រដ្ឋបាលខេត្តស្ទឹងត្រែង ប្រារព្ធទិវាវប្បធម៌ជាតិ ៣មីនា លើកទី២៦ ឆ្នាំ២០២៤ ក្រោមប្រធានបទ “យុវជនដើម្បីវប្បធម៌ជាតិ”

ភ្នំពេញ៖ នៅរសៀលថ្ងៃទី២៤ ខែមេសា ឆ្នាំ២០២៤លោក ថោង ស្រាន់ អភិបាលរង នៃគណអភិបាលខេត្តស្ទឹងត្រែង និង លោកជំទាវ កង សាវ៉ន សមាជិកក្រុមប្រឹក្សាខេត្ត បានអញ្ជើញជាធិបតីភាព ប្រារព្ធទិវាវប្បធម៌ជាតិ ៣មីនា លើកទី ២៦ ឆ្នាំ ២០២៤ ក្រោមប្រធានបទ “យុវជនដើម្បីវប្បធម៌ជាតិ” ដែលបានរៀបចំឡើងដោយរដ្ឋបាលខេត្ត សហការជាមួយមន្ទីរវប្បធម៌ និងវិចិត្រសិល្បៈខេត្តស្ទឹងត្រែង នៅសាលប្រជុំធំ សាលាខេត្តស្ទឹងត្រែង។

ក្នុងនោះក៏មានការអញ្ជើញចូលរួម លោក-លោកស្រី ដែលជា ប្រធាន-អនុប្រធានមន្ទីរ/អង្គភាពជុំវិញខេត្ត យុវជន ស.ស.យ.ក លោកគ្រូ -អ្នកគ្រូ សិស្ស/និស្សិត ក្រុមសិល្បៈមន្ទីរវប្បធម៌ខេត្ត និងអ្នកពាក់ព័ន្ធផងដែរ។

មានប្រសាសន៍ស្វាគមន៍ក្នុងអង្គពិធី លោកស្រី ញោច សារឿន ប្រធានមន្ទីរវប្បធម៌ខេត្តបានបញ្ជាក់ថា ឆ្នាំនេះ ជាលើកទី២៦ នៃការប្រារព្ធទិវាវប្បធម៌ ហើយរយៈពេល ៩ ឆ្នាំកន្លងមកនេះ ទិវាវប្បធម៌ជាតិ ត្រូវបានប្រារព្ធក្រោម ប្រធានបទ តែមួយ គឺ យុវជន ដើម្បីវប្បធម៌ជាតិ ដើម្បីជំរុញដល់ការយល់ដឹងពីគ្រប់មជ្ឃដ្ឋានទាំងអស់អំពី ភារកិច្ចគ្មានទីបញ្ចប់ នៃកិច្ចការអភិរក្ស ថែរក្សាសិល្បៈវប្បធម៌ជាតិ អំពីកាតព្វកិច្ចដែលជាការចាំបាច់ នៃយុវជនបន្តវេន ។

លោកស្រី បានបន្ថែមថា គោលបំណងអង្គពិធីនេះ គឺជាការរួមចំណែកថែរក្សាការពារ លើកកម្ពស់តម្លៃ សិល្បៈវប្បធម៌ និងទំនៀមទម្លាប់ ប្រពៃណីដ៏ល្អផូរផង់របស់ជាតិយើង សំដៅបង្កើនសេចក្តី ស្រឡាញ់ចំពោះកេរដំណែល វប្បធម៌បង្កើនការយល់ដឹងអំពីតម្លៃ និងភាពសម្បូរបែបនៃ សិល្បៈវប្បធម៌ជាតិ ដល់គ្រប់មហាជនតាមរយៈការផ្សព្វផ្សាយ បណ្តុះបណ្តាល និង ព្រឹត្តិការណ៍សិល្បៈវប្បធម៌នានា ដែលផ្តោតជាអាទិភាពទៅលើការចូលរួមរបស់យុវជន ឱ្យ កាន់តែមានភាពល្អប្រសើរឡើងស្របតាមគោលដៅ កម្ពុជា ព្រះរាជាណាចក្រនៃវប្បធម៌ ។

