ប្រមុខរាជរដ្ឋាភិបាល ពេញចិត្តចំពោះការអភិវឌ្ឍសហគមន៍កសិកម្មទំនើប របស់ក្រសួងកសិកម្ម និងមានបំណងចង់ចុះទៅពិនិត្យដោយផ្ទាល់
ភ្នំពេញ៖ ថ្លែងក្នុងឱកាសអញ្ជើញបិទវេទិកាស្រូវអង្ករកម្ពុជា លើកទី៧ ឆ្នាំ២០២៤ នៅរសៀលថ្ងៃទី១០ ខែកញ្ញា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបង្ហាញការពេញចិត្តចំពោះការអភិវឌ្ឍសហគមន៍កសិកម្មទំនើប របស់ក្រសួងកសិកម្ម រុក្ខាប្រម៉ាញ់ និងនេសាទ និងមានបំណងចង់ចុះទៅពិនិត្យដោយផ្ទាល់ផងដែរ។
សម្តេចធិបតី ហ៊ុន ម៉ាណែត បានថ្លែងថា សម្រាប់ការអភិវឌ្ឍសហគមន៍កសិកម្មបែបទំនើប សម្តេចបានឃើញនូវវិធីសាស្ត្រក្នុងក្នុងការចងក្រង ហើយឃើញក្រសួងកសិកម្មចុះសាកល្បងផ្សព្វផ្សាយច្រើន ហើយថ្ងៃណាមួយខ្ញុំចង់ទៅមើលដែរ របៀបធ្វើផ្ទះសំណាញ់ និងរបៀបធ្វើយ៉ាងមិចដើម្បីបង្កើនប្រសិទ្ធភាព និងប្រសិទ្ធផលជូនប្រជាពលរដ្ឋ ដែលយើងបានធ្វើ។
សម្តេចធិបតី បានបន្តថា កម្មវិធីគោលនយោបាយនេះបាននឹងកំពុងអនុវត្តន៍យ៉ាងសកម្ម ហើយរដ្ឋាភិបាលក៏មានកម្មវិធីហិរញ្ញប្បទានចំនួន ១០០លានដុល្លារសម្រាប់រក្សាលំនឹងកសិកម្ម តាមរយៈធនាគារអភិវឌ្ឍន៍ជនបទ និងកសិកម្ម ហើយចាប់ពីខែមីនា ឆ្នាំ២០២៤កន្លងនេះ បានចាប់ផ្តើមអនុវត្តន៍គម្រោងនេះលើទំហំទឹកប្រាក់ ៤០លានដុល្លារ និងបានសម្រេចគោលដៅបាន ២៨លានដុល្លារ និងគម្រោងបន្ថែមហិរញ្ញប្បទានសម្រាប់រដូវប្រមូលផល សម្រាប់ស្រូវវស្សានាពេលខាងមុខនេះផងដែរ។
សម្តេចធិបតី បានបន្ថែមថា គិតមកដល់ពេលនេះការអភិវឌ្ឍសហគមន៍កសិកម្មបែប ទំនើប បានអនុវត្តគ្រប់ដណ្តប់លើផ្ទៃដីជិត ២ពាន់ហិចតា នៅក្នុងដំណាក់កាលតំបូងនេះ និងសូមបន្ត ធ្វើយ៉ាងណាដើម្បីឱ្យរីកកាន់តែច្រើនបន្ថែមទៀត ទោះបីការវិនិយោគថ្លៃ តែដើម្បីឱ្យការទទួលផលក្នុងរយៈពេលវែងបានកាន់តែល្អប្រសើរ។
សម្តេចធិបតី ហ៊ុន ម៉ាណែត បានបញ្ជាក់ថា ក្រៅពីនេះរាជរដ្ឋាភិបាលក៏បានជំរុញការអភិវឌ្ឍលើប្រព័ន្ធធារាសាស្ត្រ តាមរយៈការរៀបចំទំនប់ប្រឡាយ និងទំនប់ទឹកជាច្រើនទៀត។ សម្តេចធិបតី បានបញ្ជាក់បន្ថែមថា ក្នុងវិច្ឆិកាខាងមុខនេះ សម្តេចនឹងអញ្ជើញទៅសម្ពោធទំនប់ទឹកមួយកន្លែងនៅខេត្តមណ្ឌលគិរី ដែលមានសមត្ថភាពអាចស្តុបទឹកទុកបានប្រមាណ ១.២លានម៉ែត្រគីប សម្រាប់ទុកទឹកជូនប្រជាពលរដ្ឋប្រើប្រាស់ និងមានការរៀបចំប្រព័ន្ធធារាសាស្ត្រជាច្រើនទៀត ដើម្បីស្តុបទឹកទុកជួយដល់កសិករផងដែរ ៕
