ឧត្តមសេនីយ៍ឯក ជា ពៅ៖ ប្រព័ន្ធ Hotline Scam 24/7 នឹងដើរតួនាទីសំខាន់ក្នុងការដាក់ពាក្យបណ្តឹងតាមប្រព័ន្ធអនឡាញ ដើម្បីជួយសម្រួល និងសន្សំសំចៃពេលវេលារបស់ប្រជាពលរដ្ឋ

ភ្នំពេញ៖ នៅព្រឹកថ្ងៃព្រហស្បតិ៍ ២កើត ខែមិគសិរ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី១៤ ខែធ្នូ ឆ្នាំ២០២៣ ឯកឧត្តម ឧត្តមសេនីយ៍ឯក ជា ពៅ អគ្គស្នងការរងនគរបាលជាតិ តំណាងដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ បានអញ្ជើញជាអធិបតី នៅក្នុងកម្មវិធីបណ្តុះបណ្តាល និងផ្សព្វផ្សាយប្រព័ន្ធ Hotline Scam 24/7 ដែលរៀបចំឡើងដោយអគ្គស្នងការដ្ឋាននគរបាលជាតិ។

ពិធីនេះ ក៏មានការចូលរួមពី លោកឧត្តមសេនីយ៍ត្រី ភាគ ធារិត អនុប្រធាននាយកដ្ឋានប្រឆាំងបទល្មើសបច្ចេកវិទ្យា ជាគ្រូបង្គោល និងស្នងការរង នាយ-នាយរងការិយាល័យ និងនាយ-នាយរងផ្នែក ដែលជាសិក្ខាកាម មកពីបណ្តាស្នងការដ្ឋាននគរបាលរាជធានី-ខេត្តទាំង២៥។

ឯកឧត្តម ឧត្តមសេនីយ៍ឯក ជា ពៅ បានធ្វើការពាំនាំនូវប្រសាសន៍ផ្តាំផ្ញើសួរសុខទុក្ខរបស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ដល់សិក្ខាកាមដែលបានចូលរួម និងមានមតិសំណេះសំណាលជាមួយសិក្ខាកាមព្រមទាំងបានប្រកាសផ្សព្វផ្សាយអំពីប្រព័ន្ធ Hotline Scam របស់អគ្គស្នងការដ្ឋាននគរបាលជាតិ ដែលបានដាក់ដំណើរការនាពេលកន្លងមក ក៏ដូចជាធ្វើការចែករំលែកនូវចំណេះដឹងពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា។ បន្ថែមពីនេះ ឯកឧត្តម ឧត្តមសេនីយ៍ឯក បានបញ្ជាក់ថា នាពេលអនាគតប្រព័ន្ធ Hotline Scam នឹងដើរតួនាទីយ៉ាងសំខាន់ក្នុងការដាក់ពាក្យបណ្តឹងតាមប្រព័ន្ធអនឡាញ ហើយតម្រូវឲ្យមន្រ្តីជំនាញទាំងអស់ ត្រូវយល់ដឹងឲ្យបានច្បាស់អំពីប្រព័ន្ធខាងលើនេះ ក៏ដូចជាត្រូវមានជំនាញ និងចំណេះដឹងអំពីបទល្មើសបច្ចេកវិទ្យា។

ឯកឧត្តម ឧត្តមសេនីយ៍ឯក អគ្គស្នងការរង បានបន្តថា អស់លោកឧត្តមសេនីយ៍ វរសេនីយ៍ បានដឹងហើយ បច្ចុប្បន្ននេះ គឺយើងនិយាយអំពីយុទ្ធសាស្រ្តបញ្ចកោណដំណាក់កាលទី៧ របស់រាជរដ្ឋាភិបាល ដែលក្នុងនោះ ឯកឧត្តមបានលើកយកមួយចំណុច គឺកសាងធនធានមនុស្ស តែទន្ទឹមនឹងកសាងធនធានមនុស្សបាន ល្គឹកណារដ្ឋាភិបាលជារដ្ឋាភិបាលឌីជីថល។ ដូច្នេះហើយវគ្គឌីជីថលនេះ បង្កើតឡើងដោយផ្អែកលើគោលការណ៍របស់រាជរដ្ឋាភិបាល របស់ក្រសួងមហាផ្ទៃ ក៏ដូចជាអគ្គស្នងការដ្ឋាននគរបាលជាតិ ដែលមានឯកឧត្តម នាយឧត្តមសេនីយ៍ ស ថេត ជាអគ្គស្នងការនគរបាលជាតិ ដែលជាអ្នកផ្តួចផ្តើមគំនិតបង្កើតឲ្យមានវគ្គនេះឡើង ដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាល។

ជាកិច្ចបញ្ចប់ ឯកឧត្តម ឧត្តមសេនីយ៍ឯក ជា ពៅ ក៏បានស្នើសុំឲ្យសិក្ខាកាមដែលបានចូលរួមវគ្គខាងលើនេះ ជួយធ្វើការចែករំលែកចំណេះដឹងបន្តទៅតាមបណ្តាអង្គភាពសាមីរបស់ខ្លួន ហើយនៅថ្ងៃខាងមុខនឹងមានការរៀបចំវគ្គបណ្តុះបណ្តាលបន្ថែមទៀត ដើម្បីពង្រឹងទៅដល់មន្រ្តីតាមបណ្តាស្នងការដ្ឋាននគរបាលរាជធានី-ខេត្ត ៕