សមាជិកសភាកម្ពុជា ចូលរួមវេទិកាត្រីភាគី ស្តីពីការកសាងសេដ្ឋកិច្ចឌីជីថលក្នុងអាស៊ាន ប្រកបដោយភាពរស់រវើក និងពិធីសម្ពោធជាផ្លូវការ AIPA Lync-Digital Law Library នៅព្រុយណេ

ភ្នំពេញ៖ ឯកឧត្តមបណ្ឌិត លី​ ឆេង អនុប្រធានគណៈកម្មការទី៩ នៃរដ្ឋសភា នាថ្ងៃទី១០ ខែមិថុនា ឆ្នាំ២០២៤ បានដឹកនាំគណៈប្រតិភូរដ្ឋសភាកម្ពុជា ដោយមានការអញ្ជើញចូលរួមពី ឯកឧត្តម សន សារ៉ាណា សមាជិកគណៈកម្មការទី៥ នៃរដ្ឋសភា ចូលរួមវេទិកាត្រីភាគីស្តីពី ”ការកសាងសេដ្ឋកិច្ចឌីជីថលក្នុងអាស៊ានប្រកបដោយភាពរស់រវើក៖ យុទ្ធសាស្រ្តសម្រាប់ភាពធន់នឹងអ៉ិនធឺណិត និងវិបុលភាពរួមគ្នា” និង “ពិធីសម្ពោធដាក់ឱ្យប្រើជាផ្លូវការគេហទំព័របណ្ណាល័យច្បាប់ឌីជីថល និងកម្មវិធី AIPA Lync (AIPA Lync-Digital Law Library) របស់លេខាធិការដ្ឋានអាយប៉ា” នៅទីក្រុងបានដាស៊េរីបេហ្កាវ៉ាន់ នៃប្រទេសព្រុយណេដារូស្សាឡាម។

វេទិកានេះ ក៏មានការអញ្ជើញជាអធិបតីដោយ ឯកឧត្តម Dato Seri Setia Dr. Awang Haji Mohd Amin Liew Abdullah រដ្ឋមន្ត្រីប្រចាំការការិយាល័យនាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ និងសេដ្ឋកិច្ច ទី២ នៃប្រទេសព្រុយណេ និងលោកជំទាវ Ar. Siti Rozaimeriyanty Dato Haji Abdul Rahman អគ្គលេខាធិការអាយប៉ា ព្រមទាំងថ្នាក់ដឹកនាំជាន់ខ្ពស់ ជាតំណាងសភានៃប្រទេសជាសមាជិកអាស៊ាន អ្នករៀបចំគោលនយោបាយ តំណាងរដ្ឋាភិបាល អ្នកដឹកនាំធុរកិច្ច និងដៃគូអភិវឌ្ឍអន្តរជាតិសំខាន់ៗ សរុបប្រមាណជាង៣០០នាក់។

សូមជម្រាបជូនថា វេទិកាត្រីភាគីនេះ ត្រូវបានរៀបចំឡើងដោយ លេខាធិការដ្ឋានអាយប៉ា សហការជាមួយក្រុមប្រឹក្សាភិបាលធុរកិច្ចអាស៊ាននៃប្រទេសព្រុយណេ និងក្រុមប្រឹក្សាភិបាលធុរកិច្ច APEC នៃប្រទេសព្រុយណេ ព្រមទាំងមានការគាំទ្រពីក្រុមប្រឹក្សានីតិប្បញ្ញត្តិនៃប្រទេសព្រុយណេ និងវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA)។