ឧត្តមសេនីយ៍ទោ សោម ស៊ុន អមដំណើរឯកឧត្តមទេសរដ្ឋមន្ត្រី គន់ គីម ពិនិត្យស្ថានភាពជំនន់ទឹកភ្លៀង និងផលប៉ះពាល់ នៅក្នុងភូមិសាស្ត្រខេត្តកំពង់ធំ

ភ្នំពេញ៖ នៅព្រឹកថ្ងៃទី៣ ខែសីហា ឆ្នាំ២០២៤​ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានដឹកនាំកងកម្លាំង អមដំណើរឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម អនុប្រធានទី១ នៃគណៈកម្មាធិការជាតិ គ្រប់គ្រងគ្រោះមហន្តរាយ និងឯកឧត្តម នួន ផារ័ត្ន អភិបាលខេត្តកំពង់ធំ ត្រួតពិនិត្យស្ថានភាពជំនន់ទឹកភ្លៀងនៅឃុំព្រៃគុយ ក្នុងភូមិសាស្ត្រស្រុកកំពង់ស្វាយ និងសង្កាត់ស្រយ៉ូវ ក្នុងភូមិសាស្ត្រក្រុងស្ទឹងសែន ខេត្តកំពង់ធំ ។

លោក ប៉ែន វណ្ណារិទ្ធ ប្រធានមន្ទីរកសិកម្មរុក្ខាប្រមាញ់ និងនេសាទ​ខេត្តកំពង់ធំ បានបញ្ជាក់ថា ក្នុងរយៈពេលប៉ុន្មានថ្ងៃកន្លងមកនេះ ភ្លៀងបានធ្លាក់ជាប់ៗគ្នា ទាំងនៅក្នុងភូមិសាស្ត្រខេត្តកំពង់ធំ ក៏ដូចជានៅខេត្តព្រះវិហារ បណ្ដាលឱ្យជំនន់ទឹកភ្លៀង ធ្លាក់មកគំហុក ធ្វើឱ្យប៉ះពាល់ដល់ដំណាំស្រូវរបស់ប្រជាកសិករ ជាច្រើនពាន់ហិកតា ហើយកំពុងរងផលប៉ះពាល់ធ្ងន់ធ្ងរ ចំនួនជាង៣ពាន់ហិកតា ដែលបច្ចុប្បន្ននេះប្រជាកសិករកំពុងសម្រុកប្រមូលផល ដែលត្រូវលិចលង់នេះ បានមួយចំនួន ។

ឯកឧត្តម នួន ផារ័ត្ន អភិបាលខេត្តកំពង់ធំ បានមានប្រសាសន៍ថា បច្ចុប្បន្នអាជ្ញាធរខេត្ត រួមជាមួយក្រសួងធនធានទឹក និងឧតុនិយម បានកំពុងចាត់ការទប់ស្កាត់ទឹកនៅកន្លែងមួយចំនួន ដើម្បីពន្យាពេលកុំឲ្យជំនន់ទឹកភ្លៀងហូរខ្លាំង ទុកពេលវេលាដើម្បីឲ្យប្រជាកសិករដែលកំពុងរងផលប៉ះពាល់ធ្ងន់ធ្ងរ ប្រមូលផលស្រូវដំណាំពីជំនន់ទឹកភ្លៀង បានមួយចំណែកផងដែរ។

ឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម បានជំរុញឲ្យអាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធ ត្រូវរួមគ្នាអនុវត្តនូវវិធានការចាំបាច់មួយចំនួន ដើម្បីបង្កលក្ខណៈឱ្យបងប្អូនប្រជាកសិកររបស់យើងប្រមូលផលស្រូវ ដែលមិនទាន់មានការខូចខាតដើម្បីដោះស្រាយស្រោចស្រង់ស្ថានការណ៍ ដែលកំពុងលិចលង់ខូចខាតនេះឲ្យបានជាអតិបរិមា ដើម្បីសម្រាលដល់ការខាតបង់របស់បងប្អូនប្រជាកសិកររបស់យើង។

ឯកឧត្តមទេសរដ្ឋមន្ត្រីនាយឧត្តមសេនីយ៍ គន់ គីម បានអំពាវនាវដល់ប្រជាពលរដ្ឋនៅក្នុងខេត្តកំពង់ធំ ពិសេសនៅតាមបណ្ដោយដងស្ទឹងសែន ត្រូវមានការប្រុងប្រយ័ត្នខ្ពស់ ត្រូវថែរក្សាសុខភាព និងបង្កាការពារ ទប់ស្កាត់នូវការខូចខាតបាត់បង់ទ្រព្យសម្បត្តិ និងអាយុជីវិតក្នុងពេលដែលជំនន់ទឹកភ្លៀងកើតឡើងនេះ។ ជាមួយនោះដែរក៏បានឲ្យថ្នាក់ដឹកនាំខេត្តកំពង់ធំ រួមជាមួយស្ថាប័នជំនាញពាក់ព័ន្ធ ពិនិត្យត្រៀមលក្ខណ:ជួសជុលការជួសជុល និងស្ថាបនាផ្លូវ ដែលខូចខាតក្នុងរដូវទឹកជន់នេះ នៅពេលរដូវទឹកសម្រកខាងមុខ។

ជាមួយនោះដែរក៏បានដាក់បទបញ្ជាដល់ឧត្តមសេនីយ៍ទោ សោម ស៊ុន មេបញ្ជាការ​តំបន់ប្រតិបត្តិការសឹករងកំពង់ធំ ត្រូវត្រៀមបម្រុងកម្លាំង ដើម្បីជួយអន្តរាគមន៍តាមការចាំបាច់នានា ដែលអាជ្ញាធរដែនដី និងប្រជាពលរដ្ឋត្រូវការ៕