មេបញ្ជាការតំបន់ប្រតិបត្តិការសឹករងកំពង់ធំ ដឹកនាំកម្លាំងចូលរួមអបអរសាទរ ខួបអនុស្សាវរីយ៍លើកទី៤៥ ទិវាកំណើតរណសិរ្យសាមគ្គីអភិវឌ្ឍន៍មាតុភូមិកម្ពុជា
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅព្រឹកថ្ងៃទី២ ខែធ្នូ ឆ្នាំ២០២៣ បានដឹកនាំកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ចូលរួមមីទ្ទិញអបអរសាទរខួបលើកទី៤៥ ទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា ២ធ្នូ ឆ្នាំ១៩៧៨ – ២ធ្នូឆ្នាំ២០២៣ ដែលពិធីមិទ្ទីញនេះស្ថិតក្រោមអធិបតីភាពឯកឧត្តមទេសរដ្ឋមន្រ្តី ថោង ខុន ទទួលបន្ទុកបេសកកម្មពិសេស តំណាងឯកឧត្តម ជា ចាន់តូ សមាជិកក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា ។
ឯកឧត្តមទេសរដ្ឋមន្រ្តី ថោង ខុន បានឡើងអានសុន្ទរកថារបស់សម្ដេចកិត្តិសង្គហបណ្ឌិត ម៉ែន សំអន ឧត្តមក្រុមប្រឹក្សាផ្ទាល់ព្រះមហាក្សត្រ និងជាប្រធានគណៈអចិន្ត្រៃយ៍ក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា និងបានគូសបញ្ជាក់បន្ថែមថា នៅថ្ងៃទី២ ខែធ្នូ ឆ្នាំ១៩៧៨ រណសិរ្សសាមគ្គីសង្គ្រោះជាតិកម្ពុជា ត្រូវបានបង្កើតឡើងដោយសម្តេចមហាពញាចក្រី ហេង សំរិន សម្តេចមហាធម្មពោធិសាលជា ស៊ីម និងសម្តេចអគ្គមហាសេនាបតីហ៊ុន សែន ដើម្បីសហការជាមួយកងទ័ពស្ម័គ្រចិត្តវៀតណាម វាយផ្ដួលរំលំរបបប្រល័យពូជសាសន៍ប៉ុលពត អៀងសារី ខៀវសំផន និងទទួលបានជ័យជម្នះជាប្រវត្តិសាស្រ្ត នៅថ្ងៃទី៧ ខែមករា ឆ្នាំ១៩៧៩ ។ បន្តមកក្រោមការដឹកនាំ និងពុះពារឆ្លងកាត់គ្រប់ឧបសគ្គពិសេសការទប់ស្កាត់ការវិលត្រឡប់មកវិញនៃរបបប្រល័យពូជសាសន៍ប៉ុលពត និងការអនុវត្តនូវនយោបាយឈ្នះ ឈ្នះ របស់សម្ដេចអគ្គមហាមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យប្រទេសជាតិយើងមានសុខសន្តិភាពនិងការឯកភាពជាតិពេញលេញ ហើយប្រទេសជាតិយើងយើងមានការអភិវឌ្ឍន៍រីកចម្រើនរុងរឿងលើគ្រប់វិស័យគួរជាទីមោទនៈ ។
ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ សមាជិកអចិន្ត្រៃយ៍រណសិរ្សសាមគ្គីអភិវឌ្ឍន៍មាតុភូមិកម្ពុជាខេត្តកំពង់ធំ តំណាងឲ្យកងកម្លាំងប្រដាប់អាវុធទាំងបី ដែលបានអញ្ជើញជាគណ:អធិបតី ក្នុងអង្គពិធីមិទ្ធីញនេះ បានមានប្រសាសន៍ថា យើងខ្ញុំទាំងអស់គ្នាជាកងកម្លាំងប្រដាប់អាវុធទាំងបី មន្ត្រីរាជការ អាជ្ញាធរដែនដី និងប្រជាពលរដ្ឋនៅក្នុងខេត្តកំពង់ធំ សូមអបអរសាទរយ៉ាងក្លៀវក្លា ចំពោះខួបអនុស្សាវរីយ៍លើកទី៤៥ ទិវាកំណើតរណសិរ្សសាមគ្គីអភិវឌ្ឍន៍មាតុភូមិកម្ពុជា នៅថ្ងៃទី២ ខែធ្នូ ឆ្នាំ២០២៣នេះ ។ បើគ្មានថ្ងៃទី២ធ្នូ ឆ្នាំ១៩៧៨ ក៏គ្មានថ្ងៃជ័យជម្នះជាប្រវត្តិសាស្ត្រ៧មករាឆ្នាំ៩៧៩បានដែរ។ ហើយបើគ្មានថ្ងៃជ័យជំនះ៧ មករា ឆ្នាំ១៩៧៩ យើងក៏គ្មានអ្វីៗគ្រប់យ៉ាង នៅថ្ងៃនេះបានដែរ។
ដូច្នេះយើងទាំងអស់គ្នាត្រូវប្ដេជ្ញាចិត្តដាច់ខាតការពារឲ្យបាននូវសមិទ្ធផល ដែលយើងរកបានដោយលំបាកនេះ និងថែរក្សាឲ្យបាននូវសុខសន្តិភាព ដែលយើងកំពុងមានដូចសព្វថ្ងៃនេះ ឲ្យនៅគង់វង្សជារៀងរហូត ដើម្បីប្រទេសជាតិយើងបន្តការអភិវឌ្ឍរីកចម្រើនរុងរឿងបន្ថែមទៀត ក្រោមការដឹកនាំប្រកបដោយគតិបណ្ឌិត និងគុណធម៌ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានៃយើង ។
