស័របានឱ្យដឹងថា ចំពោះបញ្ហាសមុទ្រចិនខាងត្បូងមិនមែនទើបតែកើតឡើងនោះទេ បញ្ហានៅឧបទ្វីបកូរ៉េដែលមានអស្ថិរភាពធ្ងន់ធ្ងរ ក៏មិនមែនកើតឡើងទើបតែ១០ឆ្នាំមុននេះទេ ជម្លោះនៅមជ្ឈិមបូព៌ាក៏មិនមែនកើតឡើងកាលពីអាទិត្យមុននេះទេ ផ្ទុយទៅវិញបញ្ហាធំៗទាំងអស់នេះមិនងាយនឹងរកដំណោះស្រាយបានទេ។

ឯកឧត្ដមបន្តថា ដោយសារតែវេទិកានៃជំនួបកំពូលអាស៉ីបូព៌ា ប្រមូលផ្ដុំទៅដោយមហាអំណាចធំៗ បូករួមនឹងបណ្ដាប្រទេសទាំង១០របស់អាស៊ាន ដែលជាស្នូលក្នុងជំនួបកំពូលអាស៊ាន ស្នូលនៃជំនួបកំពូលអាស៊ានបូក១ ស្នូលនៃជំនួបកំពូលអាស៊ានបូក៣ ស្នូលនៃជំនួបកំពូលអាស៉ីបូព៌ាផងនោះ ដូច្នេះចង់ឬមិនចង់វេទិកាទាំងនេះ គឺក្លាយជាទីតាំងមួយដែលចក្ខុរបស់ពិភពលោកផ្ដោតលើមេដឹកនាំធំៗ រដ្ឋបុរសធំៗមកពីជុំវិញពិភពលោក និងនៅក្នុងតំបន់ ថាតើពួកគេលើកយកប្រធានបទអ្វីមកនិយាយ ហើយការដោះស្រាយបានប៉ុនណា។

ឯកឧត្ដមរដ្ឋមន្ត្រីប្រតិភូអមនាយករដ្ឋមន្ត្រីបានបញ្ជាក់ថា “ជំហររបស់ប្រទេសកម្ពុជានៅចំពោះមុខបញ្ហាសមុទ្រចិនខាងត្បូង ភាគីកម្ពុជាពុំដែលកែប្រែជំហររបស់ខ្លួននោះទេ គឺនៅរក្សាជំហរឥតងាករេ ពោលគឺការចង់ឃើញសមុទ្រចិនខាងត្បូង ត្រូវតែជាសមុទ្រសន្តិភាព សមុទ្រស្ថិរភាព និងសមុទ្រវិបុលភាព។ ដូចគ្នាដែរ កម្ពុជាបានបន្តអនុវត្តខ្លឹមសារពេញលេញទាំងស្រុង នៃសេចក្ដីថ្លែងការណ៍ប្រតិបត្តិរបស់បណ្ដាភាគី (DOC) ហើយកម្ពុជានៅតែចង់ឃើញការសម្រេចឱ្យបានឆាប់ៗបំផុតនូវអ្វីដែលគេហៅថា ក្រមប្រតិបត្តិនៃសមុទ្រចិនខាងត្បូង (COC)។ តែយ៉ាងណា បញ្ហានេះនៅតែពិបាកនឹងបោះពួយទៅមុខ គឺមានតែលើកយកមកពិភាក្សារៀងរាល់ឆ្នាំ ដើម្បីរកដំណោះស្រាយរួមគ្នា ជាជាងមិនធ្វើអ្វីទាំងអស់”។

ឯកឧត្ដម តាន់ ហ្សង់ហ្វ្រង់ស័រ បានបន្តទៀតថា ចំពោះបញ្ហានៅឧបទ្វីបកូរ៉េ ក៏ភាគីកម្ពុជាឥតកែប្រែជំហរនោះដែរ តួយ៉ាង សម្ដេចបវរធិបតី ហ៊ុន ម៉ាណែត បានថ្លែងរួចមកហើយថា កម្ពុជាចង់ឱ្យភាគីពាក់ព័ន្ធសន្ទនាគ្នាដោយសន្តិវិធី ដើម្បីឱ្យឧបទ្វីបកូរ៉េមានសន្តិភាព មានស្ថិរភាព ពិសេសគឺគ្មានអាវុធនុយក្លេអ៊ែរ។
ស្ដីពីជម្លោះនៅមជ្ឈិមបូព៌ាវិញ សម្ដេចបវរធិបតី ហ៊ុន ម៉ាណែត ក៏បានថ្លែងរួចហើយដែរ គឺកម្ពុជានៅតែជឿជាក់ថា «បើគ្មានដំណោះស្រាយរដ្ឋពីរទេនោះ (ប៉ាឡេស្ទីន និង អ៉ីស្រាអែល) នឹងនៅតែគ្មានសន្តិភាពឡើយ»៕