ទូតអាម៉េរិក គាំទ្រយ៉ាងពេញទំហឹងចំពោះគំនិតផ្តួចផ្តើមរបស់កម្ពុជាក្នុងកិច្ចខិតខំប្រឹងប្រែង ដើម្បីទទួលបានមកវិញនូវប្រព័ន្ធអនុគ្រោះពន្ធ GSP

ភ្នំពេញ៖ ឯកអគ្គរដ្ឋទូតសហរដ្ឋអាម៉េរិកប្រចាំនៅកម្ពុជា លោក Patrick Murphy បានចេញមុខគាំទ្រយ៉ាងពេញទំហឹងចំពោះគំនិតផ្តួចផ្តើមរបស់រដ្ឋាភិបាលកម្ពុជាក្នុងកិច្ចខិតខំប្រឹងប្រែងគ្រប់បែបយ៉ាង ដើម្បីទទួលបានមកវិញនូវប្រព័ន្ធអនុគ្រោះពន្ធ GSP ខណៈប្រព័ន្ធអនុគ្រោះពន្ធរបស់សហរដ្ឋអាម៉េរិកមួយនេះបានអស់សុពលភាពតាំងពីតែពីកំលុងឆ្នាំ២០២០មកម៉្លេះ។

ការចេញមុខគាំទ្រនេះធ្វើឡើងអំឡុងពេលលោក Patrick Murphy បានអញ្ជើញទៅជួបពិភាក្សាការងារជាមួយ ឯកឧត្ដម ប៊ិន ត្រឈៃ រដ្ឋមន្ត្រីក្រសួងផែនការ នៅទីស្តីការក្រសួង កាលពីថ្ងៃទី៥ ខែមីនា។

ក្នុងជំនួបនោះលោក ឯកអគ្គរដ្ឋទូតសហរដ្ឋអាម៉េរិក បានគូសបញ្ជាក់ពីសារសំខាន់នៃការពង្រឹងកិច្ចសហប្រតិបត្តិការពាណិជ្ជកម្មប្រទេសទាំងពីរដែលនឹងផ្តល់ផលចំណេញដល់គ្នាទៅវិញទៅមក ហើយវានឹងរឹងរិតតែប្រសើរបើកម្ពុជាបានទទួលបានប្រព័ន្ធអនុគ្រោះពន្ធ GSP ពេញលេញសម្រាប់ការនាំទំនិញទៅសហរដ្ឋអាម៉េរិកឡើងវិញ។

លោក Patrick Murphy បានថ្លែង ចំពោះមុខរដ្ឋមន្ត្រីក្រសួងផែនការ យ៉ាងដូច្នេះថា ទោះជារដ្ឋសភាសហរដ្ឋអាម៉េរិកនៅពុំទាន់បានអនុម័តដាក់បញ្ចូលកម្មវិធី GSP ឱ្យប្រើប្រាស់ឡើងវិញក្ដី តែលោកសង្ឃឹមយ៉ាងខ្លាំងថាកម្ពុជានឹងទទួលបានការផ្ដល់ GSP មកវិញ តាមរយៈការខិតខំរបស់រដ្ឋាភិបាលកម្ពុជាក្នុងការផ្សារភ្ជាប់ទំនាក់ទំនងពាណិជ្ជកម្ម និងកិច្ចសហប្រតិបត្តិការផ្សេងៗជាមួយសហរដ្ឋអាម៉េរិកនាពេលកន្លងមក។

ក្នុងជំនួបខាងលើ ភាគីទាំងពីរបានបញ្ជាក់ពីការបន្តពង្រឹង និងពង្រីកកិច្ចសហប្រតិបត្តិការរវាងក្រសួងផែនការ នៃរាជរដ្ឋាភិបាលកម្ពុជា ជាមួយសហរដ្ឋអាម៉េរិក តាមរយៈអង្គការ USAID រួមនឹងដៃគូអភិវឌ្ឍផ្សេងៗទៀតផងដែរ។

គួរបញ្ជាក់ផងដែរថា អស់រយៈពេលប្រមាណជាង៤ឆ្នាំមកហើយ ដែលកម្ពុជាអស់សុពលភាពពីប្រព័ន្ធអនុគ្រោះពន្ធទូទៅGSPរបស់សហរដ្ឋអាម៉េរិក ពោលគឺតាំងតែពីអំឡុងឆ្នាំ២០២០មកម៉្លេះ បើទោះជាកន្លងមកកម្ពុជាបានខិតខំប្រឹងប្រែងគ្រប់បែបយ៉ាង ដើម្បីឱ្យសហរដ្ឋអាម៉េរិកផ្តល់ប្រព័ន្ធអនុគ្រោះពន្ធ GSP មកវិញក្ដី។ យ៉ាងណារហូតមកទល់ពេលនេះកម្ពុជានៅមិនទាន់បានសម្រេចបំណងដែលជាការចង់បានរបស់ខ្លួននៅឡើយនោះទេ៕