អភិបាលខេត្តឧត្តរមានជ័យ៖ បញ្ហាប្រឈមក្តីកង្វល់ សំណើរ សំណូមពរ និងទំនាស់ផ្សេងៗរបស់ប្រជាពលរដ្ឋ គឺត្រូវបានយកចិត្តទុកដាក់ខ្ពស់ និងជាកិច្ចការអាទិភាព

ភ្នំពេញ៖ ឯកឧត្តម មាន ចាន់យ៉ាដា អភិបាល នៃគណៈអភិបាលខេត្តឧត្តរមានជ័យ បានលើកឡើងថា បញ្ហាប្រឈមក្តីកង្វល់ សំណើ សំណូមពរ និងទំនាស់ផ្សេងៗរបស់បងប្អូនប្រជាពលរដ្ឋ គឺត្រូវបានយកចិត្តទុកដាក់ខ្ពស់ និងជាកិច្ចការអាទិភាពដែលរដ្ឋបាលខេត្តបាន និងកំពុងជំរុញ និងលើកកម្ពស់ការដោះស្រាយទំនាស់ទាំងឡាយក្រៅប្រព័ន្ធតុលាការ។

ឯកឧត្ដមបានលើកឡើងបែបនេះនាព្រឹកថ្ងៃទី១៤ ខែសីហា ឆ្នាំ២០២៤ ក្នុងជំនួបជាមួយ ឯកឧត្តម សរ ចំរុង ប្រធានគណៈកម្មការសិទ្ធិមនុស្ស ទទួលពាក្យបណ្ដឹងនិងអង្កេត និងអធិការកិច្ច នៃរដ្ឋសភា និងប្រតិភូអមដំណើរ ដែលចុះជួបសំណេះសំណាល និងពិភាក្សាការងារដើម្បីស្វែងយល់អំពីវឌ្ឍនភាពការងារ និងយន្តការដោះស្រាយទំនាស់ដីធ្លីរបស់អាជ្ញាធរខេត្ត ។

ឯកឧត្តម មាន ចាន់យ៉ាដា អភិបាល នៃគណៈអភិបាលខេត្ត បានទទួលស្វាគមន៍ និងជម្រាបជូនគណៈប្រតិភូ រដ្ឋបាលខេត្តបានអនុវត្តតាមគោលនយោបាយ និងយន្តការច្បាប់របស់រាជរដ្ឋាភិបាលកម្ពុជា ដែលរដ្ឋសភាបានអនុម័តដាក់ឱ្យអនុវត្ត និងយន្តការផ្សេងៗដែលបានដាក់ចេញ។

ឯកឧត្តមបានបញ្ជាក់ថា “ចំពោះបញ្ហាប្រឈមក្តីកង្វល់ សំណើ សំណូមពរ និងទំនាស់ផ្សេងៗរបស់បងប្អូនប្រជាពលរដ្ឋ គឺត្រូវបានយកចិត្តទុកដាក់ខ្ពស់ និងជាកិច្ចការអាទិភាពដែលរដ្ឋបាលខេត្តបាន និងកំពុងជំរុញ និងលើកកម្ពស់ការដោះស្រាយទំនាស់ទាំងឡាយក្រៅប្រព័ន្ធតុលាការ ដែលមាន ៣ថ្នាក់ ទាំងថ្នាក់ ឃុំ ថ្នាក់ក្រុងស្រុក និងថ្នាក់ខេត្ត”។

ឯកឧត្តម មាន ចាន់យ៉ាដា បានបន្ថែមថា ក្រៅពីនេះរដ្ឋបាលខេត្តក៏មានយន្តការដោះស្រាយតាមរយៈលេខាធិការដ្ឋានសុរិយោដីខេត្ត ក៏ដូចជាយន្តការដោះស្រាយតាមរយៈគណៈកម្មការជាតិដោះស្រាយទំនាស់ដីធ្លី ដែលរដ្ឋបាលខេត្តបានយកចិត្តទុកដាក់ និងមិនមើលរំលង។ ក្នុងករណីការប្រើប្រាស់យន្តការទាំងអស់ខាងលើនៅតែពុំអាចដោះស្រាយបាន នោះរដ្ឋបាលខេត្តក៏និងប្រើប្រាស់យន្តការចុងក្រោយ គឺយន្តការដោះស្រាយតាមប្រព័ន្ធតុលាការ។

ឯកឧត្តមអភិបាលខេត្តបានបញ្ជាក់ថា តាមរយៈការប្រើប្រាស់នូវយន្តការដោះស្រាយទំនាស់ខាងលើ រដ្ឋបាលខេត្តបានដោះស្រាយបានជាច្រើនករណី និងជាច្រើនសំណុំរឿងជូនដល់បងប្អូនប្រជាពលរដ្ឋនៅក្នុងខេត្តឧត្តរមានជ័យ។ ក្នុងនោះដែររដ្ឋបាលខេត្តក៏កំពុងតែប្រឹងប្រែងបន្តដោះស្រាយបញ្ហាដែលនៅសេសសល់តាមរយៈយន្តការដែលយើងបានអនុវត្តកន្លងមកជូនដល់បងប្អូនប្រជាពលរដ្ឋផងដែរ៕