រដ្ឋមន្ត្រីព័ត៌មាន អំពាវនាវដល់អ្នកសារព័ត៌មាន និងអ្នកផលិតមាតិកាមួយចំនួន គោរពឱ្យបាននូវក្រមសីលធម៌វិជ្ជាជីវៈ
ភ្នំពេញ៖ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានអំពាវនាវដល់អ្នកសារព័ត៌មាន ក៏ដូចជាអ្នកផលិតមាតិកា វីដេអូ និង អ្នកសរសេរប្លុក មួយចំនួនជាពិសេសក្រុម MMO សូមគោរពឱ្យបានខ្ជាប់ខ្ជួននូវក្រមសីលធម៌វិជ្ជាជីវៈសារព័ត៌មានក្នុងការផលិតខ្លឹមសារដោយមិនត្រូវគិតត្រឹម តែការទាក់ទាញយកចំនួន Likes ; Shares, views ដើម្បីបានប្រាក់ឡើយ ប៉ុន្តែត្រូវឈរលើមូលដ្ឋានវិជ្ជាជីវៈ ការគោរពនូវសិទ្ធិឯកជនរបស់បុគ្គល និងជៀសវាងការផ្សព្វផ្សាយព័ត៌មានមិនពិត ដែលធ្វើឱ្យប៉ះពាល់ដល់សន្តិសុខ សណ្តាប់ធ្នាប់សារធារណៈ និងការបង្កចលាចល និងភាពវឹកវរដោយសារតែការចង់បានការចាប់អារម្មណ៍ពីអ្នកប្រើប្រាស់បណ្តាញសង្គមហ្វេសប៊ុក ឬតិកតុក របស់ខ្លួន។
ការអំពាវនាវរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្នុងឱកាសអញ្ជើញជាអធិបតីក្នុងពិធីសម្ពោធក្រុមហ៊ុន Influence Media ជាក្រុមហ៊ុនប្រព័ន្ធផ្សព្វផ្សាយ នៅល្ងាចថ្ងៃទី៩ ខែមីនា ឆ្នាំ២០២៤ នាមជ្ឈមណ្ឌលសន្និបាត PH GRAND ប៉េងហួត បឹងស្នោរ រាជធានីភ្នំពេញ ។
ឯកឧត្តមរដ្ឋមន្ត្រី សង្ឃឹមថា អ្នកផលិតមាតិកាវីដេអូ ឬ ប្លុក នឹងចូលរួមប្រើប្រាស់ភាពច្នៃប្រឌិត និងទស្សនៈ សុទិដ្ឋិនិយមរបស់ខ្លួន ដើម្បីបង្ហាញពីភាពស្រស់ស្អាត និងការពិតរបស់ប្រទេសកម្ពុជាទៅកាន់ពិភពលោកឱ្យបានត្រឹមត្រូវ និងមានប្រសិទ្ធភាព។
ឯកឧត្តម រដ្ឋមន្រ្តី នេត្រ ភក្ត្រា មានប្រសាសន៍ថា ការបើកដំណើរការក្រុមហ៊ុន Influence Media នាឱកាសនេះនេះ ជាការចូលរួមបន្ថែមនៅក្នុងការបង្កើតភាពសម្បូណ៌បែបនៃការផ្តល់សេវាក្នុងវិស័យសារព័ត៌មាន។
ជាមួយគ្នានេះ ក៏បានធ្លុះបញ្ចាំងឱ្យឃើញនូវការ រីកចម្រើននៃវិស័យសារព័ត៌មាននៅកម្ពុជា ព្រមទាំងបានចូលរួមយ៉ាងសកម្មជាប្រភពបន្ថែមក្នុងការផ្តល់ព័ត៌មាន និងការកម្សាន្តជូនប្រជាពលរដ្ឋក្នុងបរិបទឌីជីថល។
ឯកឧត្តម រដ្ឋមន្រ្តី បានបញ្ជាក់ថា ក្រសួងព័ត៌មានតែងតែគាំទ្រ និងលើកទឹកចិត្តដល់ការបង្កើតប្រព័ន្ធផ្សព្វផ្សាយនានា ដោយក្រសួងជឿជាក់ថាការ ផ្សព្វផ្សាយព័ត៌មានតាមបណ្តាញផ្សព្វផ្សាយចម្រុះមិនត្រឹមតែធ្វើឱ្យប្រជាជនកម្ពុជា ក៏ដូចជាសាធារណជនទូទៅ ទទួលបានព័ត៌មានពិតឆាប់ រហ័សអំពីប្រទេសកម្ពុជា ប៉ុណ្ណោះទេថែមទាំង ជំរុញលើកកម្ពស់ការយល់ដឹងរបស់ប្រជាពលរដ្ឋ និង រួមចំណែកដល់ការអភិវឌ្ឍប្រទេសជាតិ ផង ដែរ។
ឯកឧត្តមបានបន្តថា បច្ចុប្បន្ននេះ ប្រព័ន្ធផ្សព្វផ្សាយទាំងបុរាណ និងទំនើបនៅកម្ពុជាមានចំនួនជាង ២ ០០០ ដែលបានចុះបញ្ជីស្របតាមច្បាប់នៅក្រសួងព័ត៌មាន និងកំពុងតែដើរតួនាទីសំខាន់នៅក្នុងការផលិតខ្លឹមសារផ្សេងៗ និងផ្សព្វផ្សាយជូនដល់សាធារណជន។ នេះមិនទាន់និយាយពីបណ្តាញទំនាក់ទំនង ហ្វេសប៊ុក តិកតុក អ៊ីស្តាក្រាម ធ្វីតធ័រ ជាច្រើនលានគណនីដែលកំពុងផលិតខ្លឹមសាររាប់លាន និងចាក់ចូលក្នុងប្រព័ន្ធផ្សព្វផ្សាយក្នុងប្រទេសកម្ពុជា។
ឯកឧត្ដមរដ្ឋមន្ត្រីបានបញ្ជាក់ថា ការរីកចម្រើននៃប្រព័ន្ធផ្សព្វផ្សាយជាភាសាខ្មែរ និងភាសាចិននៅកម្ពុជា មិនត្រឹមតែអាចជំរុញការផ្លាស់ប្តូរសេដ្ឋកិច្ច និង វប្បធម៌រវាងកម្ពុជា និងចិន ប៉ុណ្ណោះទេ ថែមទាំងរឹតចំណងមិត្តភាពដែកថែម រវាងប្រទេសកម្ពុជានិងចិនឱ្យកាន់តែរឹងមាំស្អិត រមួត និងយូរអង្វែងថែមទៀត។ កាន់តែពិសេសនោះវានឹងក្លាយជាប្រភពចំណេះដឹងដ៏សម្បូរបែបសម្រាប់សហគមន៍ជនជាតិចិនដែល កំពុងរស់នៅប្រទេសកម្ពុជា និងផ្សព្វផ្សាយទៅកាន់ប្រជាជនចិន និងអ្នកចេះភាសាចិននៅលើពិភពលោកផងដែរ៕
