ភ្នំពេញ៖ អគ្គនាយកអន្តោប្រវេសន៍ បានឃាត់ខ្លួនជនជាតិបង់ក្លាដេស២នាក់ និងជួយសង្គ្រោះជនប្រទេស៥៦នាក់ចម្រុះជាតិសាសន៍ផ្សេងទៀត ក្នុងរាជធានីភ្នំពេញ ដែលជាប់ពាក់ព័ន្ធក្នុងករណីឆបោកឱ្យមកធ្វើការនៅប្រទេសកម្ពុជាដោយខុសច្បាប់។ នេះបើយោងតាម អគ្គនាយកអន្តោប្រវេសន៍កម្ពុជានៅព្រឹកថ្ងៃទី១៧ ខែមករា ឆ្នាំ២០២៤។
អគ្គនាយកអន្តោប្រវេសន៍ឱ្យដឹងបន្ថែមថា ប្រតិបត្តិការនេះធ្វើឡើងតាមបណ្ដឹងអន្តរគមន៍ជួយសង្គ្រោះពីជនជាតិបង់ក្លាដេសកាលពីថ្ងៃទី១៤ខែធ្នូឆ្នាំ២០២៣ ហើយដែលបានចុះស្រាវជ្រាវស៊ើបអង្កេតរហូតដល់ថ្ងៃទី១១ ខែមករាឆ្នាំ២០២៤ កំណត់បានទីតាំងចុះត្រួតពិនិត្យរដ្ឋបាលចំនួន២ ផ្សេងគ្នារួមមាន៖ ទី១ សណ្ឋាគារមួយកន្លែង នៅសង្កាត់វត្តភ្នំ ខណ្ឌដូនពេញ និងទី២ ផ្ទះសំណាក់មួយកន្លែង ក្នុងសង្កាត់ផ្សារកណ្ដាល ខណ្ឌដូនពេញ ដែលជាទីតាំងសង្ស័យមានជាប់ពាក់ព័ន្ធករណីនាំមនុស្សឆ្លងដែនខុសច្បាប់។
ជាលទ្ធផលកម្លាំងជំនាញឃាត់ខ្លួនបានជនបរទេសចំនួន៥៨នាក់រួមមាន ៥៦នាក់ជាជនរងគ្រោះ សញ្ជាតិបង់ក្លាដេស ៥១នាក់ ឥណ្ឌា ៤នាក់ និងស្រីលង្កា១នាក់ ដែលត្រូវបានមេខ្យល់អូសទាញមកកម្ពុជា ដើម្បីស្វែងរកការងារធ្វើ រីឯមួយចំនួនទៀតមិនចេះអង់គ្លេស និងកុំព្យូទ័រ ត្រូវបញ្ជូនបន្តទៅប្រទេសថៃ និងម៉ាឡេស៊ី។ ដោយឡែកជនសង្ស័យ២នាក់ ផ្សេងទៀតដែលជាជនជាតិបង់កា្លដេស សង្ស័យជាមេខ្លោង ត្រូវបានកសាងសំណុំរឿងបញ្ជូនទៅតុលាការ និងបន្តស្រាវជ្រាវស្វែងរកជនសង្ស័យជាជនបរទេស៤នាក់ទៀតដែលរត់គេចខ្លួន ដើម្បីយកមកអនុវត្តតាមនីតិវិធី។ រីឯជនរងគ្រោះចំនួន ៥៦នាក់ក្នុងករណីនោះ ដោយមានការសម្របសម្រួលពីក្រសួងសង្គមកិច្ចបានប្រគល់ឱ្យអង្គការ ការីតាសកម្ពុជា-ខេត្តកណ្តាល៕