មានប្រសាសន៍ទៅកាន់អង្គពិធី លោក ថោង ស្រាន់ អភិបាលរងខេត្ត បានលើកឡើងថា ជាការពិតប្រមុខរាជរដ្ឋាភិបាលនៃព្រះរាជាណាចក្រកម្ពុជា តែងតែយកចិត្តទុកដាក់ ប្រារព្ធទិវាវប្បធម៌ជាតិនេះឡើង ជារៀងរាល់ឆ្នាំ ដើម្បីរំឭកគុណូបការៈ និងស្នាដៃដ៏វិសេសវិសាលនៃបុព្វបុរសយើង ដែលបានបន្សល់ទុកនូវមរតកវប្បធម៌ ដ៏សម្បូរបែបដល់កូនចៅជំនាន់ក្រោយ ។

លោកអភិបាលរងខេត្ត បានបន្តថា ការប្រារព្ធទិវាវប្បធម៌ជាតិ ៣ មីនា នេះ ជាការជំរុញការផ្សព្វផ្សាយ ការផ្ទេរចំណេះដឹង ចំណីធ្វើ ជំនាញ បច្ចេកទេស និងទេពកោសល្យវប្បធម៌ ក៏ដូចជាការក្រើនរំឭក បំផុសស្មារតី និងមនសិការ ដល់ប្រជាពលរដ្ឋទាំងអស់ ជាពិសេសយុវជនដែលជាទំពាំងស្នងឫស្សី មានកាតព្វកិច្ចក្នុងការថែរក្សាការពារ ឲ្យបានស្ថិតស្ថេរគង់វង្សនូវវប្បធម៌ជាតិ និងវប្បធម៌ចម្រុះ របស់សហគមន៍ជនជាតិ ក្នុងព្រះរាជាណាចក្រកម្ពុជា ក្រោមប្រធានបទ ” យុវជនដើម្បីវប្បធម៌ “។

ឆ្លៀតក្នុងឱកាសនោះដែរ លោក ថោង ស្រាន់ អភិបាលរងខេត្តស្ទឹងត្រែង បានបញ្ចាក់បន្ថែមថា ការចូលរួមរបស់យុវជនក្នុងវិស័យសិល្បៈវប្បធម៌ ជាកត្តាមិនអាចខ្វះបាន ដើម្បីសេដ្ឋ កិច្ចសង្គម និងការទប់ស្កាត់ការឆ្លងរាលដាលពីវប្បធម៌ដទៃ ដែលអាចប៉ះពាល់ដល់លក្ខណៈ ដើមនៃវប្បធម៌យើង។ ពាក្យថាគោរពស្រឡាញ់វប្បធម៌ជាតិ ជាពាក្យងាយស្រួលនិយាយ ប៉ុន្តែ ដើម្បីឱ្យមានការគោរពស្រឡាញ់ពិតប្រាកដ ជាដំបូងយើងត្រូវការយល់ដឹងឱ្យបានល្អអំពី សិល្បៈវប្បធម៌ជាតិ និងការចូលរួមគ្រប់រូបភាពដល់ការការពារ និងការលើកស្ទួយវប្បធម៌ជាតិ យើង។ក្នុងន័យនេះ ការបណ្តុះបណ្តាល ផ្សព្វផ្សាយ និងបញ្ញាបការយល់ដឹង បង្កើនឱកាស នៃការចូលរួម បង្កើតឱ្យមានភាពទាក់ទាញកាន់តែខ្លាំងដល់មហាជនទូទៅ ជាពិសេសយុវជន និងពង្រឹងសេចក្តីគោរពស្រឡាញ់នូវវប្បធម៌ ទាំងរូបី និងអរូបី របស់ប្រជាជាតិ៕