រដ្ឋមន្ត្រីក្រសួងរ៉ែ៖ សម្តេចធិបតី ហ៊ុន ម៉ាណែត ឡើងកាន់តំណែងជានាយករដ្ឋមន្ត្រី ៩០ថ្ងៃ បានធ្វើលើសពីការសន្យា ជួយដល់ប្រជាពលរដ្ឋលើវិស័យថាមពល
ភ្នំពេញ៖ រដ្ឋមន្ត្រីក្រសួងរ៉ែ និងថាមពល ឯកឧត្ដម កែវ រតនៈ បានថ្លែងបញ្ជាក់ថា ជិត៩០ថ្ងៃនៃការឡើងកាន់តំណែងជានាយករដ្ឋមន្ត្រី របស់សម្តេចមហាបវរធិបតី ហ៊ុន ម៉ាណែត សម្តេចបានខិតខំប្រឹងប្រែងទាំងយប់ទាំងថ្ងៃ បំពេញតាមការសន្យាជាមួយបងប្អូនប្រជាពលរដ្ឋ នៅមុនការបោះឆ្នោត។
ការលើកឡើងរបស់ឯកឧត្ដមរដ្ឋមន្ត្រីថាមពល ធ្វើឡើងក្នុងវេទិកាពិភាក្សាសារព័ត៌មាន លើប្រធានបទ «គោលនយោបាយរ៉ែ និងថាមពលនៅកម្ពុជា» នាថ្ងៃទី២១ ខែវិច្ឆិកា ឆ្នាំ២០២៣នេះ នៅសណ្ឋាសុខាភ្នំពេញ។
ឯកឧត្ដមរដ្ឋមន្ត្រីបញ្ជាក់ថា សម្រាប់វិស័យថាមពលរដ្ឋ រាជរដ្ឋាភិបាលអាណត្តិថ្មីនេះ មិនត្រឹមតែបំពេញដូចតាមការសន្យា មិនដំឡើងថ្លៃអគ្គិសនីប៉ុណ្ណោះទេ ថែមទាំងធ្វើលើសពីការសន្យាដោយមានការបញ្ចុះថ្លៃអគ្គិសនី សម្រាប់វិស័យអាទិភាពមួយចំនួន ដើម្បីជំរុញសកម្មភាពសេដ្ឋកិច្ចជាតិ។
ឯកឧត្ដមបានថ្លែងថា «ជិត៩០ថ្ងៃបន្ទាប់ពីសម្តេចមហាបវរធិបតី ហ៊ុន ម៉ាណែត ឡើងចូលកាន់តំណែង ៩០ថ្ងៃនេះ រដ្ឋាភិបាលអាណត្តិថ្មីនេះ បានបំពេញតាមការសន្យាមុនការបោះឆ្នោត នៅតែប្រកាន់ជំហរមិនដំឡើងថ្លៃអគ្គិសនី ហើយមិនត្រឹមតែមិនដំឡើងទេ កំពុងតែចុះថ្លៃឱ្យវិស័យគន្លឹះរបស់ជាតិដូចជា វិស័យឧស្សាហកម្ម កសិឧស្សាហកម្ម និងទេសចរណ៍ ដូច្នេះប្រជាពលរដ្ឋលោកអាចដឹងថា បន្ទាប់ពីចូលកាន់តំណែងរបស់សម្តេចមហាបវរធិបតី ហ៊ុន ម៉ាណែត លោកបានប្រឹងទាំងយប់ទាំងថ្ងៃ ដើម្បីបំពេញតាមការសន្យា ហើយមែនទែនបានធ្វើលើសថែមទៀត ព្រោះការសន្យាថាទប់ឱ្យនឹង ប៉ុន្តែមិនត្រឹមទប់ឱ្យនឹងទេ ថែមទាំងមានការបញ្ចុះថ្លៃជាបន្តបន្ទាប់ ក្នុងស្ថានភាពមួយដែលពិបាក។ តម្លៃថាមពលកំពុងតែកើននៅទូទាំងពិភពលោក ប៉ុន្តែជាការប្តេជ្ញារបស់សម្តេចមហាបវរធិបតី ហ៊ុន ម៉ាណែត ក្នុងការរក្សាតម្លៃអគ្គិសនីឱ្យនៅថ្លៃដដែល និងបន្តចុះដើម្បីជួយដល់សេដ្ឋកិច្ច»។
ឯកឧត្ដម កែវ រតនៈ បានបញ្ជាក់ទៀតថា ការងារអាទិភាពធំរបស់សម្តេចធិបតី ហ៊ុន ម៉ាណែត គឺស្តារសេដ្ឋកិច្ចឡើងវិញ បន្ទាប់ពីរងផលប៉ះពាល់ដោយជំងឺកូវីដ១៩ សង្គ្រាមរុស្ស៉ី-អ៊ុយក្រែន និងបញ្ហាមិនច្បាស់លាស់នៅតំបន់មជ្ឈឹមបូព៌ា ដែលកំពុងបន្តជះឥទ្ធិពលជាអវិជ្ជមានទូទាំងពិភពលោក។
សូមជម្រាបថា សម្តេចមហាបវរធិបតី ហ៊ុន ម៉ាណែត ក្នុងវេទិកាសាធារណៈនានាតែងតែបញ្ជាក់ថា ទោះបីជាពិភពលោក ជួបនូវវិបត្តិថាមពល ដែលតម្រូវឱ្យប្រទេសជាច្រើនដំឡើងថ្លៃអគ្គិសនីក្តី ក៏កម្ពុជាមិនដំឡើងថ្លៃអគ្គិសនីដែរ បើទោះរដ្ឋត្រូវខាតបង់ប្រាក់រាប់រយលានដុល្លារក្នុង ១ឆ្នាំក្តី។ ការមិនដំឡើងថ្លៃនេះ គឺជាការគិតគូរអំពីជីវភាពរស់នៅ របស់ប្រជាពលរដ្ឋ នៅក្នុងគ្រាដែលសេដ្ឋកិច្ចជួបការលំបាក។
សម្តេចនាយករដ្ឋមន្ត្រីបានសម្រេចបញ្ចុះតម្លៃអគ្គិសនី ជូនដល់ប្រតិបត្តិករទេសចរណ៍ទូទាំងប្រទេស សម្រាប់រយៈពេល ៣ខែក្នុងរដូវភ្ញៀវទេសចរច្រើន (High Season) ផងដែរ។ សម្តេចបានពន្យល់ ចំពោះការបញ្ចុះតម្លៃអគ្គិសនីនេះថា គឺយកមធ្យមភាគនៃការប្រើប្រាស់អគ្គិសនី រយៈពេល៦ខែ (រហូតដល់ខែ១២ ឆ្នាំ២០២៣)៕
