ឯកឧត្ដម ហ៊ុន ម៉ានី ស្វាគមន៍ប្រតិភូជាន់ខ្ពស់មកពីបណ្តាប្រទេសអាស៊ាន និងអាស៊ានបូក រួមទាំងមន្ត្រីជាន់ខ្ពស់របស់កម្ពុជាដែលបានមកជួបជុំគ្នាលើទឹកដីអង្គដ៏អច្ឆរិយៈ
ភ្នំពេញ៖ ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈបានប្រកាសស្វាគមន៍ប្រតិភូជាន់ខ្ពស់មកពីបណ្តាប្រទេសអាស៊ាន និងអាស៊ានបូក រួមទាំងមន្ត្រីជាន់ខ្ពស់របស់កម្ពុជាដែលបានមកជួបជុំគ្នាលើទឹកដីអង្គដ៏អច្ឆរិយៈ ដើម្បីចែករំលែក ពិភាក្សាលើបញ្ហាប្រឈម និងស្វែងរកដំណោះស្រាយរួមគ្នា ក្នុងភាពជាអ្នកដឹកនាំលើបរិវត្តកម្មមុខងារសាធារណៈ។
តាមរយៈបណ្ដាញសង្គមនៅថ្ងៃទី៦ ខែវិច្ឆិកានេះ ឯកឧត្ដម ហ៊ុន ម៉ានី បានឱ្យដឹងយ៉ាងដូច្នេះថា “ពិតណាស់ ក្នុងរយៈពេល៥៦ឆ្នាំកន្លងមកនេះ អាស៊ាន ដែលត្រូវបានស្គាល់ថាជាសហគមន៍សន្តិភាព សុវត្ថិភាព ស្ថិរភាព ថាមភាព និងវិបុលភាព របស់យើងបានរីកលូតលាស់ជាប្រចាំ ហើយអាស៊ានទទួលបានបទពិសោធន៍ក្នុងការក្លាយខ្លួនជាតំបន់ដែលមានសេដ្ឋកិច្ចរីកចម្រើនលំដាប់ទី៥ លើពិភពលោក ព្រមទាំងអាចបន្តវិវឌ្ឍឈានទៅមួយកម្រិតទៀតនៅឆ្នាំ២០៣០ បើតាមការព្យាករណ៍។ តែទោះបីជាយ៉ាងនេះក្តី យើងទាំងអស់គ្នាបាន និងកំពុងជួបប្រទះបញ្ហាប្រឈមជាច្រើនដែលបង្កផលប៉ះពាល់ដល់សុខទុក្ខនៃមនុស្សផងទាំងពួង ជាពិសេសស្ថានភាពក្រោយជំងឺកូវីដ១៩ ក៏ដូចជាផលជះដែលបណ្តាលមកពីសង្គ្រាមអូសបន្លាយនានា រួមទាំងកត្តា សង្គម សេដ្ឋកិច្ច នយោបាយដទៃទៀតលើពិភពលោក។ ក្នុងន័យនេះ ប្រជាជន និងថ្នាក់ដឹកនាំរបស់សហគមន៍អាស៊ាន រួមទាំងអាស៊ានបូក ចាំបាច់ត្រូវស្រាក់ដៃសហប្រតិបត្តិការរួមគ្នាលើសពីពេលណាទាំងអស់ដើម្បីដោះស្រាយវិបត្តិដែលយើងបាន និងកំពុងប្រឈម ក្នុងគោលដៅសម្រេចបាននូវប្រយោជន៍រួមគ្នា។
ក្នុងនាមជាម្ចាស់ផ្ទះ កម្ពុជាមានកិត្តិយសរៀបចំសិក្ខាសាលាស្តីពី «ការកសាងសមត្ថភាព លើភាពជាអ្នកដឹកនាំ ប្រកបដោយបរិវត្តកម្មសម្រាប់មន្ត្រីជាន់ខ្ពស់នៃប្រទេសជាសមាជិកអាស៊ាន និងប្រទេសទីម័រខាងកើត» ក្នុងវិស័យ មុខងារសាធារណៈ ដ៏មានសារៈសំខាន់នេះ ស្របពេលដែល រាជរដ្ឋាភិបាលនៃព្រះរាជាណាចក្រកម្ពុជាក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បញ្ចូលកិច្ចការកែទម្រង់វិស័យរដ្ឋបាលសាធារណៈ ទៅក្នុងយុទ្ធសាស្រ្តបញ្ចកោណ សម្រាប់អនុវត្តក្នុងអាណត្តិទី៧។ វេទិកានៃ «បរិវត្តកម្មភាពជាអ្នកដឹកនាំ» នាពេលនេះ គឺជាវេទិកាដ៏សំខាន់មួយសម្រាប់ថ្នាក់ដឹកនាំទាំងអស់ មកពីប្រទេសសមាជិកអាស៊ាន និងអាស៊ានបូក និងមន្ត្រីកម្ពុជា ដើម្បីជួបចែករំលែកការអនុវត្តល្អៗពីគ្នាទៅវិញទៅមក ព្រោះយើងជឿជាក់ថា ភាពជាអ្នកដឹកនាំមានភាពសំខាន់ និងចាំបាច់ សម្រាប់កំណែទម្រង់វិស័យមុខងារសាធារណៈ។
ខ្ញុំសូមជូនពរដល់ប្រតិភូដែលចូលរួមទាំងអស់ សូមទទួលបានជោគជ័យ និងទទួលបានពុទ្ធិជាច្រើនចេញពីសិក្ខាសាលា ហើយសូមឲ្យដំណើរកំសាន្តនានា លើទឹកដីអង្គរ ក្រុងសៀមរាប នៃព្រះរាជាណាចក្រកម្ពុជាទទួលបានតែភាពរីករាយ ជាមួយអនុស្សាវរីយ៍ល្អៗ” ៕
