ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា៖ «មានគេសួរថាបេតិកភណ្ឌពិភពលោក និងប្រជាពលរដ្ឋ តើមួយណាសំខាន់? ខ្ញុំបានបញ្ជាក់ថាត្រូវជ្រើសរើសយកទាំងពីរ ទាំងការអភិរក្ស និងទាំងការយកចិត្តទុកដាក់ចំពោះប្រជាពលរដ្ឋ ដោយយើងមិនអាចទុកមួយណាចោលទេ»។
សម្តេចធិបតី មានប្រសាសន៍យ៉ាងដូច្នេះក្នុងឱកាសអញ្ជើញជួបសំណេះសំណាលជាមួយប្រជាពលរដ្ឋរស់នៅភូមិធម្មជាតិរុនតាឯក និងតំបន់ពាក់ស្នែង នៅឃុំធម្មជាតិរុនតាឯក ស្រុកបន្ទាយស្រី ខេត្តសៀមរាប នាព្រឹកថ្ងៃទី០៨ ខែធ្នូ ឆ្នាំ២០២៣នេះ។
សម្ដេចធិបតី ហ៊ុន ម៉ាណែត បានបន្តថា៖ «បើនិយាយនៅទីនេះកំពុងអភិវឌ្ឍន៍ថ្មី និងតំបន់ពាក់ស្នែងដែលកំពុងអភិវឌ្ឍន៍គឺជានិមិត្តរូបនៃការអភិវឌ្ឍដើម្បីអភិរក្ស»។
សម្ដេចធិបតី នាយករដ្ឋមន្ត្រី បានគូសបញ្ជាក់ទៀតថា រាជរដ្ឋាភិបាលរួមគ្នាអភិវឌ្ឍន៍ជាតិជាប្រយោជន៍ដល់ប្រជាពលរដ្ឋនៅក្នុងសម័យបច្ចុប្បន្ន និងទៅអនាគតប៉ុន្តែក៏មិនអាចភ្លេចបានឡើយនូវបុព្វហេតុក្នុងការអភិរក្សនូវកេរដំណែលរបស់ដូនតា។
សម្ដេចធិបតី បានសង្កត់ធ្ងន់ថា រាជរដ្ឋាភិបាលមិនអាចជ្រើសរើសជម្រើសណាមួយហើយបោះចោលជម្រើសណាមួយឡើយ ផ្ទុយទៅវិញ រាជរដ្ឋាភិបាលបានគិតទាំងការអភិវឌ្ឍ និងទាំងការអភិរក្សដែលត្រូវដើរទន្ទឹមគ្នាជានិច្ច។
សម្តេចធិបតី មានប្រសាសន៍ថា ប្រាសាទអង្គរគឺជានិមិត្តរូបជាតិយើងដែលក្លាយទៅជាសម្បត្តិវប្បធម៌មនុស្សលោកក្នុងបញ្ជីបេតិកភណ្ឌពិភពលោក ហើយត្រូវបានដកចេញប្រសិនជាយើងមិនអាចធានាបាននូវលក្ខខណ្ឌរបស់UNESCO។
សម្តេចធិបតី បានបន្តថា ពិតណាស់យើងមិនអាចជប់ឲ្យចេញនៅក្នុងរយៈពេលមួយឆ្នាំបានទេ។ ក៏ប៉ុន្តែសម្តេចអាចបញ្ជាក់បានថាប្រជាពលរដ្ឋដែលទទួលបានបណ្ណកម្មសិទ្ធិនៅទីនេះត្រូវតែទទួលបានការយកចិត្តទុកដាក់ពីរាជរដ្ឋាភិបាល ហើយយើងនឹងខិតខំធ្វើឲ្យតំបន់នេះក្លាយទៅជាទីក្រុងរុនតាឯក។
ក្នុងឱកាសនោះ សម្ដេចធិបតី នាយករដ្ឋមន្ត្រី ក៏បានថ្លែងអំណរគុណដល់ប្រជាពលរដ្ឋដែលបានស្ម័គ្រចិត្តរើទីលំនៅមកនៅក្នុងតំបន់អភិវឌ្ឍន៍ធម្មជាតិរុនតាឯក និងពាក់ស្នែងនាពេលនេះ ៕
